ستاد العروبة

بسم الله الرحمن الرحيم



ستاد العروبة




من ستاد العروبة
مساء الخير وبعد
لليلتكوا ان شا لله بيضا
وحمرة زى الــــــــــــــــورد
الجو جو كورة
والليلة ليلة سعد
اليوم خريفى جميل
وربيعى حر وبرد
لستاد مليان قصادى
لكنه برضه فاضى
وزحمة مافيهش حد
من ستاد العروبة
مساء الخير وبعد
انا محسبكوا المذيع
بتأنى وع السريع
جى اسمعكوا كورة
واوصفها للجميع
جى فى معادى تمام
ودا فعلا مش ميعادى
وأحب اديكوا فكرة
عن المباراة الليلادى
اصل المباراة ياسادة
واحد قصاد اتنين
يعنى الفرق تلاتة
ما هماش فرقتين
واللعب مش بالكوره
اللعب بالقضيه
من بعد معدلوهـــــا
صبحت حلوة وطرية
تدى معاك وتاخد
تستحمل اى واحد
يشوطها شوطة جامدة
وبرجل تكون عفية
اللعب الليلة فعلا
يا سادة بالقضية
وان كنتوا هنا قاعدين
ويانا مشرفين
يبقى احنا كده فى النص
وهما شمال يمين
وان كنتوا مش معانا
يبقى انسوا يا جماعة
لان المباراة داهيا
م الاصل مهيش مذاعة
وفريقنا مفيهش خالد
ولا فيه عثمان وحمزه
واحنا كده وبصراحة
فى اللعبة دى تلامذة
لان فريقنا ناشىء
لساه قليل الحيلة
لكن كله على الله
يلا اسمعوا التشكيلة
فى حراسة المرمى واقف
العربى عب سلام
كمان هو المدافع
ومركزه قــــــــــدام
وفى ونجنا الشمال
و فى ونجنا اليمين
وبرضه خط النص
وكبير الهدافين
اما مدربنا هادى
غير اى مدربين
ع الخط مابيصرخش
لان العربى برضه
هو اللى عامل كوتش
وخلاص عدى التسخين
وميعاد الماتش الان
وراح التلت كباتن
لجناب امين العام
اسف جدا ياسادة
اقصد راحوا الكباتن
لقائد الحكـــــــــــــام
رمى بريزة القرعه
بلا اهتمام وبسرعة
حتى بدون ما يبص
راح قال لكبتنينهم
مبروك كسبتوا التص
على طول راحو مكانهم
وفريقنا جه فى النص
وقبل اللعب طبعا
وقفوا دقيقة حداد
بيقولوا فى قطة ماتت
فى حتة اسمها بغداد !!
وخلاص حكمنا صفر
والواد بتاعهم سنتر
وحاجات غريبة تحصل
ولا حد عايز يسئل
الكورة تكون معانا
وف ثانية تكون معاهم
واضح وباختصار
ان الحكم وياهم
كل الفولات علينا
ولا فيش فاول عليهم
وان جبنا اى حاجة
برضه محسوبة ليهم
وفات يجى نص ساعة
وفعلا يا جماعة
فاتت ولا فيها لعب
فاتت فى خناق وضرب
فاتت والحاله كرب
ويارب استر يارب
لان البعده فاقوا
وبيلعبوا بأنسجام
والواد ايهود بصاها
لابن عموا سام
ودا راح شيطها جامدة
فى العربى عب سلام
والعربى فضل يعيط
وقال ما اسموش كلام
اللعب يكون نضيف
دا حتى شىء حرام
وبعد شويه عدوو
العربى ابن عبدوو
عمل مشوار سريع
وكان حلو وفظيع
وشاطها شوطة جامدة
لكن فرقت بياردة
صفر حكمنا كرنر
العربى قعد يهلل
ويقول الله اكبر
اخيرا خت حاجة
اخيرا جالى كرنر
نادى عليه حكمنا
وعنيه مليانة حيرة
وقله ليه يا عربى
دماغك مش كبيرة ؟
الكرنر دا عليك
ولا كنش عمره ليك
وهنلعبه وانت راضى
وحاطط جنبك ايديك
وفعلا سكت العربى
وريتشر رفع الكرنر
وفى المنطقة شمعون
مستنى تجيله الرفعه
علشان يخبطها جون
والعربى واقف وفاهم
مع انه شكله نايم
وجرى يدخل عليه
لكنه برضه فاشل
عارفين السر ايه ؟
شمعون ابن القديمه
دب صباعه فى عنيه
والعربى تانى عيط
وكان صعبان عليه
ليه يبقى الكل ضده
وحكمنا لزومه ايه ؟
سمعه الحكم بودنه
بيتطاول عليه
راح فاقعه واحد احمر
و قال له اطلع بره
والماتش دا منتهى
هما اللى فازوا يلا
وخلصت المباراة
ياعينى يا ولداه
يميت خساره يابنى
ويميت يا حول الله
ويا سامعين الصوت
فى كل الدنيا ديه
من عنبر نمرة خمسة
ب سرايا العباسيه
نقلنا ماتش كورة
مجنونة م اللى هيا
ونشوفكم فى الاياب
فى المرات اللى جايه
بعد العشا فى الضهر
وسلام بقى باى باى
الباش حكيم بيمر


اطفى النور هناكــــــــــــــــــــــــ
نوممممممممممممممممممممممممممم


هههههههه

تمت
محمود قطب