مسمار ف نعش الفساد

تلاتين سنة جبروت
تلاتين سنة أشغال
بقى لما أصرخ أموت
والأه اقولها محال
....................
أنا أول المسامير
اللى ف نعش الفساد
ميهمنيش تحذير
أو حتى أيد ع الزناد
...................
وانا لما اطالب بحقى
أبقى عميل أو جبان
وابقى باخرب كمان
ويقولوا متأجر
واخد له وجبة وفلوس
أما انتو حبة تيوس
دا انا كنت جاى ومسالم
ويدوب باقول انه ظالم
جانى العيار ف الصميم
فاكرين رصاصكم يخوف
فاكرين رصاصكم شجاع
يا جبنا دا انتم ضباع
والضبع طبعه لئيم
.....................
اوعاكى تبكى يا أمى
احسن يقولوا انكسرنا
ضمينى جامد وضمى
يا حبيبتى جاى انتصارنا
دا انا عريس النهارده
عايزها زغروطة
مش صرخة ولاّ عويل
والدمعة تنزل فرح
عايزك تشدى الحيل
.............
دا انا نورها
شايفه خلاص
وشمسها بتسطع
حريتى ليلها راح
ونهارها راجع
بيلمع
...........
أنا اول المسامير
اللى ف نعش الفساد