والله ما كان يومك يارئيس

صبح الريس مرة فى يوم
مضايق كدة مش موزون
قال والله ما شفت النوم
جالى كابوس منحوس ملعون
نادى بسرعة لكل احبابه
ست سوزان وعلاء جمال
وعلى نظيف وحبيب العادلى
وحكومة رجال الاعمال
راحو قايلين له الف سلامة
خير ان شاالله ياريس خير
راح قايل ببرود وتلامه
شفت منام سيء شرير
راحوا قايلين له احكى يا ريس
يمكن تلقى معانا تفسير
راح قايل بس من الاول
تحلفوا ان السر ف بير
راحو حلفين له قالوا ورحمة
نخوة امة ماتت م الجوع
وكمان نحلف كده بالكرش
اللى ما ينكرش انك مفجوع
وكمان نحلف لك بندالتك
وبتجويعك للملايين
وبمعاليك وسمو فخامتك
يا مبطرخ قوى قوى وسمين
راح قايل كده يبقى تمام
اسمعوا منى بقى وافتونى
شفت انا قال ايه فى الاحلام
80 فيل يا ولاد هرسونـــى
كنت انا فوقهم كدهو مبرطع
كابس على انفاس انفاسهم
والكرباج فى يمينى يطرقع
على نغماته كده برقصهم
لكن فجاءة ثاروا عليا
وداسونى كدهو برجليهم
كل محاول افلفص منهم
القانى تانى بقيت تحتيهم
وكمان بعد شوية لقتنى
فى التحرير سايق اتوبيس
عمال اجرى بيه واتنطط
رايح جى كما النسانيس
والركاب جواه كارهينى
بيقولوا انزل بقى بكفاية
رحت مطنش راحو شتمنى
ولزقونى كدهو على قفايه
رحت ركنت كده وقلت لهم
اللى ما يسكت هنا هيموت
وقبل أنا حتى ما اتم الجملة
لقيت انا نفسى واخد شلوت
هنا وسوزان راحت غمزاه
بالكوع كده وبشكل مخيف
زغرتله وقالت له اتلم
و بطل هجص كده وتخر يف
راح بص لها وما عبرها
وقال للكل وصلنا لفين ؟
كتموا الضحكة وقالوا لغاية
لما عطوك كده بالرجلين
راح خد باله من ضحكتهم
راح برق بعنيه لاتنين
وصرخ فيهم كده على غفلة
فين تعليقكوا وليه ساكتين؟
راحوا قايلين له بشرة خير
جى اليك كده بالقنطار
ال80 فيل دولا ياريس
يبقوا اكيد 80 مليار
راح تغرق فيهم وتهيص
شتا او صيف كده ليل ونهار
ولا تعرف م العز تفلفص
يا حبيب القلب يا طيار
رد عليهم طب دا ازاى
هو انا حيلتى غير 70
راحو قايلين له مهى دى البشرى
ان فى عشرة كمان جيين
حس بفرحة يا سادة للحظة
بس رجع بعديها يعانى
حس كلامهم كده مش مقنـع
وان الحلم له تفسير تانى
راح قايل طب والاتوبيس !؟!
والناس اللى هناك جواه ؟!؟
ردوا وقالوا دا خير يا رئيس
نصر وجى من عند الله
حكمة ربنا بشلوت
تلقى جنابك كده براه
مش احسن متخليك فيه
وتروح منا كده يا ولداه
كل يومين كده كنا بنقرا
عن سواق اضبش وهبيل
اما بيخبط ايها شجرة
ويا أما بينزل فى النيل
راح شاخط فى الكل وقايل
بلا تلبيخ بلا قلة ذوق
قلت لكم يابقر يا بهايم
انى بنفسى انا كنت بسوق
راحوا قايلين والله ما نقصد
ولا تتنرفز ولا تتشد
راح قايل هس اخرسوا وامشوا
مش عايز المح منكم حد
عنها ونزل الباشا جنينته
مشغول الفكر ومحتار
حس بر يبة وحركة غريبة
مصدرها ما بين الاشجار
فصرخ قال مين هنا ويايا ؟
وازاى عدى من الابواب ؟
رد الصوت بهدوء و سكينة
انا ما يحوشنى يا حسنى حجاب
وانا جيتلك هنا لجل الحلم
اللى مشقلب حالك يا كبير
جى اليك من عالم تانى
ومعايا اجمل تباشير
قال له الر يس قول وبسرعة
من غير تلكيع او تأخير
نفسى انا اعرف تأويل حلمى
ويكون لك منى التقدير
قال له الصوت تفسيرى لحلمك
ان الكرسى خلاص هيطير
وان الشعب هيخلع حزبك
يا اللى ما عندك اى ضمير
والافيال اللى فى احلامك
دى جموع الشعب المسكين
بكره هتسمعهم بودانك
وتشوفهم بعينيك لتنين
جينلك بقلوب مكبوتة
رافضين أى نقاش وحوار
ويقولوا يا اللى سقيتنا الكوته
ارحل بقى وكفاية مرار
رد مبارك قال له نهارك
اسود من قرن الخروب
جى عشان تشتمنى فى قصرى
انت اكيد مجنون مجذوب
ثم تعالى هنا واستنى
انت اساسا تطلع مين ؟
رد الصوت انا دم الشهدا
مع صرخة جوع المساكين
انا احساس الناس الفقرا
اللى فى عهدك بالملايين
انا دمعة فى عيون اليتمى
اللى فى كرشك متاكلين
وف لحظتها وصل لجنابه
ست سوزان ويا جمال بيه
وقالولوا مالك بتزعق
ومعلى كده صوتك ليه ؟
راح قايل شجرة بتشتمنى
وبتلعن حكمى وايامى
بكرة الصبح يولكم منى
لو اشوف شجرة هنا قدامى
رافعوا حاجبهم كده م الدهشة
بس تظاهروا بطمئنينة
وقالوا له الاشجار بتحبك
مش هتضيرك وحدة لعينة
متوجهة بطمع اقليمى
باعت نفسها للأباليس
شجرة بجد عديمة ذمه
باعت حلم الأمه رخيص
وخدوه قال كده لجل يريح
وف ضهره وبشكل خبيث
غمزوا لبعض وهمسوا بخفة
والله ما كان يومك يا رئيس

ههههههههههههه

تمت