صورة

صورة

حبة بشر ماشيين فى حوارى ضيقة
والشارع زحمة وطين والدنيا مزنّقة
واحد بيضحك واحد بيلعن وواحد سجين شرنقة
والجو سخن ومليان عفار والرطوبة مخنّقة

والشمس شادة حيلها علينا وحرارتها محرّقة
مفيش رصيف اصل الرصيف بقى مأوى للفاكهة وبتاع الرغيف
واضطر ينزل انسان فى وسط وحوش مفرّقة
راشقة فى بعض وخناقة وضرب وعيون مزرّقة

واللى ينده عتبة عتبة واللى يصرخ مؤسسة
عايز زبون فلوسه تشخلل مش جيوبه مفلسة
وناس تنط ف أوتوبيسات...وشعبطة عالميكروباصات
وحالة بجد محنّسة
تذاكر تذاكر ووشه ياساتر
ولسانه مبرد عمره ماجرب ينطق بكلمة كويسة

ينزل عجوز ضاربله بوز..راجل ياعينى حظه منحوس
عم أمين بقلبه الأمين لسه قابض كل المرتّب
تعب السنين وعم أمين وسطه اتقطم من قعدة مكتب
ماباين عليه من رعشة ايديه....ومشيه البطىء وضهره المأتّب
وياعينى عارف الكام برطوش مصيرهم مصايب مداريّة
من أكل وشرب وعلاج وتعليم وزوّد كمان دروس خصوصية
وكل شوية طلبات طلبات جيل جاحد مفيش حساسية
ربك معاه يعينه ف شقاه ويصبّره على مابلاه

ونرجع احنا لحال شارعنا وقلب الانسان وعقله اللى تاه
أكشاك سجاير وبياع حراير حاجز اتاوة رصيف المشاة
شوية عيال بيشوطوا كورة ولا فيه اهالى تلمهم
وكلّه حافى وقلبه دافى , زى الملايكة فى حسّهم

وشباب مبيّت عالقهاوى ولامرّة حاول ولاليلة ناوى
استحلوا القعدة وف ليلة واحدة جاب الكسل رجلهم
صدّروا الطارشة وفرشوا الفرشة وحالهم ياعينى ريحته عفشة
عايشين عوالة وبألف حالة ومفيش كرامة وياكلوا الزبالة
حاجة تكسف وحالكوا يقرف ومبسوطين باللى انقسم



واكياس زبالة ف الشوارع بيلف فيها اللى اتحرم
من لقمة حلوة وأوضة خلوة مولود بجيبه اللى اتخرم
وف الأشاير بنات بشاير تدعى لربى يسترك
ولو ما اديت وبقلب هديت..تدعى لعفريت ينقرك

وأجرة زايدة زيادتها عايدة على سواق ضميره اتهدم
فى خمسة متر يقولك لتر سعره طلع ووجوده انعدم
ونت كافيه بتلاتة جنيه تقعد وتلعب لعبتك
والبوم جديد مع فيلم العيد نازلين لضحكة حضرتك
وريحة العوادم والنفس كاتم وكلّه تعكير صفوتك
وميكروباص طاير وهاص يكسر فانوس عربيتك

بالليل نوادى وحادى بادى , حال الشباب وصل لفين
وهاى يا دادى انا رايحة ديسكو وراجعة مع ابن مين ومين
وانا ف ليلة طالع مارينا وسايق على سرعة تسعين
متخافش منى حرّيف وعارف
قال يعنى برم , ده عقله هايف
وتعالى بقى شوف المصايب حايرة ودايرة على كل خايب
ندمان ويبكى وداير بيشكى وداللى كان على صاحبه عايب
ارخى الحبال دى رجال طوال قادرين يحلّوا كل المصايب
طب اديك مرزوع تبكى الدموع بدل ما تاخد بالسبايب

يا عبد العاطى يا مصوراتى جبتلنا صورة غم ليه
ضميره صاحى رافض يطاطى شاف اللى شافه ورسم بعينيه
صورة فى يوم بياضها زهزه فجر الحبيب ودارت عليه
وفجأة اصبح سوادها جبرا ملوش بدايل وعايشة فيه
نفوس بتحكى و لرب تشكى بياضها غايب من فترة ليه
ومين البطل ... اللى اتسطل فى مخه وقال هارجعه
دى عايزة ثورة وضربة فورة على خد بشر....توجعه
وعقول بتفهم وعيون بتحلم وكمان ودان تسمعه
بس اللى قادر يشوط وثائر...ندعى لربى ينصره
فين الزمان اللى اتولد بطل رجولته تعصره
والنخوة تطلع وكرامته تمنع مبدأ نحبك لما تدفع
ويدوس برجله على كل ذنب ارتكبه راجل شيطانه ابن كلب
وعبد العاطى بيقول ادينى جبتلكوا اللى داير ف الشوارع
ماشفت قلب ف مرة شارى , الموضة خلّت كله بايع
هقفل محلّى وافطر واحلّى وشوفولكوا صرفة ف اللى ضايع
لو عرفتوا ترجعوه....هافتح محلّى واقول ياهوه
تعالى خدلك صورة حلوة لاحسن ف يوم تسود تانى
واللى ف يوم يسودّ منّا , نعرف خلاص ... بياضه فانى
ملكش نفس؟ طب غور يا نحس بس افتكر انى مش انانى
حبيت اسبلك ذكرى حلوة تبنى عليها عالم امانى
بدل ما تفتح شباك الحقيقة و تنط منه وتقول اه يانى
خلاص حاسيب فى الدنيا مكانى لانى اقتنعت على رأى الست...
عمر اللى راح ما هيرجع تانى