موظف اداري " ما قبل الثورة"

موظف اداري انا موظف اداري
بلملم في خيبتي من الناس واداري
طحني الفقر ولا حد داري
وحلف ابن غالي يبيعني داري
من العيشة شوفت النجوم في نهاري
وقالها بن بدر ح يدينا كادر
فرحنا وقلنا يارب يا ساتر
سحبها بن غالي بقدرة قادر
وضيع املنا في منحة وكادر
وجارنا الكبابجي سي عبد القادر
يوماتي اروح لة اشمشم واغادر
واناجي المولي واقول انت اللي قادر
موظف اداري انا موظف اداري
بلملم في خيبتي من الناس واداري
حلمت آآكل عيالي كباب
لجل ما ينسوا العيشة الهباب
وينسوا يوم من ليالي العذاب
ولو حتي كانت لحمة كلاب
واجيب لعيالي رغيف كرشة ونفوس
بدل ما كانوا يآكلوا عيش بدون غموس
وحلمت اجوز ابني لاحلي عروس
وافوت ع الجزارة يوماتي واطوف
واحلم ليلاتي في بطني خروف
واتمني بن غالي بقدر الظروف
لناس غلابة خالص ويعمل المعروف
وقلت اسدد يا ناس الديون
و آعشي عيالي جبنة وزتون
وآجيب ربع لحمة وآخلل ليمون
آتاري كنت بحلم بشئ م الجنون
عملها بن غالي وجوع عيالي
وكأنة لدبحي قادر وناوي
تملي لأذانا دايما غاوي
عملها بن غالي عملها بن غالي
وشرد مراتي وشرد عيالي
موظف اداري انا موظف اداري
بلملم في خيبتي من الناس وآداري
عملها بن غالي وفقع لي المرارة
وينزل كلامة علينا بغارة
ودايما يحمل علينا الخسارة
ماهو ماعاشي مرة في بيت قديم وحارة
ولا عمرةغمس فول ولا بصارة
ولا عمر جوعة عمل في بطنة غارة
موظف اداري انا موظف اداري
بلملم في خيبني من الناس وآداري
*********************
وطبعا احنا خلصنا من الكابوس اللي اسمة بطرس غالي ودة كان حال موظف التربية والتعليم قبل الثورة ونتعشم ان تنصلح الحالة بعد الثورة

الاستاذه الشاعره سلوى سيد عبد العزيز
موظف ادارى (ماقبل الثوره) ومابعد الثوره
يعلمه الله وحده لست متشأما ولكنى أعتقد
ان العمليه سوف تحتاج الى وقت طويل
لأن شعبنا يحتاج الى حملة توعيه حتى
يعمل كل فى موقعه بجد واجتهاد ولاتنسى
ان ا لعوامل الخارجيه تؤثر على أقتصادنا
بالسلب ويارب اكون مخطىء اسف استاذه
سلوى لقد اخذنى الحديث وفاتنى ان احيكى
على هذه الرائعه
صلاح الكومى

اشكرك اختي عزة ولكن الموظف الاداري بتاع التربية والتعليم اكتر واحد انظلم
المدرسين اخدوا حقوقهم بزيادة 175% واعتبروا الموظف الاداري ابن البطة السودة
قالوا مش من حقة اي زيادة فأضطررت اكتب هذة القصيدة من غلبي لاني موظف اداري علي الدرجة الاولي ومع ذلك مرتبي بعد تلاتين سنة خدمة 700 جنية فقط لاغير اظن من حقي اعبر عن القهر الذي اصابنا
تقبلي تحياتي

عمنا عطية انا لسة عندي امل في بكرة
وكمان انا لسة داخلة دلوقت حشوف وارد عليك حالا ســـــــــــــــــــــــــــلام

ياعم طاهر خليك محضر خير ومتولعهاش والله احنا شغالين بذمة هو في صحيح ناس مش بتراعي ربنا في شغلها لكن مش كلهم وصوابعك مش زي بعضها
تقبل تحياتي

اولا استاذي صلاح الكومي انا برضة هقولك انا عندي امل في بكرة حتي لو بكرة اتأخر علينا شوية بس برضة احسن بكتير من اللي كنا فية
وعل رأي فؤاد المهندس "مش كدة ولا اية" ثانيا اشكرك علي مرورك الكريم واعجابك الجميل علي كلماتي المتواضعة

عمنا وعم الكل عادل سند اولا انا نشرت القصيدة دي في شهر اكتوبر العام الماضي في منتدي رابطة الزجالين يعني مش حكاية خوف ولا حاجة
ثانيا اناكنت بهدي النفوس معاكم مش اكتر عشان الحكاية كانت كبرت علي الاخر وكنت بحيي مدام وداد علي انها قامت مشكورة بهذا الدور البطولي
مش اكتر
تقبل تحياتي

يا عم شواش احنا حنقر ولااية امسك الخشب وصلي علي النبي
بـــــــــــــــــــــــــــــاي

معلومه هامه
كتبت هذه القصيده
تعبيرا عن حال الشاعره العزيزه
شلوى
لانها من كادر المدرسين
هههههههه
جميله طبعا يا سلوى
قتها دلوقتى
تحياتى

الأخت الرقيقة سلوى عبد العزيز

الله على إبداعك الجميل

فى موظف أدارى

دائماً لك أسلوبك المميز فى العمل

وطريقة الطرح

وخصوصاً لما باسمعة بإلقاءك الجميل

باقولك ماتنسيش تسلمى على بنتك هبه الجميلة

وتبلغيها سلامى

يا عم سرور انا لو مدرسة ماكنشي دة بقي حالي كان زمان مرتبي عدي الالف جنية
هو الواحد كتب وفضفض من شوية
يلا بـــــــــــــاي

حبيبتي رشا اشكرك لكلامك الجميل ومرورك علي كلماتي المتواضعة
ثانيا هبة بتسلم عليكي وهي اتعلقت بيكي جدا
تقبلي سلامي

استاذة سلوى احيكى واشكرك
على ما قدمتى
واسئل الله ان يكون بكرة احسن من النهاردة
الشاعر محمود قطب اولا اشكرك لمرورك علي صفحتي ثانيا هو دة الامل اللي احنا عايشين عشانة في انتظار بكرة بس يارب الانتظار مايطولش
تقبل تحياتي