عاش الجيل الصاعد- مهداه لأبطال ثورة 25 يناير من الشباب

عاش الجــيل الصاعد ... عاش
جيل من شعب مجاهد .... عاش
عاش يبني ويجاهد عاش بكفاحه الخالد
راجل واحد مبدأ واحد
عاش جيل ثورتنا عاش

عاش الجندي يوم ما حطم شوكة الإسـتعمار
كان عنوان النصر الثوري في كل بلد أحرار
وسـمعناه بيقولها قوية باسم مبادئ أمة أبيّة
أنا خط هجوم ودفاع أنا رمز سلام وصراع
أفدي بالروح وأعيش في النصر بطل وشجاع
حيوا معاي قولوا معايا
عاش الجندي العربي عاش

عاش الزارع يوم الشمس ما حست بيها عينيّ
فرشت نورها وكبر الزرع وهو مداري عليّ
وسمعناه بيقولها قوية أرض ولادي ورجعت ليّ
حرمونا سنين وســــنين وافتكروا الناس نايمين
وطلعنا عليهم يوم خلصنا حقوق ملايين
حيوا معاي قولوا معاي
عاش فلاح الثورة عاش

عاش الفن حضارة لأمة يبنيها الفنان
يروي حياتها في غنوة في كلمة
في صورة بروح وإيمان
وســمعناه بيقولها قوية مجد بلادي عهد علي
قلبي وروحي ملك لفني والإتنين لبلادي هدية
حيوا معاي قولوا معاي
عاش الفن رسالة عاش

عاش العامل يوم ما فكر يبني لبلده دار
فيها مداخن طالع منها لهب النور والنار
وسمعناه بيقولها قوية
ده إنتاجي وصنع إيدي
حققنا بعون الله للشعب دعاه ومناه
والخير زاد منا وفاض والفايض صدرناه
قولوا معاي حيوا معاي
عاش عاش العامل عاش

عاش الطالب يوم ما طلب العلم كتاب وسلاح
عرف العلم وســـــيلة تحقق غــــاية كل نجاح
وســـمعناه بيقولها قوية
في الإعدادي وفي الكلية
العلم ســـــــلاح جبار بيحول ليلنا نهار
يسعى للنور بالنور ويواجه النار بالنار

عاش الشعب العربي كله شعب سلام وأمان
عاش الوعي العربي كله ثورة في كل مكان
ثورة مـــارد للحرية
هب ونادى بالقومية
ردينا عليك يا جمال وإيدينا ف إيديك يا جمال
وطلعنا معاك يا جمال نبني وياك يا جمال
حيوا معاي قولوا معاي
عاش عبد الناصر عاش

طبعاً الأغنية يعرفها أبناء جيلي .. وهي في منتصف الستينيات

ولكن ماأشبه الأمس باليوم ياأبطال 25 يناير

وإن كان ماحققتموه تفوق على كل الأجيال في تاريخ مصر

المعاصر والغير معاصر

والله رجعتنى خمسه واربعين سنه ورا ..

الاخ الحبيب الشاعر

طارق منيب

تلك الاغنيه والتى تغنى بها اكثر من ستة مطربين ومطربات .

لهى الاجدر بالفعل ان تذاع تلك الايام .

كانت ايام تمن المصرى فيها كان غالى قوى ..

اشكرك اخى طارق على منقولك الرائع .

مودتى وتحيتى ...

عدولة

لي عودة .. لو ركزت على الأجزاء المكتوبة بالأزرق حتشعر أنها مكتوبة لثورة

25 يناير

طارق منيب كتب:: عدولة

لي عودة .. لو ركزت على الأجزاء المكتوبة بالأزرق حتشعر أنها مكتوبة لثورة

25 يناير

معلش .. تصدق ما كنتش واخد بالى .

والله برافو عليك وكأنك وظفتها للاحداث الجاريه .

احييك مرة ثانيه على رؤيتك الثاقبه ...

الكبير قووووووووووووووووى

طارق باشا منيب كتب عاش الجيل

الصاعد فكرنا بالزمن الجميل

بس بصراحه ياباشا هناك فرق !!

ردينا عليك يا جمال

وإيدينا ف إيديك يا جمال

وطلعنا معاك يا جمال

نبني وياك يا جمال

حيوا معايا قولوا معايا

عاش عبد الناصر عاش

فرق كبير قوى ياحبيبى

بين (جمال) زمان ، و(جمال)

دلوقتى !! مش كل الجمال طبعا

جمال زمان قاد (الثوره) للتحرير

أما جمال دلوقتى ....

قاد (الجِمال) للتحرير!!!

هناك فرق شاسع.. مش كده ولا إييييييه!!

أبدعت ياصديقى ياصاحب الأفكار المتجدده

دائما .

دمت بكل خير وتقبل تحياتى

محمد البسيونى

أخي الحبيب الكبير الأستاذ/ محمد البسيوني

توقعت دخولك على هذا الموضوع.. ومتوقع دخول كل أبناء جيلي واللي أكبر مني سناً مثلك....

في كل الأحاديث اللي تطرقت لسلبيات عبد الناصر ( مثل تعذيب الإخوان والتنكيل بهم) ونكسة 67 و.... و.... لم يستطيع فرد واحد أن يتطرق لذمته المالية.. ولن يستطيع أحد أن ينكر دوره في تحقيق العدالة الاجتماعية وانحيازه للفقراء

أما الطفل المعجزة جيمي مبارك .. أقول أيه حرام نبدد طاقتنا في الحديث عنه.. شكراً لمرورك وإلى اللقاء في صوت الجماهير وأنا حانزلها بعدين ويمكن النهاردة

خالص تقديري لمرورك الجميل

والله ياأستاذنا انا سمعت الاغنيه دي قبل كده كتير بس المره دي لما قرأتها عشت معاها جدا وكأنى اول مره اعرفها بصراحه انت اللي تعيش وتسلم للاختيار الموفق زادك الله وحباك وحماك لاهلك وبلدك تقبل مودتى ودمت بخير

محمد بديوى كتب:: والله ياأستاذنا انا سمعت الاغنيه دي قبل كده كتير بس المره دي لما قرأتها عشت معاها جدا وكأنى اول مره اعرفها بصراحه انت اللي تعيش وتسلم للاختيار الموفق زادك الله وحباك وحماك لاهلك وبلدك تقبل مودتى ودمت بخير

عشت ياأستاذ/ محمد وعاش جيلك الجميل اللي حسسنا اننا ولاحاجة وإن إحنا الصغار

وأنتم الكبار

» خالد الطاهر مربعات واو وقصيدة مهداه الى ثورة 25 يناير
» بيان ثورة 23 يوليو وأوجه التشابه مع ظروف ثورة 25 يناير
» عانس وعاجز "حكاية الجيل الصاعد "
» شِعارات ثورة 25 يناير
» من الهام ثورة يناير