يا ضمير الكون

بسم الله الرحمن الرحيم
كتبت بعد خطاب النتن


يا ضميرالكون


لساك يا ضمير الكون يا كسير
ساكن اوضة الانعاش
وبحس جهير وبقلب ضرير
بتحابى جهول هباش
زى الخنزير وبضب كبير
من دمى ما يستكفاش
بقرون وعيون بتشر جنون
وحوافر ك الاوناش

خطب المأفون وبحرفه الدون
ف وجود كل الحاضرين
وبغل ف غدر ونار معجون
ينعق ويردوا امين
ويقول بغروره وجوره وزوره
اوان دولتكوا ماجاش
خليك يا ضمير الكون يا كسير
ساكن اوضة الانعاش

و يقول الارض دى ملكى وسيركى
لايمكن منى تضيع
كرباجى ف ايدى سلاحى وسلكى
القابل للتوسيع
واكمنى فتوه وعتره وقوه
القسمه دى ما اقبلهاش
خليك يا ضمير الكون يا كسير
ساكن اوضةالانعاش

والارض ان كنت سارقها ناهبها
حارقها ما هوش اشكال
بس لا يمكن راح اسيبها
تروح لصاحبها ومهمن قال
ف مفاوضه مراوده مناهده مهاوده
وأى حوار بكاش
خليك يا ضمير الكون يا كسير
ساكن اوضة الانعاش

جيت اطلب حقى ف انى اكون
انسان حى وموجود
ليه مكان وأوان وزمان عنوان
ليه دولة وبيت وحدود
فلقيت الرد اتمد بصد
اتهد ما تقرفناش
ولقيت سى ضمير الكون ف سرير
مرمى ف اوضة الانعاش

ملعون ابو بلفور ع اللى جابوه
على وعد سقانا مرار
وكأنها تركة امه وابوه
يوهبها لمين يختار
وغصبها سلبها شبابها وهبها
لحفنه من الاوباش
خليك يا ضمير الكون يا كسير
ساكن اوضة الانعاش

واتغطى وسد ودانك لحسن
صرخة طفلى تجيك
ولو انها برضك حتى ان طالتك
مش هتأثر فيك
علشان دالعادى ودم ولادى
على الكفره ما يغلاش
خليك يا ضمير الكون يا كسير
ساكن اوضة الانعاش

منا فعلا غلطان جدا لو
فكرتك تنصف يوم
ليه دولة شعبى المسلم تحظى
بتأيد ابن الروم
دى الدولة يا تيجى بنصر و ظفر
وفخر يا اما بلاش
خليك يا ضمير الكون يا كسير
ساكن اوضة الانعاش

ومدمت شايفنا ضعاف وخفاف
بنخاف ولا لينا كبير
وسنينا عجاف وحروبنا هتاف
وبنلجاء لك يا ضمير
صهين واسلب واقلش واكدب
خد راحتك وما تخشاش
وانعس يا ضمير الكون يا كسير
داخل اوضة الانعاش




ههههههههه




تمت


محمود قطب

العفو يا عمنا
من هو مثلك لا يأسف
فالشرف كل الشرف لى ولحرفى المتواضع
بتشريفك المحبب متى شئت وكيفما شئت
وتكفينى منك ايمائة اشادة حتى اطير فرحا
وانا اتفق مع حضرتك فى كل ما قلته
ونسئل الله ان تكون تلك العاصفة قريبا
ودى واحترامى وتحياتى