مصر الجديدة- طارق منيب

مصر الجديدة

حنبنيها وبإيدينا
وبكرة الهامة راح تعلى
وتكبر في القلوب نعمة
نقول دي مصر مش نقمة
ونفرح لما تروينا
ونلقى الرزق حوالينا
كرامتنا حنحفظها
ونرجع تاني للقيمة
لا فيه تعذيب ولا تلفيق
ولا تهمه بدون تحقيق
وفيه شرطة تحب الشعب
تقف جنبه فـ كل الصعب
ده غير الجيش
يقول للشعب كله يعيش
وأمن الدولة من أمني
وبالأخلاق أصون فني
وبرضه الدين حيحكمني
ماهو الحاكم بأمر الله
بيعدل كله يمشي وراه
ونتهادى بذكر الله
وسب الدين ماهوش بيننا
وكرب الدين يزول عنا
ونرجع تاني إحنا ندين
مانغرقشي تاني فـ الدين
ولا نصاب بيحكمنا
ولا كداب يحجمنا
ده عصر وفات
ولانغرق تاني فـ متاهات
نقول صوتنا وفيه انتخابات
وبناتنا حتتجوز
وعمر البنت ماتعنس
وفقيرنا يعيش برضه
وديوثنا يصون عرضه
ونرجع تاني للحشمة
وننسى سفور
ده حتى الحشمة مـ الحكمة
وغيرها فجور
وكله كمان حيتساوى
يلاقي الفرصة متصانة
ونلقى الساعي للفرصة
واثق مـ العدل
ماهوش واقع بدون واسطة
وضاع الحل
وعندي أمال
ألاقي الصدق من تاني
وأصدق لما تلقاني
ولما بتيجي تنصحني
تقولها صريحة فـ وداني
نخاف على مصر دي وطني
ونلقى أحبال
تطلعنا قوام قدام
ولا صهيوني يأمرني
وعمنا سام
حيعرف إن فيه إرادة
وإن إحنا كمان سادة
مفيش خدام
دي مصر الحرة دي بلادي
ومهد الفكر أجدادي
وحربي سلام
وماتش الكورة مش عاركة
ومش للهو والسرقة
رياضة وبس
وبتهذب كمان النفس
دي مصر جديدة ياخواننا
جميلة الإسم والمعنى
ونصنعها وتصنعنا
وحب الناس حيجمعنا
وأسكت هس
وأوعى تقول مفيش فايدة
دي ثورة خلاص ونار قايدة
وبكرة حنجني كل ثمار
ونطرد بينّا أي حمار
يقول وأنا مالي مش بلدي
حاربي فـ بنتي وفـ ولدي
منيش مسئول
نقوله دي مصر ياخاين
وأوعى يامصري تتهاون
وتنسى إن أنت مصري أصيل
وعمرك كله علشه ف ليل
وبعد الصبح
حننسى القبح
ونرجع تاني بس جداد
ونرجع نبني فـ الأمجاد
نعيد فـ حضارة الأجداد
رجال.. أولاد
نساء.. وبنات
ونبني تاريخنا للأحفاد
..............................