انتخابات الغابه !!!!!!!!!!!!!!

اليوم انتخابات الغابه
فيها أسود وفهود وأرانب
فيها زراف وحمير وديابه
وكل مرشح واقف يشرح
برنامجه لتطوير الغابه

*******

الأرنب من ورا نضاره
بيوعد وبكل جساره
هيحسن في رغيف العيش
ويزود بالجزر الجيش
علي أيده الغابه هتتغير
في المنطقه راح تبقي مهابه

**********

أما الديب هيجيب الخير
ويبدي مصلحة الغير
هيطور شكل التعليم
ولا يفضل في الغابه لئيم
هيصالح التعلب ع الأرنب
ويطبع علاقات الغابه

**********

وزرافه عماله تتمخطر
بتقول أنا فكري متطور
أنا هافرش شورعنا نجيله
وحفرها راح تبقي قليله
أنا هاعمل لمرورنا قانون
يمشي ويا قانون الغابه

***********

ومرشحنا التالي حمار!!!!!!!
ماشي بيرفص بالأفكار
هيخصخص شركتنا الكبري
ويبعها بالعمله الصعبه
هيصدر غازنا لأعدائنا
ويورد برسيم للغابه

**********

أما أسدنا فواثق أنه
في الحكم أساسي معاه أبنه
قال هبدأ برنامجي بكلمه
لو مره حيوان يعارضني
أو لسن علي عضمة أبني
راح أخليه عبره في الغابه

**********
أما الفهد بجد شجيع
بيقول يالا ع التطبيع
بيوزع منشور وينادي
فيه حل لكل المواضيع
المخنوق م الغابه يسافر
ويهاجر عن أرض الغابه

**********
وف لحظة اعلان الفايز
أتجمع سكان الغابه
الكل بيسأل متحير
مين راح يبقي ملك الغابه!!

واهو طالع من جحره الفار
ومعاه ورقه فيها قرار
أخترنا الأصلح ريسنا
وحبيبنا وروحنا وحارسنا
أي معارض هايروح رفسه
ماهو في الأصل ياخلق حمار
ماحمارنا بقي ملك الغابه

**********

بجعه سألت قرد كبير
قالت لأ ده بجد كتير
أزاي واحد أصله >< حمار
يبقي علينا ملك في الغابه!!
قال القرد وجواه ضيق
أكيد فيه لعب ف الصناديق
واللجنه الخاينه الكدابه
خانوا وباعوا وضحكوا علينا
بحمار عملوه ملك الغابه

يالا نقول ف الغابه <> كفايه
ونعارض قوانين الغابه
قالت بومه نسكت أحسن
يرمونا ف سجون الغابه
ويالا تعالوانحيي حمارنا
ما حمارنا بقي ملك الغابه !!!!!!

الاستاذ الشاعر

فارس القرشى

الكلام ده قبل ماتثور الغابه ويخلعوا الحمار والجحش .

ههههههههههههههههههههههههههههه

دلوقتى الغابه راح تختار صح لان تصرفات الحمار الاخيره

خليتهم يفوقوا . واغلب الظن حا يختاروا { تعلب مستأسد } علشان المرحله

اللى جايه محتاجه هيبة الاسد وفكر التعلب .

مودتى وتحيتى ...

أ/عادل عوض
هي بالفعل مكتوبه قبل الثوره ولكن أشعر أن البلد متجهه نحو تلك الجهه
فكل حزب يبحث عن السلطه وكأنها أصبحت غابه
شكرا لمرورك الكريم

ههههههههههههههه طبعن انا مش حرشح نفسي

مع ان يا اخي كان نفسي ابقي ريس انشاله يوم واحد

اعدمهم وامشي .. لاكن اديك قفلت الصناديق .. ياله مالناش نصيب

رمضان كريم

الشاعر الاخ الكريم فارس القرشي

ذكرتني بقصيدة لي اسمها مفاوضات منشورة هنا علي المنتدي

جميل وصفك الحيواني لحالة ما قبل الثورة

القصيدة بها حرفية كبيرة في استخدام الحيوانات كرموز افادت ما اردت

ارساله من معاني .. وان كانت المقاطع التي انتهت جميعها بكلمة ( الغابة )

لم تكن متماثلة ولو كانت لأعطت القصيدة جمال علي جمالها

أحييك علي عملك الجميل وأسمح لي بتنسقها كنموذج جميل لاشعار ما قبل الثورة

كل عام وأنت بألف خير

خالص التقدير والاعجاب

احيييك اخى فارس على عملك الجميل وكل عام وانت بخير تحياتى

الشاعر الأستاذ / فارس القرشي
عمل رمزي جميل ولكن هل الحمار مازال يحكم الغابه؟؟

م/عطيه
شكرا لمرورك الكريم
وأتمني بالطبع الا ترشح نفسك في هذا التوقيت
ليس لأنها لاتزال غابه ولكن لأن الحمل ثقيل جدا
واللهم ولي من يصلح

أ/ محمود جمعه
أولا أنا أسمي فارس وليس فايز
ثانياأشكرك علي التعليق الراقي والملاحظات الهامه والتنسيق الذي لازلت لا أعرف لغزه
كل عام وأنت بخير وسعاده

الشاعر حمدي شيبه
شكرا لمرورك الكريم دوما تسعدني بأطلالتك الراقيه.........دمت ودامت المحبه

أ/محمد البهنساوي
أشكرك علي أهتمامك بالمرور علي أعمالي المتواضعه
وأتمني الا نحيا في غابه مره أخري وان قدر لنا ذلك الا يحكمنا حمار
كل عام وأنت بخير وسعاده

الأخ الكريم الشاعر فارس القرشي

تم تصحيح الاسم وأعتذر للخطأ غير المقصود ..الموضوع اني غيرت اللابتوب

وجيبت ماك ..فبعض الاحرف آختلف وايدي واخدة علي الاحرف القديمة ..

كل عام وآنت بخير

أ/محمود جمعه
مبروك اللاب توب الجديد
وكل عام وأنت بخير

» حكومة الغابه
» حكومة الغابه
» انتخابات يابطيخ ..!
» انتخابات جمعية المؤلفين والملحنين والناشرين
» من وحى انتخابات البرلمان الجديد