ستاد مصر

بسم الله الرحمن الرحيم

ستاد مصر

قرب واسمع واضحك وادمع
اخر حصريات العصر
حاجة تخلى نافوخك يلسع
همك يخلع فى ستاد مصر
ماتش يا عالم كان متأجل
يجى من 30 سنة متساب
بس خلاص الحال اتبدل
وهنلعب ونصفى حساب
اول نقطة ضعف يا سادة
ان حكمنا ف ماتش اليوم
متحيز وبحكم العادة
للاشرار ودا شىء مفهوم
اسمه حبيب مع انه يا سامع
عمره ف ليلة ما كان محبوب
قرنى وخسه وندل وتابع
والشعب عليه كده مغصوب
سيده رزانا بسحنة أمه
لجل يحزمله الماتشات
وينكد ع الشعب يغمه
ويزبطله الانتخابات
بس ان شا لله مش راح يفرق
وهنطلع بردك فايزين
لكن قبل الماتش ميبداء
لازم تعرفوا مين مع مين
مبارتنا الليلة يا حبايب
بينا وبين المنتفعين
شعبنا جى الليلة يلاعب
حزب الكذب عديم الدين
تشكيلة اولادنا قديمة
ومعروفة لجميع الناس
حبه صعايدة وحبة بحاروة
فيهم طيبة وروح وحماس
اما الفرقة التانية ياسادة
ربنا يلطف كده ويعين
فرقة يا خلق متتسماش
بسنان سودة بلون الطين
أسوائهم هو مدربهم
{حس حس} رمزالمنحلين
لما تشوفه تحس بنفضة
يرجف دمك فى الشرايين
قاعد فوق الكرسى مأنتخ
وعليه شكل بشع وشنيع
محشى فساد منفوخ ومتختخ
صاحب فلسفة الترويع
اكبر انجاز ليه فى بلادنا
بيع املاكنا مع التطبيع
رائد مذهب هلب تكسب
عبى وخبى وهرتل صيع
وفريقه كده من عينته
زى ما هنشوف بالتفصيل
يلا معايا نسمى و نبداء
من غير اسهاب او تطويل
سنتروا هما وخد كبتنهم
المحروس من عينا {جمال}
لم ولادنا وطلع منهم
غزل فينا يمين وشمال
شال احلامنا كده وامالنا
وفضل فترة ينطط فيها
يرفعها كده ويشأ لطها
وبعزم ما فيه يروح مديها
حبه وجه كده جنبه خازوق
طوله يفوق كل التوصيف
راح مباصيله الكورة وقال له
روح بقى هات لنا جون يا {نظيف}
عنها {نظيف} الوحش الدامى
بقى فرحان كدهو وهيطير
قال والله د عطف وسامى
ما يجيش غير من نطع كبير
راح متعازم شايط شوطه
فيها الغل ماليها جنون
بس لكرم المولى تعالى
فاتت كده من جنب الجون
رحنا لعبنا ضربة مرمى
نزلت كدهو ف نص الملعب
بس لان {رشيد} الفاجر
كان متربص زى التعلب
فط ونط بسرعة غريبة
سرق الكورة من وسطينا
وبسرعة ومهارة عجيبة
بعد ما عدى ورقص فينا
راح داخل كده ع الصندوق
ولقى {جمال} واقف وحديه
صرخ الكوتش بصوت من برة
يلا بسرعة يا بقرة اديه
خدها {جمال}ونوى انه يشوط
بس لحكمة كده الاهيه
استيك شرطه راح مفروط
وسقط منه ع الارضية
عنها وصوت الضحك يا سادة
عم وغطا ف كل مكان
حس الجمهور كده بسعادة
كانت تايه بقلها زمان
عنها وصرخ الكوتش قوام
فين {العادلى} بيعمل ايه
رد بتتنيح واستفهام
يعنى امسكلو الشرط يا بيه !!
قال له الكوتش انت هتستهبل
هو انا جيبك اصلا ليه
اجرى بسرعة قوام يا منيل
فض الهيصة دى من حواليه
عنها ونادى {العادلى} فريقنا
وعطى كروت اشكال والوان
وأما اعترضوا بحدة اولادنا
راح مديله بلنتى كمان
ودخل واحد لجل يشوطها
حاوى وغاوى يرد بيبان
يحجب نور الشمس يا بلدى
يسرق احلام الغلبان
يستكتر ع الفقرا اللقمة
مع انه فى خيرهم بيعوم
سو وعو عديم الرحمة
وما يخشاش دعوة مظلوم
واهو شاطها واتنيل سجل
و فضل يرقص قال ويهز
وفريقة بيهتف ويجلجل
تسلم رجلك يا ض يابو{ عز}
لسة يدوبك كده بنسنتر
وجمال بقى يصرخ متغاظ
قال دى بتعتى و روحوا هاتوها
لحسن اولع فيكوا بجاز
قال له سى صفوت سيبنى عليها
وأنا ادوب لك عند دماغها
وأخليها تجيلك زاحفة
وانا عارضت راح اجيبلك داغها
قال له جمال كده باستغراب
انت بتتكلم عن مين !!!!
انا كان قصدى تجيبوا الكورة
راح تفضحنا يا زفت الطين!!!!!
هي ثوانى وأخدو الكورة
و المغربى كدهو تلقاها
راح مباصيها لفتحى سرور
وسرور دغرى لعزمى بصاها
هات مع خد عزمى مع سرور
حنكة وخبرة فى كل شرور
اما دويتوا يا خلق عجيب
كله مأسى وظلم و زور
ولحد الوقت يا سامعين
فرقتنا كانوا مشاهدين
بس فى لحظة يا سادة انتفضوا
كملايكة ووقعوا ف شياطين
انكش واعكش رجل وراس
اجرى وعدى ورقص فوت
صبح الكوتش اياه محتاس
ومن الفرسة خلاص هيموت
اهبد زكريا وفوت منه
وافقع فتحى سرور شلوت
اكفى سى صفوت كده على سنه
خلى جمال يصبح منقوط
سجل جون واتنين وتلاتة
خلى رشيد يولع ويقيد
عدى وكمل فوت واتحمل
وأقطع منهم رجل وأيد
حب العدلى كده يتدخل
ويصفر ببرود وحقارة
لكن خد مقلب واتشنكل
واتنيل بلع الصفارة
وخلاص الوقت بيسرقهم
وهيطلعوا فعلا بهزيمة
بس استنوا كمان انا شايف
حاجة جديدة بجد عظيمة
الجمهور اللى قضى حياته
يتفرج ويبات مقهور
اتمرد على كل جيناته
وقرر انه يكون ليه دور
صبح الملعب شكله جميل
والجمهور كطيور ابابيل
تحدف غيظها وغلها طوب
وتصيب ايها ندل عويل
لم فريق حس حس اشلائه
واتسحب بره الستاد
واهو راح عهده بكل غبائه
والله برافو عليكوا يا ولاد
بس انتبهوا كده واحترسوا
من رد الفعل البطال
اصل فريقهم ليه ميت سكة
سافل ومنافق محتال
ممكن يسرقوا كده فرحتنا
ويورونا كتير اهوال
وعشان نتصدلهم لازم
تفضلوا فى لستاد يا رجال

تمت

محمود قطب