جربت؟مني سليمان

فقير وبتشتهى اللقمة

عسران من المعاسير

ومنسى فى الزحمة
......
جربت تبقى شريد وف عرض حنية

أو ف الصحارى بعيد

محروم من الميه

جربت لبس الخيش وخشونة العيشة

جربت نفخ القهر

ف سجارة وف شيشة

جربت حلم بسيط عمرك ماحققته

مجبور تعيش وتزيط

فى وهم صدقته

جربت طعم الذل والقهر والحوجة

والا إنكويت بالنار

وغرقت ف الموجة

لو كنت م المحاسيب

تبقى ماجربتش

أو كنت عشت غريب

لاسمعت ولا شفتش

معقول نعيش ف أوطان

والمجتمع نصين

النص عاش فى أمان

والنص م الملاعين

يستجدوا لقمة عيش

من رزق جاى بشويش

تحت الحضيض عايشين

وناس تبعزق مال

ع الفاضى والبطال

للفقر مش شايفين

بيرموا بالملايين

وقصاد كدا ملايين

مكتوب تعيش بالدين

لاعلاج ولاتأمين

بتقول أخوة إيه

ومواطنه ماأدرك إيه

وإحنا بعاد عن بعض

اللى يعيش منبوذ

والرحمه له ماتجوز

واللى إنكتبله السعد

علشان نعيش ف تبات

ربك خلق طبقات

دا كلام مشايخنا

عليه نقوم ونبات

ونكافح العسرات

وم الكفاح شيخنا

نظرة ياأهل النول

للمنسى والمذلول

وفروق بتشرخنا

(مني سليمان)