حبيبي يابحر

[b][i]
[center]
حبيبي يا بحر
قفلتي ف وشى شباكك
رفضتى تفردى شباكك
وكان عشمى
عنيكى العسلى تصطادنى
تاخدنى ف دنيتك ساعه
لقيتك ضحكه خداعه
وأنا اللى البحر صاحبنى
ورمله سرير وأنا تعبان
وموجه ياما زغزغنى
هواه بيغنى ف ودانى
وشمسه مدفيانى حنان
وميه حنينه ف حضنه
تقوينى على الاحزان
عشانها قابلت موج ياما
وأفوت من ألف دوامه
أقابل كل خطوة عذاب
أشوف القسوة ف طريقها
وترمى قلبي ف حريقها
أنادى قلبها الفاجر
برغم الميه مش قادر
أمد أديه وأطفيها
وبتسوى قوى فيها
وكانت ظالمه احساسى
غرامها تاج على راسى
ورافض قلبها التتويج
ضاربنى الموج سنين كرابيج
سواد من قلبها الغدار
دى غلطه قلبي لما أختار
وماخسرتش
كسبت يابحر....
كفايه أنك بقيت صاحب
بفضفضله بأسرارى
ولا عمرك قطعت كلامى
وأنا بحكى
تداوى ف جرحى وألامى
وانا ببكى
ولما أشكى
من الأيام وم الدنيا
ف ثانية يا بحر بجريلك
وسامعك لما تتكلم
وأنا لسه يادوب شبرين
وجابنى أبويا على شطك
وبيعلمنى لجل أمشي
فأول خطوة خطتها
على شطك
وأول بنت حبتها
كتبت أسمها بخطك
دا حتى الجامعه قضتها
بشم نسيم على خطك
من المرسي لحد أبوقير
وانا مصاحبك لحد الصبح
ورملك فرشة التعبان
وموجك ياما زغزغنى
هواك بيغنى ف ودانى
وشمسك فيها أدفى حنان
وميه حنينه ف حضنك
دا حتى يا بحر لما أغضب
تحس بغضبي تغضبلى
تهب رياح
ويعلى الموج
مطر سفاح
ودوشه وهوج
تغرق شطك الهادى
وسامعك بأسمى بتنادى
حبيبي يا بحر
ولو قالوا عليك قلاب
كلام كداب
عروسة البحر عملالى
ف حبك سحر
فهمت يا بحر؟!!!!!!!
________________________________
كلمات
أصغر ديوك المملكة
جمال الدليل
____

والله يا جمال انت شاعر جميل

ونص من اجمل ما قرأت لك .

البحر والشط ومواساته وحديثه الذى لانمله .

صورك رائعه وسردك سلسال غير منفصل بل متصل

طوال النص . وهذه مهاره تحسب لك .

مودتى وتحيتى ..