بدون عنوان

الغيمة شايلة ف قلبها صحرا
و جزيرة وسط النيل اساسا بور
و الشمس طلعت بس من غير نور

دى حقيقة ولا احنا ف قلب الفيلم
و لا العيون زهقوا وبطلوا شوف
ولا العيون يئسوا وبطلوا حلم
و الفجر متكتف بحبل الخوف

ليه اليمام بينوح فى تغريده
حتى الطاووس بدل بريشه سواد
و الدم بطل جرى ف وريده
و الشمع بيسيح قبل ما بينقاد

يا كل حاجة و حد سامحوها
المقتولين دول برضه اولادها
قسيت عليهم .... هما بروها
باعت ودفعوا الدية في مزادها

فاتحين يا شمس لنورك احضانهم
فاستقبلوكى ف صدرهم طلقات
العيب لا منك انتى ولا منهم
حبوا الحياة احرار ... ولو اموات

حضنوا تراب ارضك كما المشتاق
حضنوا تراب الارض بخدودهم
الحضن كان حضنين ... لقا وفراق
ماتوا واول مرة يحسوا بوجودهم

الله .. الله .. الله

عليك يا احمد .. والله يا ابنى شاعر رائع .

ونص به الصدق عن ما حدث فى ثورة 25 يناير .

لكن باسلوب جميل وطرح ممتاز ومتمكن .

ثم خاتمه ولا اروع .. خاتمه اصفق لك على تسجيلها

فى هذا النص الذى راقنى بالفعل .

تسلم ايدك ايها الشاعر الرائع ..

مودتى وتحيتى ...