حوار مع الشيطان

حوار مع الشيطان

طول عمري عايش في الحياة زى البهيم

أكل وأشرب وأرتوي بثقافة م النوع الغشيم

وعشان قريت لي كلمتين في كتاب قديم

فكرت إني بقيت زعيم

كانت ثقافتي إن الشيطان هو السبب في إيلى إحنا فيه

نسرق وننهب نختلس يبقى الشيطان الله يجازيه

نكدب ونضحك ع الشرف هو الشيطان اخيه عليه

والبنت شتمت أمها

ماشية بتعرض لحمها

مش لاقيه حد يلمها

وفين أبوها وعمها

هو الشيطان

والمجرمين سرقوا البلد

أخدوا فلوس من غير عدد

حرقوا الأدلة والسند

هو الشيطان

دلوني على سكة شيطان أعمل أنا وياه حوار

ومستعد للقاء في حارة أو في أي غار
قلوبنا نارها مشعللة وعيونا بتطلع شرار

قالولى روح له في الترب ونادى براحة علية

وخد زيارة مكلفة وحطها مابين اديه

لازم كمان تستعطفة وتقول له يا باشا ويا بيه

أنا جه في بالى كام سؤال

معرفش ليه حسيت بمعنى الاحتلال

وعقلي قام فكر وقال

هو الشيطان بيرتشى

ويحب لبس الشفتشى

وكمان ننادية بالإشى

يا ناس حرام

فقدنا معنى الاحترام

حتى الشيطان عشان نقوله قام سؤال لازم نبادله بالغرام

ساعات بيسرح فكرنا ويكون شريد

هما الغلابة جنسهم من نوع جديد

الكل خايف مننا ويروح بعيد

وليه قلوب ناس م البشر زى الحديد

تصدى وتعدى الحدود وساعات تزيد

وألا إحنا من النوع البليد
فكر الكبار غير فكرنا وفكرهم من نوع فريد

وألا إحنا في الزمن البعيد

زمن الموالى والعبيد

وفى يوم غريب والحصله كانت ضيقة

ومرارتي كانت للهموم متشوقة

خلاص يا ناس أنا تعبت من الشقا

مخنوق وكانى رايح مشنقة

شفت الشيطان بسنان طويلة مفرقة

قالي عاو زنى في حوار يا أبو العيون مبرقه

ابدأ حوارك وبلاش أمور السفلقة

حكايتك ايه ويا البشر

وليه مابينا بتنحشر

ضحك الشيطان هز المكان قال يا غبي

انتم حصادى وزرعتى هدفي الكبير ومأربي

بيني وبينكم تار قديم من عهد أدم النبي

إللى انتوا فيه مش صنعنا

دي حاجة أكبر مننا

لاهي قدنا ولا حجمنا

شيطانها من نوع البشر دمه غريب عن دمنا

علم البشر فاق علمنا

والنهب في الشعب الضعيف والله دا ماهو شغلنا

إحنا بنعرض ع البشر عروض تجارى حلمهم

يعنى بحبة فرفشة عشان يسلوا همهم

عشان يداووا جرحهم

تقبل ما تقبلشى أنت حر

لو تستعيذ أنا راح أفر

وإياك تقول إن الشيطان هو إللى بيشربنا مر

في المر انتوا من زمان

شربينه في أواني وكيسان

شربينه من غير الشيطان

وأنا هسبت إننا مظلومين

من غيرنا أنتوا مفسدين

إحنا في الشهر الكريم متقيدين

لا نروح شمال لا نروح يمين

بتقعدوا من غير فساد

والأمن بيسود البلاد

ولا الحياة من غير سواد

مليت أنا من وضعكم من طبعكم من كدبكم

زى السمك عايشين بتا كلوا في بعضكم

أدى القوى داس ع الضعيف

ويحاربه في أكل الرغيف

وازى يعيش بينكم شريف

جنس الشيطان أصبح بيعاني منكم

بقى عندنا أزمة بطالة في أرضكم

وبقينا نتمنى إننا ننهل وناخد علمكم

سبتولنا ايه راح نعمله

والجرح مين هيدمله

مشوارنا مين هيكمله

أنا قلت له ياه يا شيطان

حقيقي مليان بالحنان

أنا كنت ظالمك من زمان

إللى إحنا فيه دا شيطان بشر

هو تفيرس وانتشر

وحتى في النفس انحشر

صدق الشيطان هذا اللئيم

لما وصفني بالبهيم
لازم نغير نظرتي ونطوى علم كتاب قديم القديم