ابقى قابلنى

(ابقى قابلنى)
ابقى قابلنى ف تلاتين سته
نشوف الدوله دى رايحه لفين
كلمة قالوها اهل الحته
لصاحبى الفقرى اللى اسمه حسين
,,,
وحسين طول العمر بيرغى
ويوجع راسى بميت حدّوته
ولمّا اسيب له البيت واتمشىّ
بيـْيجى ورايا تحت التوته
,,,
مرّه يقول لى وزارة الصحة
دورها يزيد فى العيشه المرّه
فاضيه مافيها علاج للكحّه
وحتى الابره تكون من برّه
,,,,
أصل علاجهم من غير فايده
وحاجه قديمة تاريخها معدىّ
ونص الشعب بكبد وزايده
وفايرس صعب ورحمة جدىّ
,,,,
ومرّه يقول لى وزير العدل
ما بتـّشْ لسّه ف أىّ قضيّه
وأسرع واحده بتوع امريكا
أخدوا براءه ف شربة ميّه
,,,,
وكل وزير مسئول فى مجاله
ينكـّدْ عيشة كل مواطن
لمّا نشوف الدوله بحالها
اتباعت للمحاسيب م الباطن
,,,,
علشان نندم على ثورتنا
لمّا يقولوا مافيش ميزانيّه
وراح يلهونا بجازنا وقوتنا
وبكره يسدّوا علينا المايّه
,,,,
قولت له يخرب بيت أيّامك
انت لديمه تعكــّر دمىّ
واللا مافيش غير انا قدّامك
كل شويّه تزوّد همىّ
,,,,
روح فى نصيبه وابعد عنىّ
واخزى شطانك فـُضــّها سيره
دانا م الثورة يا واد مستنى
لمّا كرهت الناس والجيره
,,,,
راح منطور ومشوّح ليّّه
وقال مش ناقص أىّ موشــّحْ
كل ما اجيلك تشخط فيّه
ورحمة امى لازم اترشــّح
,,,,,
خللانى خدت ياناس على خاطرى
وقولت يامصر الله يجازيكى
لو ماقدرتش امسك نفسى
لازم ابكى شويّه عليكى
,,,,

والله عندك حق فى ما كتبته

الشاعر الجميل

سعد الشرقاوى

مايفعلوه مع الشعب من اختلاق للازمات المفتعله

هو تأديب له عما قام به وللاسف فقد اكتشفنا ان

رجال امن الدوله الحاليين هم الذين يقومون بتلك الافعال

حتى يسقطوا الثوره وتفشل الجهود للنهوض بهذا الوطن .

فاكثر من شاهد عيان رأوا عربات تحمل السولار تفرغ

حمولتها فى الصحراء بواسطة رجال امن الدوله لافتعال ازمة الجاز

واقسم بالله شاعره رات بعينيها الشرطة تدفن فى الرمال حمولة عربه

نقل كبيره كامله من انابيب البوتاجاز ..

عرفت الآن من هم الطرف التالت او اللهو الخفى ؟؟؟

مودتى وتحيتى ...