فاكره زمان ؟؟؟؟؟؟

فاكره لماكنازمان..

بنات صبيان..

وسط الغيطان نقعدونحكى لبعضنا؟

ياآآآآآآآه ع الزمان

كان من زمان

كان لماكان لا(هى)انتى

ولا(هو)انا

كنانصحى من الفجريه

نشم النسمه هاديه طريه

نتوضاونصلى جماعه

ونسرح ساحبين(بهايمنا)

عاملين مذيعين واذاعه

ولاحد فى الدنيا هاممنا

اللى يقلدشيخ (عباسط)

واللى يقلد فى الطبلاوى

وقول ياباسط تلاقيها هاصت

ولجل النبى (للكحلاوى)

ونربط (مواشينا)فى مراودها

تصبرلحد الندى مايطير

وأما(البرسيم) يراودها

نحشلهايادوب(غومرين)

وعودين دره م (المتلقط)

تاكل بهايمنا تزقطط

واحنانلعب نتنطط

مع بعضينا اتنين-اتنين

اللى يرسم فى(السيجه)

واللى يحجل فى (الريجه)

ونطيرونهرب

فى أى مهرب

وقبل الرد

حتمآ لابد

يمسكله واحد مننا

يآآآآآآآآآآآآه ع الهنا..

لمانلم بعضنا..

ونفك مناديل الغدا

ونتشارك

ونتعارك

وانامسامح ومش فارق

وأحلف عليكى..

تحلفى

وتغمضى و(تسلفى)

ماياكل غداكى..الا أنا

والله على طعم الغدا

دا مافيش كده

وبعدالغدا.......

اللى كوع واللى نايم

واللى قام يسقى البهايم

واللى آل حبيب وهايم

تقولشى طايرفى السما؟

..واللى بيخطخط فى خطوط

واللى بانى بطينه بيوت

واللى طالع شجرة توت

وقبل ماياكل يحدفلنا

يآآآآآآآآآآآآه ع الهنا

لما الشمش كانت (تحّمر)

ونهم علشان هنرّوح

بقلوب بريئه ماتعرف شر

الخير معاها اللى مرّوح

ع الطبليه

فى المغربيه

العيله تقعد تتعشى

وبعد مانحمده نتمشى

ومن التعب نرجع وننام

لانتغطى

ولافيه فرشه

وندفى ونوّرب البيبان

أصل الأمان

كان من حنان

حضن ابونا وامنا

وكل كبير

كان له مكان

والخوف ماهوّب يمنا

يآآآآآآآآآآآآه ع الهنا

يامين يرّجع عمرنا

اللى انحنى

فى(العولمه والهيمنه)

(ياألف طز)

دى ساعة الحظ

مايساويها ميت سنه.

أخي طه على الدين
تنقل للعامية و تشترك بالمسابقة
تلبية لرغبتك مع خالص الود
دمت بخير
أخوك

المفروض تسميها يوم فى الغيط

هههههههههههههههههههه

الاخ الحبيب الشاعر

طه على الدين

قصيده تحكى عن يوم كامل بين الخضره والطبيعه

ومفارنه بين الامس واليوم .

جميل ما قدمت اخى طه .

مودتى وتحيتى ..

» فاكره زمان ,, من كلماتي
» فاكره وعمرى ما انسى
» فاكره انى عشان بحبك انسى عزة نفسى ليكى (سيف الدين الدسوقى )
» فين لمة زمان
» النهارده غير زمان