يا أيها الملك الــحجر

يا أيها الملك الــحجر

بلد

فيها الولد لما اتولد

رضع التمنى من صدور

اليأس والعمل الردى

رضع المحن

واتعلم ازاى البلا

ينبت من الأرض الخلا

والجبر فرض على الضعيف المستحى

الحلم مقطوع المنام

ممنوع تواصل للامام

جرجر فى رجلين الهموم

رقع فى ميتين الهدوم

بربش وبص على الهرم

مقلوب ومايل من زمن

والتانى متفتت الم

والتالت المكسور وقع

بأمر آمون الغبى

يا أيها الملك الذى

فطس زغاليلك .. حكم

يا امايا حكمه بالصمم

ما تسمعى ولا يوم تشوفى غير هبل

عطاكى جرعة من الغبى

أدمنت يا امايا الطناش

سحرك بسحر السافلين

وشربت بالغلب العمل

نمتى فى احضان التابوت

وسكوت يكسر فى الضلوع

الراية حمرا بتترفع

وحبلتى يا امايا غلط

نزلوا ولادك بالشلل

بيمصوا صابع مـ الشجن

تايهين ولاحسين اليلاط

يا ايها الملك البلاط

يا ايها العبط البلاط

ادينا اكتر مهزلة

رقصنا على واحدة ونص

الواحدة كانت نص نص

والنص كان واحد صحيح

لكن بفعل الانحناء

فى ليالى امشير اتكسر

طبل على صفيح البلا

شخلعنى .. طوحنى اقع

فى رسالة خايبة ومقلقة

مكتوبة من اعلى اليسار

ليمين سطوره مشرشرة

لبسنى قمصان الغجر

ادبحنى وامضى عـ القمر

إمضاء نجوم المنتهى

يا ايها الملك الحجر

سامع ولا سمعك تقل

جاهل في فن الانتماء

والنظرة منك شيطنة

واقفين على بابك سلع

نتباع ونضحك ننتشى

وبفن نبنى ليك هرم

راسه لتحت من الوبا

نبنى معابد للقلق

ننحت تماثيل للكذب

نركع .. نصوم ونموت فدا

لو شعرة فى صدر الملك

وقعت تهد المملكة

صعاليك عصور المنتهى

صعاليك وملناش فى البشر

غير شكل دايب مـ العلل

يا ايها الملك الحجر