** نص كيلو ..وطنية **

يادنيا ليلي طال ..صبرك بأه شوية
الحمل مني مال..
مين قساكِ عليا

مشيت فيكِ سواح

وعمر مابالي إرتاح

لا الجنب دا ذاد
ولا حتى دا مية

شكيت لناسي
إني عمال بقاسي
وأطاطي راسي..
ولحد امته هتحمل
واقول ياريت واتململ

قالوا بكرة تروق وتحلى

قولت هاتبقى وحلى
حروب وجفاف حلوق

قالوا خليك فحالك

بدل ما فالحبس يحطوك

قولت وانا مالي

هاعيش أدور على حالي

وآخري أسكن القبور

عيش ناشف وبخور

ماهي أصلها

ماضاقتش إلا عليا

يادنيا ليلي طال... صبرك بأه شوية
الحمل مني مال.. مين قساكِ عليا



المُر ملى حلقنا

والارض شرقة مننا

والصبر اعتذر وولى

ولا زارعة ولا قالعه ..ولا حتى حبة مرعى

جريت وعملت شاطر

وقولت افتحوا القناطر

وناس ياللي على القمة

اعمللكو شوية همة

هاتولنا زرعه عفية

قالو خد ازرع ياشاطر

زرعة شطاني

من غير ماتتعب فيها

بالخير الوافي تلاقيها
..

خدت ومكدبتش خبر

وبسرعه نشرت الخبر

وجابوا منها كتير

وجريت ازرع زرعتي

اللي مش من قلعتي

وجابولي رشة عفية

تموت الدودة المفترية

رشيت رشة

وكمان رشة

عطست عطسة

وكمان عطسة

قولت جرى ايه يا سعيد

شيد حيلك

وازرع كل القراريط

لجل ماجني زرعتي

ويوم حصاد حصتي

اكون من المسوعدين

وافرح عيالى المساكين

والزرعة كبرت وصحتي تعبت

أتاريها زرعة موت
...

وزادت الشدة عليا

اخدني عم أمين

على مستشفى التأمين

قالي هناك العلاج ببلاش

وفي الرعاية ماتتوصاش

من اوضه لأوضه

وجري بالمشاوير

وتحليل ورا تحليل

وشغل من غير ضمير

عينه ضايعه وإشاعه والعه

والعتب على المسكين

اللي مش معاه تمن ال أمساكرين

و
يادنيا ليلي طالى صبرك بأه شوية
الحمل منى مال .. مين قساكِ عليا

قولت أروح أشرب من نيلك

يمكن ارجع أغنيلك

لقيت المية شوية

ولاقيت حراس كتير

قولت الميه راحت فين

وليه دول هنا واقفين

قولت يالهوي

لايكونوا خصخصوا النيل

قالوا لاوانت الصادق

حصتكوا منتهية

حتى المية
يا دنيا مفترية

قولت المية من عند ربنا

والنيل دا من حقنا

قالوا ماخلاص يادُهل

أصحابك باعوا الكل

ومعملوش حساب اننا

نقدر ناخد حقنا

و
يادنيا ليلي طال صبرك باه شوية
الحمل مني مال..مين قساكِ عليا

قولت أروح البرلمان

يمكن اقدر اجيب حق الغلبان

اتهبلت ورشحت نفسي

قولت احقق اللي فنفسي

لاقيت الحسبه محسوبه والصناديق مقفولة

وزغرطي يام عرفان

فطيرة فإيد غربان

وياحسرة على الغلبان

و
يادنيا ليلي طال ..استني بس شوية
الحمل منى مال.. مين قساكِ عليا

قولت أرحل وأسيبك

شكلي مكنتش حبيبك

سيبت اهلى وناسي

وركبت مركب

قولت للمجد ههرب

وشوية غرقت المركب

وماتدفنتش في أرضك

يا دنيا يا ناكرة خيري

تموتيني

وتحيي غييري

تحيي

صاحب النفوز

اللي معاه الفلوس

وعلى الراس يدوس

ولا ذاد ولا ذواد

ولا طب ولا دوا

ولا علم ولا علام

ولا حتى حبة هوا

ويادنيا ليلي طال..

صبرك بأة شوية..

الحمل مني مال..

كفاية أوي عليا..

بقلم
أسماء عبدالعزيز