فــــــــــــدان مشاعر

فــدان مشـاعــر

فدان مشاعر و اتحرق
مش باقي غير الكلمتين
اللي علي كفوف الورق
كلمة ( بحبك )
جنــبها ....
كلمة ( قوي )
و القلب يصرخ بالقوي
لكن بعادنا كان قدر
مكتوب علينا نفترق
و اّدي اللي كان
و اّدي الحكاية كلها
و اّدي الحنان اللي انتهي
و اّدي كمان كل الطـرق
اللي مشيناها ويا بعض
و قلبي كان علي قلبها
كانت خطاوي حلمنا
دايما موانسة بعضها
وانا كنت ناوي
أبقي تملي في حضنها
وانسى حياتي كلها
وافضل هنا
ايوة هنا
نفس المكان اللي ابتدي
فيه حلمنا
من كااااام سنة
علي راس شارعنا
وانا كنت واقف منتظر
و العقل شارد فـ الخيال
بحلم اكون عنتر زماني
او اكون سيد الرجال
ودا مش محال
ودي مش اغاني
إني احلم
إني القي
من بنات حوا حورية
تكون عشاني
وتبقي ايه في الجمال
كل ده ....
وأنا لسه شارد فـ الخيال
واقف مكاني و منتظر
فجأة القدر ....
نوّر طريقي و سكتي
و لقيت قمر ....
واقف و طالل نحيتي
بنوته نازلة من السما
وعيونها كت متبسمة
ومعاها كل الأوسمة
جايه تنور دنيتي
بصيت لها
دارت عيونها من الكسوف
ولقيتها بتلملم خطاها
وناويه تقتل فرحتي
وتسبني وحدي فـ الطريق
أنا وقتها....
كده مرة واحدة بقيت جرئ
و جريت وراها
عشان ارجع ضحكتي
وسألتها عن اسمها
وانا كل أملي انها تكون قسمتي
ردت عنيها بالنيابة عنها
وابتدى بينا الكلام
وابتدت لغة العيون
ومشيت معاها
وكت خطاها
هيّ هيّ خطوتي
و شربت وياها الحنين
واتفقنا وقتها ....
إننا نفضل حبايب
مهما طال بينا الزمن
وبحبنا ....
نفضل نعافر فـ المحن
ونتوه فـ بحر العشق
نتحى الغرق
حتي لو كانت حياتنا
وعمرنا
هما التمن
وكتبنا قصة حبنا
وكان عشقنا ....
مالهوش مثيل
عنتر و عبلة
قيس وليلي
جميل بثينة
حتي روميو و الأميرة
كل دول مش قدنا
كان بعدنا ....
شيء مستحيل
وفي لحظة واحدة....
كل ده تاه وانتهي
و صبحت حياتي كلها
فـ حبة كلام متفرقين
فـ الصورة اللي رسمتها
طول السنين
نظرة عنيها ... رمشها
همس الشفايف ... ضحكها
لمسة ايديها ... حسها
دا أنا حتى راسم اسمها
علي صفحتين
وفـ لحظتين....
كل الورق
اللي رسمته....
فـ بحر من الاحزان غرق
مافضلش غير الكلمتين
اللي بايدها سطّرتهم ع الورق
كلمة ( بحبك )
جنبها كلمة ( قوي )
كان حلم قرب يستوي
بس اتسرق
فدان مشاعر و اتحرق


* * * * *