صباح الخير .. ياغربية

( صباح الخير .. ياغربية )
صباح الخير .. ياغربية
صباح الرضا و الحنية
صباح الحلاوة الطحينية
والفول السودانى والسمسمية
والمِشَبِك الحِلو والحُمُصية
واللديدة والمَلبَل والعسَلية
وطعم القهوة على القهوة
وكوباية شاى مع الصَفوة
وسماع سومة بتقول غِنوة
وشيشة وسحلب للفجرية
صباح الخير .. ياغربية
******
صباح النرجس والياسمين
ع الناس الحلوة اللى جايين
ع السيد البَدوى مِتجَمَعين
من كل كَفر ومن كل عِـذبة
من كل بَلَد بتلاقى أحبة
مرسومة ف عنيهُم رضا ومحبة
ذِكر وصلاة للصُبحية
صباح الخير ياغربية
******
صباح الصباح للشيخة صباح
وكل اللى جاى عليها وراح
وكل اللى صَلى وف قلبُة براح
وماشى مِروح شايل هِدية
صباح الخير ياغربية
******
صباح الصباح على أحلى غيطان
بتنادى الفلاح فى كل آوان
تعالى بِفاسَك إروينى حنان
بِلِنى بعرقك أبقى عَفية
صباح الخير ياغربية
******
كلمات : يوسف أبو زينة
16 / 9 / 2011 م