غزوة الصناديق

الشاعر الكبير والأب الفاضل أستاذى عطية الشواش

ألحق أحجز دورى

إيه الجمال دا كله

دا حضرتك ماخلتش قلت كله

والله صدقت فى كل كلمة

دى ملحمة مش قصيدة

ودرس سياسى ما حصلش

أستمتعنا بيه جداً فى الندوة

وماما كمان كانت عجباها القصيدة جداً

وبتشكر حضرتك على الإبداع الجميل دا

رررااائع

:suspect

[i]

الشاعر الكبير
مهندس عطية الشواش
تقبل فائق احترامى وتقديرى
وشكرى على تلك السيمفونية الرائعة
التى امتعتنا بها
فهى ليست قصيدة عادية بل هى ديوان كامل
اتشرف بمرورى عليه
خالص تقديرى ومودتى
ِ[center]

المبدع الشاعر / عطيه شواش
تحياتي لك
ولقصيده اكثر من رائعه ومليئه بدسم ابداعي كبير
احييك واصفق لك عليه
دمت بود

م/عطية شواش كتب:

غزوة الصناديق


مفيش حاجه

الميدان روح ماجاش

والخيام شالها الوناش

والشعار ف ميدليه فالصو

واليفط طلعت معاش

والشجر لخضر في بالنا

لسه جدره ماتهراش

واللي سلمناه لسانا

لسه نايم في الطناش

والحكايه يابلدنا

العيال راحت بلاش

..........

دهسنا القطر بلهيبو

وبعتر روسنا بقضيبو

فلملمنا في أشلائنا

وقلنا النوبه حنسيبو

فقام تاني

بنوابه

وأحزابه


وكتابه

ورجعنا لعنب ديبو

وجد جديد

شيوخ تلضم كلام وتصيد

عيال فاهمه الديانه نشيد

ووش صبوح

وعطر يفوح

وخد يلمعه يبشه

ماتعرف عسله من مشه

ينط الدم من وشه

كإنه ماجاع

يخوفنا من المذياع

من التلفاز

يولع قبرنا لو عاز

وهوه معبي في العمه

فلوس الجاز

..........

مفيش حاجه

مشينا من ميدان العز

مشينا من اول امبارح

وسبنا النخل مش طارح

علينا مهما نهز

وسبنا الصقر بشنابو

ومخلابو

يلقط كل اتعابو

من الدم اللي متمدد بطول النيل

يعبي كوام ونازل شيل

حيكتب تاني ليا وليك

سطوره ف دولة المماليك

ولو تفتح عنيك وتشوف

يغمي عنيك عشان يرقيك

ولو طال اللسان في الزور

حيدعي ربنا يشفيك

ولو تهرش دماغ الطور

تلاقي ضوافره بتفليك

مشينا ودم العيال بينز

مشينا وعضة الغربه

علي التربه

سنان بتكز

مشينا وخدنا في اللفه

قفف مزامير

ولف التعلب اللفه

وغنا معانا في الزفه

من التحرير

ونقط في الفرح مخصوص

وقعدنا علي .... البلبوص

ولبسنا العمم ع الروس

وعلينا السقوف ... في الدار

نقضيها .... دي جمعةزار

وجمعه هزار

وجمعة بوس

ورجعنا علينا فلوس

وجمعنا نقول اوكيه

يالهوي يامصرعلي حالك

عيال ماتت بسببك ليه ؟؟

مزاج عندك تودينا

علي الحاجه اللي مش لينا

ونطرش دم من عينا

ولا يعينا

تلت ترباعه بيعينا

عشان دينا وهو برئ

ولازم بعد فرجه تضيق

فمدي اديكي واتوضي

من البركه اللي في الصناديق

ولسه في كلام ينقال

عن المغنم وع الانفال

كشوف البركه حتغرق

ولا الشلال

وكل اسامي في الدفتر

عمر وبلال

وأي كلام ف حريه ووطنيه

واي مظاهره سلميه

دا لعب عيال

خلاص خلصت يابلديا

بلدنا ودفعت الديه

مفيش تجديد .. مفيش تجنيد

مفيش حدودات

وقصدك ع اليهود يعني ؟؟

وإشمعني اليهود بالذات

دا إحنا واليهود إخوات

وسيبك لو يهود كافره

دي جايه شويه ومسافره

سلامتك من مغص بطني

وم الوطني

ومن عمه تسلطني

اقول حاضر وأقول طيب

واستني علي المطره وع الرخه

ويقرصني ... يقول كخه

ومن ناره تموت ناري

علي العند اللي مداري

مابين قفه وبين قفه

رفعنا الهلب ع الساري

حكايه حتكسر الدفه

بنبهكم يا أهل الخير

تمدوا إيديكو جوه الزير

ماهوش باللون ولا الشفه

ويبقي دليلكوا ع العفه

أساس البيت

ولا ترموا زهور الحظ ع المساخيط

..........

مفيش حاجه

ولا دستور ولا دياولو

رجعنا نصلي ف الجامع

وسبنا شيوخنا يتقاولو

وخد جته

وهات حته

وشهر ف شهر م السته

نطفي النور

وإبقي قابلني لو سألم

عن الدستور

عن استقرار

وحولتم ميدان لمزار

تجيه الروم

من الطايف وم الفيوم


..........

مفيش حاجه

وإيه حيطيب

سقط واحد ؟؟

نجيب واحد علي التشطيب

وكل الشعب يتخانق علي الدباديب

وسيب وانا سيب

وشاي بحليب مع الطاوله

ونطلع تاني في محاوله

من الميادين ؟؟

وتبقي ساعتها يا شاطر

خالفت الدين ؟؟

وسد النيل وهد السد

ولو واحد هيتلاوع

نقيم الحد

نقيم لتنين

ولو عجبك ومش عجبك

تروح علي فين ؟؟

نصحنا نروحوا امريكا

ونلعب ويا بنفيكا

..........

مفيش حاجه

ونائب عام ماهوش فارق

لو الشعب اللي كان سارق ؟؟

زمانه كان بيتخانق

علي العدل اللي بات مظلوم

وده مفهوم

ولاكن يسرق الحاكم ؟؟

فلازم يلبس الخوذه

ونستناه

ويقعد يشرب الجوزه

علي مجراه

ومن مجري العيون ياقانون

نكون نسيناه

لإن الوالي او اهله

فيه شئ لله

ويطلع حكمه في الآخر:

سيبوه لقضاه

حيحصل ايه لو إتأخر

ونام للصبح بيشخر

لحد المحكمه ماتقوم

يروح الجاني متبخر

..........

مفيش حاجه

تعود للميه رقدتها

وترجع عايزه شلتها

يعود الدود ويتغذي

ويشرب فيها بالمزه

تعود ريما كما العاده

ويمكن حبه بذياده

تربينا ولا الداده

ياواد إسكت

ياواد إفهم

كلام النخبه والساده

وترجع مصر بنت بنوت

تقولي إزاي ؟؟

حقولك : طور

وزي ماتم في الدستور

وبالشلوت

وماده تموت

وماده تفوت

حترجع مصر بنت بنوت

..........

مفيش حاجه

السجون مفيهاش لصوص

لسه بدري ع المداوله

والحكايه مش فلوس

إحنا ظابطين المقاوله

والقانون مليان نصوص

إحنا هوجه ولا دوله ؟؟

فيه نظام لازم حيسري

والهدوء هو اللي اولي

خلوا بس التومبيلات

تمشي ونشوف البنات

خلوا كل ميدان ربيع

والسواق تعرف تبيع

والفلوس ف بنوك سويسرا

مش حتخلص أو تضيع

والنظام هوه النظام

والحياه هيه الحياه

واللي يبص لفوق بيتعب

واللي فات قديمه تـــــــــاه
________________________________________
الاستاذ الشاعر الكبيرالمبدع عطيه شواش
احيك على هذه الرائعه غزوة الصناديق
التى توقفت امامها كثيرا لرشاقة حروفها
وجزالة كلماتها والتى ان تكلمت عنها
لتبيان محاسنها احتاجت الى دراسه طويله
هذا كعهدك دائما تسعدنى بقصائدك الجميله
كما تسعدنى بتعليقاتك اللاذعه
اخوك صلاح الكومى

يا نهارابيييييييييض
وشايل كل دا ف قلبك

يا ع م انسى
وهات بنسه
وزرجن كل صواميلك
هتاخد ايه
اذا اتدلدق
وسال ع الخد تفكيرك
هتمشى اكيد
و بالتأكيد
مراد السيد
تلا ديلك
تقوم تلاقيه
تنام تلاقيه
واذا ترقيه
تراتيلك
تزيده جنان
كمان وكمان
يقول يا جميل
(حبا) ليلك
سامح شخبطتى تفاعلا مع هذه الملحمه الشعريه الرائعه فكرا ولفظا و تركيبا و التى امتعنى قراءتها رغم انى مليش تقل ع لقصائد الطويله
الا الطويله تنوع افكارها كقصيدتك الجميله و التى تاخذك مع كل بيت من ابياتها الى زاويه جديده و اضافه جديده تعمق فهمك لتشابك الحدث
تحياتى استاذنا

ايه يابابا ده انت اسكرتنى وانا بقراءها الله عليك يا باباايه ه دة تحفة فنية مش قصيدة
طبعا مهم اقول مش هقدر اجيب كلام يليق بالجمال ده كله
دمت بكل حب وجمال
تيمو
على فكرة هرجعلك تانى وعاشر هتزهق منى
ههههههههههههه
تقبل تحياتى
تيمو

عمي وعم الناس كلها وهو انت محتاج كلام ولا تعليق انت كفاية القصيدة الرائعة دي هي بتتكلم لوحدها اعجابي الجميل علي قصيدتك الرائعة واسفة اذا كنت لم اعلق عليها فور كتابتها عشان كان عندي شغل ولازم اصحي بدري
تقبل اسفي وتحياتي
ســــــــــــــــــــــــــــــــــــــــــلام

ياا لهو بالي علينا يا غالي
كل دا شايله في قلبك
يعني مفيش فايدة ....
دي يلزمها بقي واحد زي القرموطي
"نولعها بقي بالصلاةُ على النبي
وما فيش حاجة
معلش احنا بنتكلم"

أنا عن نفشي بحاول أبص على ربع الكوب المليان
ههههههههههههههه
بحاول أحلم حبتين
تعبت من حاجات كتير
بقيت أتخيل ما أحب إذا لم أستطعه
عموما عمل رائع كالعادة ووجهة نظر
أتمنى أن تكون خاطئة
لا حرمنا الله منك ولا من ابداعك
مودتى الغالية