مين اللي واجب يعتذر ؟

مين اللي واجب يعتذر؟.
ويقول أنا آسف على حق البشر.
ويقول خلاص
آسف لكم
وماعدتش اعمل فهلوي
وفاهم نور.
مين اللي واجب يعتذر؟.
ــــــــــــــــ
سرق الحمار والبردعة.
نشف حيضان المزرعة.
والساقية واتردمت تراب
وكسر فـ ناسه المجدعة.
المزرعة.
والساقية ولا المجدعة.
ولا الحمار والبردعة.
هما اللي يعتذروا ولا
اللي عمل ناظر لعزبة حينا
من غير نظر.
مين اللي واجب يعتذر؟.
ــــــــــــــــ
وحط اعلامنا المعلم
للغباء والمسخرة.
وملوه نفاق لما اتهرى.
والحر لو قال كلمته
دا إن سابوه
وروحه هربت م العذاب والفرفرة.
ويطلعوا له عين أبوه
يصبح ورا.
بين البهايم والبقر.
مين اللي واجب يعتذر؟.
ــــــــــــــــ
كل اللي يخلص للوطن
كان يحبسه.
واللي يحوش للزمن
بيفلسه.
وكلاب نفاقه يهوهوا ويألسوا.
وولاده ياخدوا اللي اتعرق
في ايدين ولادنا الشقيانين
والخير يرخ على "الحبايب" كالمطر.
مين اللي واجب يعتذر؟.
ــــــــــــــــ
صدع دماغ اللي جابونا "بالخطر".
كل اللي يعبد ربنا
ده اكيد عميل ارهابي
لازم يتحظر.

واللي يصيع فنان كبير.
واللي يبيع دا ملوش نظير.
واللي يحشش مليونير.
انك تصون مرة كرامتك
تحتقر.
مين اللي واجب يعتذر؟.
ــــــــــــــــ
قال ان بهايمكم خلاص
ما بقتش تنفع تتحلب.
طب نعمل ايه: قلنا بادب.
ايه الغرض.
قال يلا بيع يا "عبيد"
ويا "خطاب" ويا "بطرس"
و"محي الدين"
وباقي الهليبية.
عملوا بلدنا مهلبية.
من غير ما ياخد رأينا
باعها وقبض
دمع المصانع والديار.
ولا الدولار اللي اتقبض.
هما اللي يعتذروا ولا
أهل السياسة والنظر.
مين اللي واجب يعتذر؟.
ــــــــــــــــ
فوق ألف واحد يغرقوا
قالوا لنا دا بحر وغدر.
طب قطر هايل يتحرق.
قالوا القدر.
وازاي شباب كالورد
عاوز يشتغل
يغرق ف بحر الوهم
يا مليون خسارة.
قالوا الطمع
والعمر مكتوب
عمر ما ينفع حذر.
ناس غرقانين.
والمحروقين.
هم اللي يعتذروا ولا
مين اللي واجب يعتذر؟.
ــــــــــــــــ
واما الولاد
صحيوا وقالوا يلا نتحاسب خلاص.
مابقاش فيه خوف أو مناص.
طلق كلابه السعرانين
ياكلوا الوطن.
ويعطلوا ساعة الزمن.
وطلق حمير
وطلق جمال.
وطلق بهايم مفترية وحوش
تعض ما تتكسف أو تنتظر.
مين اللي واجب يعتذر؟.
ــــــــــــــــ
غسلوا دماغك يا ابني ولا قبضوك.
ولا بسنجهم خوفوك.
اسأل كبيرك أو أبوك.
مين اللي واجب يعتذر.
ــــــــــــــــ
وماهوش ولي.
وماهوش نبي.
ازاي تقول آسف
لواحد لولبي.
بيلف في كل اتجاه
الا اتجاه شعبه الأبي.
غرق سفايني
ومركبي.
.......
كيف انت مصري وكيف أبي.
ملعون أبو الفهم الغبي.

الشاعر الجميل

الحسن عباس

الله عليك وجميل ما خطت يداك .

قصيده جاءت لترد على من قالوا واجب علينا الاعتذار

معلش نعتذر للسارق والبائع لكنوز مصر وناهب ارض الوطن

وبائع الغاز لاسرائيل وبائع قضايا الوطن وقاتل شبابه فى البحر

والبر . من حقق اكبر نسبه للبطاله والعنوسه فى تاريخ مصر .

من باع القطاع العام وشرد ملايين الاسر .

اشكرك اخى على نصك الجميل .

مودتى وتحياتى ...

الشاعر الجميل

الحسن عباس

الله عليك وجميل ما خطت يداك .

قصيده جاءت لترد على من قالوا واجب علينا الاعتذار

معلش نعتذر للسارق والبائع لكنوز مصر وناهب ارض الوطن

وبائع الغاز لاسرائيل وبائع قضايا الوطن وقاتل شبابه فى البحر

والبر . من حقق اكبر نسبه للبطاله والعنوسه فى تاريخ مصر .

من باع القطاع العام وشرد ملايين الاسر .

اشكرك اخى على نصك الجميل .

مودتى وتحياتى ...

المهذب الكريم المحترم
المبدع الأستاذ / عادل عوض سند
أسعدني مروركم البهي
وكلامكم العطر الندي
وتعليقكم الشجي
شكرا جزيلا

الشاعر الحبيب / عاطف الجندي
سعدنا بمروركم
وابهجنا ترحيبكم

دمتم في سماء الألق

تُثبت بواسطتى

تقديراّ للشعر والشاعر ...