صباح الفل

صباح الفل
صباح بالورد متعطر
على عيونك
يا ست الكل
صباح ابيض
على ولادك
يغور الذل
سنين عدت
وانا مأسور
وكنتى معايا
مأسورة
وسجانك وسجانى
تملى يعكس
الصورة
يبان دايما
من الابطال
وابان دايما
انا المأجور
على ايذائك
واكون داءك
وهو دواكى والترياق
واشوف جملة
من الأشياء
بتقسمنى مابين جهلى
وبين خوفىعلى عيشى
ولو ما ارضاش
وانا مستاء
يقولوا ارضى
دا ربك
قسم الارزاق
.......
مرايته هو مسحورة
تقوله انت
مفيش غيرك
هيقدر يعدل المايلة
مفيش غيرك
بلاش خايلة
وانا دايما
باكون واحد من الأقزام
ف حدوتة
راسمها هو ف خياله
وفاكر انها دايمة
وان الدنيا باقية له
وعايز يمنع الاحلام
وادينى طلعت م القمقم
وهديتها سجون الزيف
وادينى طلعت م القمقم
وعديتها كما بارليف
وادينا انا وانتى
شفنا النور
ولو طاقة
منيش راجع
منيش مكسور
منيش راجع
لحد ما احول الطاقة
بيبان ياما
واشوف النور
يغطيكى
واحس الضحكة
ف عنيكى
فا تنسى الذل
وتيجينى
وانا انسى القهر
ف سنينى
وتاخدينى ف احضانك
ادفيكى.. تدفينى
ونزرع قمحنا يطرح
سنابل خضرا
بعد الصفر
وتتلون لياليكى
بلون الفجر
ويبقى كل دا ذكرى
ويبقى تاريخ
وتوبك الابيض الناصع
بدون تلطيخ
وتمشى أبية ف الزفة
على جبينك دليل عفة
3 أحرف بلون النصر
3أحرف يقولوا مصر
م
ص
ر


_________________
<br>

سمعتها منك بالأمس

وكنت رائع فى القائك المتميز .

تحيتى اخى حمدى ...

اخى الحبيب حمدى

المهم طمنى عليك وعلى ابنك .

تحيتى ومودتى ...