بعتب عليكى يا شمس

الليل هجم عبّى القلوب ضلمة
استلّ منها الحلم و اتخبّى
سحب الحياة ... حبّة ورا حبّة
العنكبوت احتلّها وعشّش
الضى هاب منظرها و ما خشّش
والساحة فضيت فاتملت خفافيش
حاكم القلوب دى ساحتها ما بتفضاش
والقلب اما يموت يا اما يعيش
والقلب اللى يموت ده ما بيحياش
الشمس ليه استسلمت
ليه ضلمت
رفعت ايديها وسلمت دورها
طفّت شعاعها ولملمت نورها
مكسوفة ولا انتى بتتدارى
متخبيّة ورا قمرك الساكت
ردى عليا وبرّدى نارى
راجعالنا ولا نقول خلاص ماتت
قوليلى لجل أوئد شعور باقى
وادفن فى طينة الارض اشواقى
استنّى نورك ولا مستناش
وعيونى دى هيكونلها لازمة ؟؟
قوليلى لو مش راحعة مافتحهاش
عازمة تعودى ولا مش عازمة
البرد طال اطرافى جمدها
جمد مشاعر حلوة فى الشرايين
و الشمس رافضة تطلّ ف معادها
و الليل بيبدر ياس ع العايشين
ويامين يروح يرجع بشمس معاه
يحضنها تتطمن ... يدوب خوفها
فارس وهى ع الفرس وياه
من جوه سجن اليأس يخطفها
عودى عشاننا ومتغيبيش تانى
البحر واحش حضنه ضمّايتك
قلب السما بينادى واحشانى
عودى عشاننا وكمّلى حكايتك
ما تزيلى عار الجبن عن توبك
من ليل سكاتك قومى صحى النور
امحى الخطيّة وكفرى ذنوبك
صبّى الامل قبل القلوب ما تبور

الشاعر الجميل

احمد عبد العزيز

جميل ما خطت يداك وقصيده جيده من تركيبه رائعه

من المفردات والصور .

نتمنى ان نقرأ لك المزيد .

مودتى وتحيتى ...