لحظة يأس للشاعر رأفت توفيق

لحظه يأس لكن عدّت

صعبان على نفسى انى اشوف نفسى
تايه مع اللى تاه
صعبان على حالى انى اشوف يأسى
ونا بتقتل ويـاه
صعبان على عينى تلقانى رغم الحال
بغزل خيوط ماساه

وشى بيضحك اه لكن فى قلبى الاه
ساكنه وليها بيوت
باب الامل مقفول جوايا ميت مقتول
عايشين فى حاله موت
ومركبى بتوه بعد الشراع ماطووه
ماشيه فى بطن الحوت

ارضى وعايزه عزيق وفى سكتى خوازيق
بمشى عليها وافوت
قطرى وماله قضيب ماشى بقدر ونصيب
فى محطتى ما يفوت
وناسى مش داريين وكلهم هاربين
ولا بيساووش سحتوت

لسانى صاحب الصوت من بعدما كان صوت
بيقول دهب وياقوت
اصبح كما المخروس غالى الثمن مبخوس
وبقول عليه هلفوت
مـا عادش تانى يثور طلع له فوقه صخور
وتحت منه سكوت

البخت كان ملموس خضره و ماء وفلوس
والعز و الجبروت
اليوم بقيت منحوس ولا فيش فى بابى فانوس
والدندى بقى كتكوت
اسمى وماله كشوف جسمى وبات مكشوف
مش لاقى ورقه تــــوت
والنحس دام ياناس والعين عليه حراس
وعلى الجبين منحوت

من ناسى مالى ونيس ومعاشر النسانيس
وكل ماهو لدود
الوحده احلى صديق ولما بيا تضيق
اجرى ابوح للدود
يسمعنى لما ابوح يداوينى لو مجروح
يرقينى لو محسود
ون ما لتقتش جليس اقفّلها بالترابيس
واقعد بكل برود
اغنى للصابرين واسأل دموع العين
ان كان لقولوا حدود
لكن بعون الله
راح ييجى يوم و انول كل اللى بتمناه
وح رجع اللى فات واعدى ع النكبات
واللى حصل حنساه ساعدنى ياالله

للاشتراك فى المسابقة
تلبية لرغبة الشاعر

الاستاذ الشاعر الجميل

رأفت توفيق

مع خالص تمنياتى بالتوفيق .

وبالفوز إن شاء الله .

فهى قصيده جميله وجديره بالفوز ...

أخي الشاعر الجميل رأفت توفيق

في اول لقاء لي مع اعمالك ..أنت شاعر جميل تملك ادوات الشعر وتعرف كيف تصيغة
وان كان لي ملحوظتان الاولي هي الاغراق في وصف سوء الحال دون ترك باب ..والثانية ان الصنعة غلبت على التدفق الشعوري احيانا
فألزمتك صورا او الفاظا كنت مكره او مدفوع اليها مثل : الدندي بقي كتكوت .. ومعاشر النسانيس ..

لكن هذا لا ينفي ان بالقصيدة مواضع أخري جميلة

الشاعر الجميل ..ارجو ان اكون مع موعد جديد مع ابداعاتك

تقبل مروري وخالص تقديري

الشاعر الجميل رأفت توفيق رائع ما ابدعت تقبل مرورى

رائع

تحياتى

» رد (الماهية) للمستوظفين فقط للشاعر رأفت المصرى
» مسخه
» و لانى بحبك بقلم اسلام المصرى
» مــن ضَــى الــقــمــر
» قوليلى بجد ( رداً على الشاعر رضا محمود - محتاجة لحد )