وداعا شفيق سلوم

وداعا شفيق سلوم
في هدوء تام يخالف حياته الشعرية الصاخبة رحل عن عالمنا شاعر مبدع كبير ومدرسة شعرية مقاومة متميزة وقامة من الصعب أن نجد مثلها ، رحل الساخر الباكي والقلم الحر الجريء رحل شفيق سلوم0
ورغم ما قاسيته من حزن وألم عند سماعي الخبر لكن سعادتي لا توصف ، فالذي لا يعرفه احد أنه عندما كتب قصيدته الثورة بدأت من تونس وأملاها على لنشرها قال ( ربنا هيدينى العمر لما أشوف الثورة في مصر يا واد يا ناصر ؟) وكان وقتها يعانى آلام المرض – وشاء الله تعالى أن يقر عين شفيق سلوم بالثورة في مصر ويسعده برؤية من حاربهم دهرا في أشعاره وهم يتساقطون 0
رحم الله شفيق سلوم رحمة واسعة ولا أملك له سوى الدعاء ونشر بعض المختارات من أشعاره التي تخلد ذكراه العطرة وسوف أقوم قريبا برفع تسجيل نادر بصوته إن شاء الله0
1
أحلف بإسم الجلاله وبالقلم واللوح
واحلف بطه النبى واحلف بعيسى ونوح
واحلف بسورة الضحى والزلزله والعصر
هانطق أقول مصر
في ساعة طلوع الروح
2
أنا اللى عاشق ترابك فى النازله والطالعه
وانا اللى باكل حلال وما كلتهاش والعه
جلدى بلون حنطتك عمرى ما غيرته
ولا عمرى هانسى فى يوم التوته والترعه
انا اللى عاشق ترابك فى الفرح والضيق
وانا اللى فى الشده خدتينى طريق ورفيق
ولما سابوا الولاد الجرن والغله
بقيت انام م العشا 00 احلم بصحن دقيق

3
قى الغربه مالى وطن
وف وطنى عشت غريب
وانا اللى وقت المحن
كلبشت ما رضيت اسيب
وشلت روحى على كفى وانا صايم
لكن فى وقت الغنايم
ما كنش لى نصيب
4
مره اشوفك حر وشرد
ومره اشوفك ساقعه وبرد
ومره الآقيكى واقفه جريئه
ومره الاقيكى سفينه غريقه
ولما بيحصل فيكى حريقه
اضحك واقول دا بسبب الجرد
5
حصان فى ساحة السبق راهنوا السكارى عليه
لا حد عنه سبق ولا حد عدى عليه
وحظه خانه فى يوم ما اتكعبلت رجليه
ادوا له طلقه وقع ما حد سمى عليه
6
فيه ناس بتسعد لسعدى
وناس تسبب صداعى
وناس تشوفها يا وعدى
وناس تكسر شراعى
وناس مراكبها سايره
وناس تنشف مراعى
وناس مع الديب بتاكل
وتبكى مع كل راعى

7
مين اللى خزم الوطن ومين سبب قهره
مين اللى جاب له الكفن ومين دفع مهره
إقرا تاريخ العروبه00 قديمه وجديده
هات لى رئيس او ملك
ما طلعشى على ضهره
8
إملالى كاس يا وطن بالمر تانى املا
سقطوا العرب فى الحساب والنحو والإملا
ونجحوا فى ( الصرف ) لحد ما ضاعت العمله
دايما يقولوا اننا كنا وكان ياما كان
السيف وقع من إيديهم والفرس حرنان
أجادوا لعب الورق وامتازوا فى ( الكون كان )
وجوم فى يوم الامتحان ما كونوش جمله
9
يا ابو نضاره سوده اخلعها
واحيا حياتك ثانيه بثانيه
واكتب غنوه يكون مطلعها
مصر هتفضل أم الدنيا

رحم الله الشاعر الكبير شفيق سلوم وادخله فسيح جناته
والله يا استاذ ناصر
الناس العمالقه دول صعب تكرارهم تاني والواحد بيحزن جدا على رحيلهم
ربنا يتغمدهم برحمته يا رب ويدخلهم فسيح جناته
تحياتى واعجابي أخي

العزيزان
رضا عثمان وعادل سند
شكر الله لكما ورحم عمنا الكبير شفيق سلوم

الكبير / ناصر صلاح
اللهم الحق شاعرنا الكبير شفيق سلوم بالفردوس الاعلى ولكن ليا سؤال يااستاذ ناصر
فيه ناس تسعد لسعدى
وناس تسبب صداعى
هل انت متأكد انها لشفيق سلوم رحمه الله لقد قرأت هذا المربع من قبل فى كتاب الواو لعبد الستار سليم ارجو ان توفينى بالاجابة ...دمت لى ياصديقى

البقاء لله

لا اله الا الله
انا لله وانا اليه راجعون
رحم الله اخينا واسكنه فسيح جناته
والهم اله الصبر و السلوان
انا لله وانا اليه راجعون

اللهم آمين
شكرا شاعرنا الكبير : رأفت المصرى
لمواساتك ودعواتك الطيبة

رحم الله شاعرنا الكبير الشاعر شفيق سلوم فقد عاش مناضلا كان سيفا علي قوب الخانعين والعابثين بمقدرات مصرنا الحبيبة كان فريا في حرفه وقدرة فائقة علي صياغته اللهم اسكنه فسيح جناته

البقاء لله
الشاعر ناصر صلاح
لاتحزن فلسوف نلقي نفس المصير
ولله الأمر من قبل ومن بعد

رحمه الله و أسكنه فسيح جناته