بحلم أكون لك فارس (قصيدة فيديو )

بحلم أكون لك فارس

مقدرش أقول بحبك
مقدرش أبوح
غير أما أداوى نزف الروح
وأقف فى وش الريح
عارفانى
طول عمرى صريح
يبقى اصبرى لحد ما الحظ يقف ف صفى
وربك يرزق
والخير ورده يطرح ف كفى
فرحة
فرحة ترجع قلبى ليكى
وترجعنى تانى أسكن عنيكى
وأنسى انى كنت جريح
ساعتها بس أقولك بحبك
وأعشقك وأكون لك
أما دلوقتى سامحينى ازاى ألم ضعفى على ضعفك
وازاى أغزل ألمى فى ألمك
ازاى وأنا بنزف أداوى جرحك
ازاى وانا غرقان ف حزنى أكون فرحك
ازاى وانا مش لاقينى اقول بحبك
وأقول انك ساكنة قلبى وان مناى قلبك
هتصدقينى ازاى وأنا مش لاقينى
يبقى ساعتها بتخدعينى
طب فكرى فيها تانى
هتلاقيها مش جايبة همها
ازاى وانا مهزوم أكون لك فارس
وتأمنينى على عمرك
وازاى أكون لك حارس وتملكينى أمرك
وازاى أطالب بحقى ف عنيكى
وانا مدبوح بدمعك
وازاى وانا مش قادر اخدك ف حضنى
وأهزم حزنك
ازاى ابوح وافضفض واقولك
وبينى وبينك الف ميل
ميل شقى
وميل صراخ وعويل
مقدرش اقول بحبك
وانا مش قادر أكون لك فارس
مش انتى عاوزانى فارس
ولا انا اتهيألي
مش انت عاوزنى حارس
ولا الحلم صور لي
كلام ماهوش حقيقة
ومن جواك بيفتح سكة لأحزانى تعود وتخطفنى
ان كان كده احمينى واقرى تعاويذك تحاوطنى
ومن شيطانى تحرسنى
واصبرى
ف يوم ح اقولك بحبك
واغنى لك واعيش لك
انما دلوقت
قدامى سكة طويلة
على ما أعدى بحور الصمت
وربك وحده العالم
هتاخد قد ايه وقت

شعر / أحمد صلاح محمود
ahmedsalah124@yahoo.com

مشاعر صادقة و جميلة
زادها إلقاؤك روعة و جمالا
أخى أحمد
أحييك أيها البهي
Very Happy

الاستاذ الشاعر

احمد صلاح

بالفعل كلماتك جميله ومحتواها جيد

بجانب الإلقاء الجميل ..

تحيتى ومودتى ..

القاء جميل

دمت جميلا

دمت بحب

طب انا بقي مسمعتش الالقاء

قول تاني كده هه قول

هههههههه

تحياتي ليك بالفعل كلام صادق ومشاعر جميله

لك مني كل التحيه

» قصيدة ( أكون او لا أكون )
» قصيدة : بحلم
» قصيدة بك أكون..!
» فرسان الشقا رد على قصيدة فارس بلا فرس للكبيرة زينات القليوبى
» شاهد فيديو قصيدة نزار