إبداع

زهقت م الإبداع

وكرهت تدوينه

كأنى ندل وباع

كافة محبينه

خلاص حرقت الورق

وكسرت أقلامى

ونسيت سنين الأدب

وساعاتى وايامى

الحبر لونه بهت

والمعنى مش واضح

والفكر منى شرد

والعقل مش راجح

أكبت جماح الألم؟

مش لاقية له مالكة

ممكن يفيد الندم؟

نيتنا مش سالكة

مفيش جواب منطقى

بيجيب على سؤالى

آدى ياناس علتى

وادى ياناس حالى

الحل مش ف القلم

ولا ف الكلام مرصوص

الحل فى عرفنا

وبالقانون منصوص

مادام داهو رأيهم

أقول لمين وإزاى؟

رميت خلاص القلم

وح أشتريلى ناى

يمكن كلام الغُنا

بالحزن يتكلم

ويكونلى حق الشجن

والحق أتألم

يامجتمع والبشر

فيك مقسومين نصين

النص قال كلمته

والنص مش سامعين

باشكى إليك علتى

والعلة قهرانى

رميت كمان فُرشتى

عمرى مااعود تانى

منى سليمان