كالعب القط والفارة

يا دنيا لما تخدينا فى وسط التوها جواكى

بكل قلوبنا نهواكى

ونتشوق لرؤياكى

بتدينا فتات طرحك

تغرينا بطول صرحك

تداعبينا تلاعبينا تنسينا ألم جرحك

بنغزل كل أحلامنا بتوب أبيض بلون طرحة

ونتمنى ندوق منك ولو حتى عقاب فرحة

تتوه فيك خطاوينا

ونارك لما تكوينا

وصوتنا يعلا بالصرخة

بنحكى الأه ونتألم

وغدرك عنه نتكلم

ونحلف إننا تانى لا نهواكى ولا نسلم

ولا نتغطى بالحافك

ولازم إننا نخافك

عشان الغدر من طبعك

تنادى لأ مش سامعك

ولا أمشى فى نور شمعك

أنا راح أمشى فى الضلمة

وأخاف إنك تزوقينى تودينى

لحتة تانية جواكى

وأنسى القصة وياكى

وأتوه تانى على بابك

وأعشق حتى لترابك

تغرينى تنسينى ألم عشته فى محرابك

وأرجع تانى للتوها

وعارفك وأنتى معتوها

عشان أخد فتات طرحك

عشان أستنى يوم جرحك

عشان أضحك عشان أبكى عشان غدرك عشان هجرك

عشان أقعد وأستنى عشان يغلا فى يوم سعرك

لنا ولا أنتى نتغير عشان دى فطرة جوانا

عشان لازم نعيش بكرة بخطوة نور مصحبانه

عشان نمسح فى يوم دمعة على خدودنا وقلقانة

أحبك وأنتى بتصدى

أعاتبك وأنتى بتردى

وأبعد وأنتى بتودى

ماهو أنتى الدنيا يادنيا

نتوه فيك وجواكى

عشان إحنا بنهواكى

ونهوى اللعب وياكى

كالعب القط والفارة

الاستاذ الشاعر الجميل

رضا توفيق

عوده قويه بقصيده رائعه . وانت عرفت تتحدث عنها جيداّ

وتظهر مثالبها . وتعلن رغم ما قلته انك تتوق الى عذابها

وتعشق مداعبتها لك .

اشد على يدك وارفع لك القبعه لروعة نصك ووزنك المنضبط .

تقبل مودتى وتحيتى ...