عايز تموت ؟؟

عايز تموت؟؟...
مهداه إلي (ابن الرومى ، وعاطف عاشور)

عايز تموت؟؟...
ما تروح تموت
حيحصل أيه ؟؟ ...
ولا أى شيء
مانتكش أول حد مات
ولا آخر المعقود عليه
أمل النجاة
انت واحد عااااادي جدا
زي ملايين الخلايق
دُور الخواص ّ ما عدتش لايق تلعبه
طب قولى أيه يحصل كده لو قالوا مات؟
ولا أي شيء......
هيّـا يدوبك مصمصة حبة شفايف
جايز كمان تنزل عليك دمعة من عين الصديق
أيه يعني واحد عاش بريء؟
وبيدْعي بالخير للبشر
وف بحر حب الناس غريق
.........
أيه يعني مشحون بالمشاعر
في زمن بتتبرا البشر فيه منّها
أيه يعنى شاعر؟؟
حسّاس قوى ؟؟
عايز تكون الأرض جنة
يا عم فوووووق
وارجع من السكة الغلط
الجنة بس هناك تكون
واللى يقولك غير كده ..
قوله :كلامك دا البريء ...عين العبط
وفر دموعك ع البشر ... بطل هطل
وان مات أمل ...
شىء عادي جدا يا رفيق
طب ما انت ماتلك قبل دا مليون أمل
وخلاص بقيت عشرة طويلة مع الجراح
الصدمة فيه ...أقوي وأشد من اللى راح
بس الجراح هيا الجراح
رغم ان مافيش في الحياة نتفة أمل
بنكهة الأمل اللى لسه مكفنه
والقلب قاعد يندبه بآآآخر دماك
........
حتى الكلام استكتره
ولا تلاقيه استخسره
ويا ريتني قادر أعذره
ما انا اصلي لا يمكن اصدق انه مش غير البشر
أو ان احساسه الجميل من نص كلمة قولتها
فجأة انتحر ....
أو إنه ما يعرفش ايه يعني اما باب يبقي الوحيد اللى بيفتح على الحياه

فيقوم بعنف ويقفله .....
ويسنكره
ويرجعك لليأس موت
والموت سكوت
ويسيب سعادتك بعدها جثة قتيل
مكتوب عليها
" دا حد عاش يحلم ...ومات "
عايز تموت؟؟...
موت من سكات

يا ميت اصحي صحصح فوق

عشان ارقد انا ف قبرك

تفاهة خلق طالعة لفوق

وألماسنا براه صبرك

حاجات متلخبطة لخابيط

وزين الناس... إمامه عبيط

كلاب تاكل لحوم اشراف

وانا مقضيها بيض وسميط