رباعياااااااات جديدة بقلمي

[center]
ليه يااخوات واخدين العراك سبيل
ما تحاولوا تخلوا الحب والود بديل
بصوا لي بإستعجاب وقالوا
ما هو من قبلنا قابيل قتل هابيل
******
ليه بتلف في دايرة وحيران
ماأنت هترجع تاني لنفس المكان
أرضى باللي قسمه لك ربك
وخلي عندك شوية إيمان
********
عجوز وبص في المراية لشعره الشايب
وقال ياترى دي ميزة ولا ده عايب
قال لأ اللون الأبيض أكيد ميزة ولا يمكن
اتغير وبقى عيبة ما هى دنيا عجايب
*********
سيبها على ربنا والكارثة أكيد هتمر
ليه تنحب عليها وايش عرفك إنه شر
خليها تعدي وبلاش تقعد تحسب لها
ولا حد فينا هيموت ناقص عمر
********
حرامي دخل بيتنا وقالي هسرقك
هتسرق ايه ياحسرة دي المظاهر بتخدعك
فاكرني مبسوط جاي يسرق مني الفرحة
دي حياتي كلها مبسمعش فيها غير كلمة بودعك
***************
نصحت اللي كل هدفه في الحياة هو الشر
قلت له انت في النهاية اللي هتنضر
قالي أنا مبسوط وفخور بنفسي
وكل واحد ياسيدي في تصرفاته حر
**************
ياما اتكلموا وقالوا عن الوحدة الوطنية
وحالوا يوقعوا بينا ويعملوا فتنة طائفية
مهما يقولوا ومهما يحاولوا
هتفضل فاطمة بردو صاحبة مارية
***********
قالوا أوعى تدخل الضلمة ده الخطر قادم
ممكن يطلعلك عفريت وتبقى وقتها نادم
يلبسك ويعفرتك ويخليك مجنون
قلت ياعم ما عفريت إلا بني آدم
***********
قلبي فكر في يوم يكتب ذكرياته
جاب ورقة وقلم وعمل كل إستعدادته
حاول يكتب تاني.. وتالت.. ورابع
بس للأسف ملقاش حاجة في حياته