ثورة

مش هصدق ..
إن قامت فى البلد دى بجد ثورة ..
إلا ماالقى لنفسى سعر
والقى شمس تمدّنى بحبّة دفا
والقى ليلى بينقلب فعلاً نهار
واجمع الردم اللى باقى من وجودى ..
وابنى بيه تانى الجدار
واقطع الإيد اللى تكشف للبلد فى الضلمة عورة
مش هصدق ..
إن قامت فى البلد دى بجد ثورة ..
إلا مااسمع إسمى يتقال فى النشيد
وابقى سيّد نفسى وامسح إسمى من كشف العبيد
أبقى أحسن ممّا كنت ،
أنسى إنى ياما مُتّ
وارجع الحس دمى من تحت الحوافر والخطى
يبقى من حقى النسيم
أقلع القهر القديم
والبس التوب المطرز بالعَلـَم
أدخل الاقسام بدون ماتخـُرّ عزة نفسى دم
أو يعَلّم فوق قفايا كام قلم
يبقى من حقى الصريخ والاعتصام
أبقى واحد م النظام
أبقى حُرّ بجد ماابقاش مُدّعى
مااتفاجئش بمخبرين نايمين معايا ف مخدعى
أو جواب من أمن دولة يجينى لو رعرع فى دقنى شعرتين
أو صرخت ف وش ظالم مرة قلت العدل فين ؟
مش هصدق ..
إن قامت فى البلد دى بجد ثورة ..
لو لقيت ان الفساد ده هوّ هوّ
أو لقيت الباشا بيشدّ اعترافى بكل قوة
وابقى ضيف جوّة الوطن
أبقى لاجىء
كل طقـّة اربط على بطون العيال مليون حزام
كل يوم ادفع إتاوة للفتوّة
أمّا باقى القبض اسدّد بيه ديونى من البنوك
لو لقيت تانى الملوك مستعبدينـّى
مش هصدق ..
إن قامت فى البلد دى بجد ثورة ..
لو لقيت دكتور بيلهف قوت عيالى ويعالجنى فى الأميرى
أو مدرس كل شهر يمُصّ دمى
لو أمين الشرطة يطلب منى افتـّح مخى لـ المحضر يبوظ
لو تضيع الشقة منى ويستلمها اصحاب حظوظ
لو أكلت رغيف زيادة يمسكونى ويطلبوا منى البطاقة
أمّا هُمـّا يسرقوا المخبز بحاله ويطلعوا فوراً براءة
مش هصدق ..
إن قامت فى البلد دى بجد ثورة ..
لمّا اعيش مظلوم واموت مغضوب عليّا
وابقى شاكى والحديد القاه فْ إيديّا
لمّا احس ان الوطن سجنى الكبير
ويقولولى ايّاك تسيب زنزانتك احسن رح تتوه
واوعى تكفر بالصنم لــ يبقى شِرْك
وامّا تتجرأ وتطلب مرة حقك شيل على إيديك الكفن
مالمطالبة بالحقوق أكبر مخاطرة
مش هصدق ..
إن قامت فى البلد دى بجد ثورة ..
طوب ماواحد أجره يتعبّى ف شكاير
أمّا أجرى رغيف بيتسوّل غاموس
طول ماأرضى بتتنهب وبيبيعوها بدون فلوس ..
للسماسرة ..
والقياصرة ..
والأجانب
طول مانايب دايرتى مشغول بنفسه
وبأموره الخاصة جداً
كل تأشيرة بتمن
كل خدمة بأكرمية
يبقى داخل ع البلاطة
بعد كام طلب إحاطة
يبقى من أعيان بلدنا
آااااااه عليكى يابلدنا
ياللى حارسينك لصوص
إنتى تاج الدنيا لكن سرسبوا منه الفصوص
إنتى بدر ف ليل تمامه
بس بتحاوطه الغيوم
وادى فجر جديد بيحرق قش ليلك
نفسى اشوف للفجر ده طلة نهار
دانتى طول العمر حبلة بالأمل
إمتى نقطع للوليد بس الصرار ؟
يابلدنا ..
نِفسى ارجّع دمك اللى أرْبعوا منه الديابة
نِفسى اغيّر لك هدومك
تستحمى من الجنابة
داللى سارقينك أباطرة
واللى حبّوكى الغلابة
صدقينى ..
طول مالسه ..
فيه حرامى فى المغارة
برلمانى .. أو وزير فى عصر ولّىَ ..
أو قيادى .. أو رئيس مجلس إدارة
مش هنهدا وكل نقطة دم فينا رح تلوّن وردتك
قومى قومى
أمّمى عرضك
أمّمى عرضك وأرضك رجعيها للشعوب
وبأثر رجعى افتحى تحقيق مع اولاد الحرام
يابلدنا ..
نخلة الحرية بادئة تشيل بلح
هِزى جذع النخلة ينزل للولاد عز الوطن
شدّى حيلك يابلدنا واكتبى إسم الحبايب فوق جبينك
وامسحى إسم اللى خانك بالبشاورة
لجل اصدق ..
إن قامت فى البلد دى بجد ثورة ..

العزيزة دائماً
عزة الزرقانى
فخور بالتواصل معك
فأنت الشاعرة المتميزة
الذواقة
عالية الحس
المحترمة
المهذبة
التى تراعى الود والأخلاقيات
وتجبرنى على سرعة الرد والتواصل الحميم
أشكرك سيدتى

الاخ الحبيب الشاعر الكبير

عبد الناصر حجازى

هذا النص خرج من عباءة النمطيه المعتاده فى

كتابة القصيده . تحررت الحروف كثيراّ ليس من

الشاعر . وإنما من التغيير الذى احدثته الثوره

كلنا كنا نكتب ونعلن عن رفضنا لامور كثيره .

وكنا واثقين ان الكلمه محبوسه رغم اعلانها لها

ولكن الآن طعم الكلام تغير . لون القصيده تغير

وهنا رأيت من بين حروفك ثوره من داخل ثوره .

وتم تفنيد كل المثالب فى العهد البائد على شكل

رفض لتكرار تلك العيوب .

وانت هنا كتبت :

والبس التوب المطرز بالعَلـَم
أدخل الاقسام بدون ماتخـُرّ عزة نفسى دم
أو يعَلّم فوق قفايا كام قلم
يبقى من حقى الصريخ والاعتصام
أبقى واحد م النظام
هذا لم يحدث مرة اخرى . واكبر درس اخذته

الشرطه من تلك الثوره هو احترام آدمية المواطن

والتى اُهدرت بعنف فى الماضى الكئيب .

انت اليوم سيد ونحن كلنا اسياد فى زمن عاد فيه

الحق لمن فقده عقود طويله .

وكتبت أيضاّ :

طول مانايب دايرتى مشغول بنفسه
وبأموره الخاصة جداً
كل تأشيرة بتمن
كل خدمة بأكرمية
يبقى داخل ع البلاطة
بعد كام طلب إحاطة
يبقى من أعيان بلدنا
انتهى هذا العصر . ولك ان تحاسب كل عضو

انتخبته على اى تقصير تراه من قبله .

فكم اغتنوا من دم هذا الشعب . ورأينا امثله

كثيره لهذا التسيب الاخلاقى .

انما الخاتمه اخى فقد جاءت من اجمل النهايات

نخلة الحرية بادئة تشيل بلح
هِزى جذع النخلة ينزل للولاد عز الوطن
شدّى حيلك يابلدنا واكتبى إسم الحبايب فوق جبينك
وامسحى إسم اللى خانك بالبشاورة
لجل اصدق ..
إن قامت فى البلد دى بجد ثورة ..
الله عليك اخى عبد الناصر .

والله قصيده اعجبتنى جداّ . وهذا هو عبد الناصر

يعلن مولد عصر جديد لمصرنا الحبيبه فى اجمل

كلمات قيلت عن الثوره ونتائجها .

تقبل مودتى وخالص تقديرى ...

لاستاذ / محيى
أنا سعيد بك ويشرفنى التواصل معك
دمت بكل الخير
تقبل شكرى واحترامى

أخى العزيز .. الشاعر الجميل
أستاذ / عادل سند
أنت جميل وكلماتى جميلة وتحليلك للكلمات رائع جدا
حقيقى
أنا فرحان بك
لأنك قرأت القصيدة بوعى كامل
عكس ماأرى من غيرك
دمت شاعرا جميلا
وانسانا نبيلا

الاستاذ / حمدى
أنا لاأدرى متى كان هذا الاختلاف
لكن كفانى هذا التواصل الجميل منك
ولنقف سويا فوق أى خلاف حتى تعلو قاماتنا
دمت طيبا راقيا

تقبل شكرى ومحبتى شاعرنا الجميل / محمود قطب
سعيد بك أيما سعادة أخى الفاضل