الحلم مايغنيش عن واقع

ورقه قديمه



وقلم مقصوف



ودموع بايته من إمبارح



بتدور علي مطرح غير جوا عنيك



وبواقي تمرّد عـ الحالي



د إذا كان الحالي كمان ليك



بتدوّر علي نَصّ يفضي



كل الأحاسيس المركونه



واللي خلاص ممكن تفسد



وريحتها تبين إنك



أخر واحد في الصف



مع إنك شوفت الناس



متعلّم علي ذكراها



إلاّ إنك شوفتها فرصه



كـ حاجه بتعملها شبههم



..

إحساس بشجاعه مصدّي



بتفوح ريحته من الدرج



صورتي وأنا ماسك إيدها



وبعدّيها علي جرح



كان لسّه يادوب ملحوم



ولا خفتش تفتحه تاني



..

غنوه بتدندن فيها



ده لأنك محفظتش غيرها



بحبك لأنك عيون



بحبك لأنك ضياء



بحبك كأنك أماني





..



إحساس تنميلة إيدك



من طول ركنتها عـ خدّك



واللهفة الفاقعة فـ عينك



من بعد منالك عنّك





..



كوباية شاي إتكسرت



ولا فاضل منها إلا إنت



وعلامة في عضمة رجلك



مطرح مـ الأهة إزرقّت



..



نضارة بعدسات نادر



لمّا تشوف بيها مشاهد



غير لمّا بتتعاد من تاني





..



في حد بينده .. جايز

!



في خطوة بتشيل حاجز



مقدرتش تمسك قلمك



ورميته مابين رجليها



كات ناعمه أكتر مـ البسمه



والنغزه بتحضن خد



مقدرش العمر يعلّم



ويسيب شخبطته عليه



تتنفس وتعيد الكرّه



أكتر مـ المره بمره



بتسيّب جسمك هيّا



بتحاول تملك جسمك



بترد جوارحك عِندك



وتقولك جيمك أوفر



تتجمع فكره فـ بالك



لو لمست عينك شوقها



مالهاش لازمه الكتابات



إحساس بشجاعه مصدّي



إتبيض من نهديها



والغنوه اللي بتندندن



سبتها تسرح في عنيها



تنميلة إيدك حتي



إستقوت إيدك لمّا



لمست النسمه البارده



الخارجه مابين شفتيها



الجرح المفتوح فيك



شعرها لحمه وبرقه



وصممت تسيب نضّارتك



وتعيش كادرين في النشوه



واحد .. والتاني بـ بلاي باك



وتخطي بخوف جواها



وتعيش بإيدين جناحين



في عنيها بيغمي عليك



وتفوق تحضن دراعيك



لا الحلم غناك عن واقع



ولا واقع يملي عنيك



النص يموت جوّاك



وحروفه ما ترضي عليك