قصيدة شوية عضم ف قفه سيدة فاروق

عضم ف قفه

شويه عضم ف قفة
ف آخر البيت
على كنبة
واحنا
خرجنا لوش الدنيا
نعافر فيها
وهى كمان
وبنرجع
نحكى ونبكى من سخافتها معانا
فيضحك
يضحك على سذاجتنا وخيبة الواحد منا
يضحك
يضرب كف بكف بفرحة ازاى ماعرفش؟
كأنه يقول لو شورتو؟؟
أكيد ولابد----
شويه عضم ف قفه
ف آخر البيت
على كنبة
ولما قفلت جفن عنيا
يدوبك000
لحظة
صحيت على آيه؟
خير اللهم اجعله خير
فتحت الأرض بيبانها
وضمت فيه بحنان وأمان
راح داخل فيها زي حبيب ولهان مشتاق
نام بسلام وبأمن
واحنا00000
خير اللهم ما اجعله خير
صحينا لقينا كابووس
مابنصحاش منه
رغم طلوع الشمس كتير
وظهور الصبح والليل والصبح
واحنا مابنصحاش
ارجع
ابص عليه
ألاقى الكنبة الفاضية بتبكى عليه
وحيطان البيت
الزرع بتاعه
لبسه
حاجاته
واخبط جامد على راسى
إني اصحي
أفوق
ألاقيه قاعد ع الكنبة بتاعته
شويه عضم ف قفه
ف آخر البيت
لكن مالي علينا البيت
والدنيا
الكون
نفسي أقوم م النوم
واصحي
من الحلم المفزع ده
بقالي زمان مستنية
أنام بهدوء أمن
ومش عارفة
بقالي زمان
نفسي نقعد كلناع الطبلية
نهزر واسمع صوته بيشخط فينا
-احترمو النعمة يا ولاد الكلب
كان يقولها ويضحك
كان بيبص علينا أشوف الفرحة بتلمع جوة عنيه
لما بنضحك
حتى عليه
شويه عضم ف قفة
آاااااااااااااااه
يا عمود البيت
البيت
انهد

جميلة
....لمحة موفقة...أحييك...طبت...دم بخير.