البنت اللى إسمها ثَنية

[center] ( البنت اللى إسمها ثَنية )
البنت اللى إسمها ثَنية
ماشية على موضة الدُنيا
فى الشَعر واللِبس بثانية
مِتَابعة لك أخر الأنباء
************
ياسلام على التَذاويق
والمِكياج واللى بيليق
والمِحَذَق واللى بيضيق
والمَخروم على النِساء
**************
دى واحدة مِنهُم رايقة
مَوَراهاش حاجة فايقة
ع الموضة بِتِجرى سايقة
الدَلال وَيا الإغراء
*************
فى مَشيتها تِحِب تِتأصع
م الِليونة وم اللى مِترَصع
ياحَلاوِتها وهى بِتبَدع
فى ضحكِتها تلاقى أصداء
**************
مع الكَعب العالى الرُفَيع
أبو سِن خَشَب بيسَمَع
مع الغَوايش اللى بِتِلمَع
وفُستانها أبو الثَراء
**************
صورة طِبق الأصل لأُمَها
الخَالِق الناطِق فى شَكلَها
لكِن الفَرق الوَحيد سِنَها
نَفس الداء هو الداء
*************
لَما بِتِمشى بس فى الشارع
ومن الجيبة تِبان الكَوارع
تلاقى شَباب حَواليها تِتصَارِع
بِكَلام يخدِش الحَياء
************
اللى يقولها يابطة ياحلوة
واللى يقولها أفديكى بِغنوة
واللى يقولها أحِب السِوة
واللى يقول عايز لِقاء
*************
كل الكلام دا وهى قابِلة
بنت العَبيطة بنت الهَبلَة
غاوية زَفة من غير طَبلة
من شِفاة وعيون بَلهاء
***************
أخرة المَتَمَة والفَضايح
ظَبَطوا البنت أول إمبارح
فى شَقة مَفروشة مع وَلد كالِح
بيندهولوا بإسم رَجاء
***************
جابِت العار لأُمَها وأبوها
كُل العيلة إتبَروا سابوها
لا بيزوروها ولا بيودوها
فى أحد سِجون النِساء
**************
هو دا أخرة المَشى البَطال
كانت بِتِمشى ورا الموضة قال
ياللى شايفة فى نَفسِك جَمال
إياكى من هذا الهَراء
***************
مالها الحِشمَة مالوا الوَقار
زينة وأدب للى بيختار
قَلبى بيروح للى لابسة خِمار
بَيشوف فيها إنوثة حَواء
*******************
كلمات : يوسف أبو زينة
30 / 9 / 2011 م