قصيدة الاوله فى الغرام للشاعر محمد عبد الرازق زهيرى

الاوله فى الغرام

الاوله فى الغرام ورضعنا من صبرك
والتانيه فى الكلام وطهقنا من قهرك
والتالته فى المرام وشبابنا كان مهرك
***********
الاوله تلاتين من عمرك الصابر
والتانيه خمسه وعشرين كان يومك الثاير
والتالته فى التحرير كان نصرك الظافر
************
الاوله قلناله ارحل سلطوا الميه
والتانيه مات اللى مات فى شراسه علنيه
والتالته حتى الرصاص ماغير النيه
************
الاوله جمعة الحسم كانت للنظام زلزال
والتانيه يوم 11 هوه يوم ترحال
والتالته لسه باقى عصبته لاتزال
************
الاوله بالمجلس العسكرى حكمك وتصريفك
والتانيه الغينا شورتك ومجلس شعب تلاكيكك
والتالته غارت وزاره بتزرع فيكى مشاكيكك
*************
الاوله بيعدلوا الدستور تمهيد لتغييره
والتانيه الغينا فزاعة امن الدوله واساطيره
والتالته بيحاكموا كل انتهازى ذل جماهيره
****************
الاوله يابلد لابد ماتقومى
والتانيه ياولد بطل بقى لومى
والتالته ع الجلد لازم يكون دومى

الاستاذ الشاعر محمد عبد الرازق الزهيرى
احيك على هذه الزجليه الرائعه الاوله فى الغرام
التى تدل على انك شاعر تمتلك ادواتك وتجيد
الأمساك بزمام القصيده ولكن اخى محمد التمسك
بالقافيه كاد ان يضر القصيده فحاول ان تحرر منها
مع عدم تقسيم القصيده يعطيك مساحه للتحرر من
القافيه ثم العوده اليها مرة اخرى ولعل الاساتذه
عادل عوض والاستاذ عاطف الجندى يفيدوك
اكثر منى فلا يفتى ومالك فى المدينه واسف أخى
محمد لتدخلى ولكن لأنك شاعر جميل وتمتلك
الموهبه عز علىّ ان تفوتك هذه الأشياء البسيطه
التى كانت ستعطى القصيده رتم اسرع ارجوك
ان تغفر لى تدخلى
اخوك صلاح الكومى