حب الوطن عندنا 00 وعندهم

حب الوطن عندنا وعندهم

حب الوطن عندنا
يعني خضارفي الغيط
يعني طبيخ في الحلل
يعني خبيزفي البيت
يعني حمار م الخجل
يعني عروق بتشيط
حب الوطن عندهم
بيساع زعيط ومعيط
بيساع قليل التنا
والمرمي جنب الحيط
والمتني زي القصب
والمرخي زي الخيط
حب الوطن عندنا
يعني الشرف مالنا
والطينه يعني البلد
والخوف علي عيالنا
حب الوطن عندهم
فلوس تجيب في فلوس
مايهمهمش الشرف
لوناموا للهكسوس
حب الوطن عندنا
زغروطه وسط الدار
لما يطيب البلح
ولا يطيب الجار
ويوم سبوع الولا
لازمن ندق الزار
نسيب عجين العشا
ونجري بالمشوار
حب الوطن عندهم
يعني الشرف مجروح
بيسيح قصاد الدهب
ويطير ورا الأبوح
ويعود في توب الخجل
زي إللي كان مدبوح
حب الوطن عندنا
وفاء مابعده وفاء
القلب يعني الوطن
والمعده بيت الداء
صابرين علي المفتري
والترزي والسواق
باض الحمام ع الشجر
وإنشرخت البيضه
ساح العرق ع المرق
لما بقت عيضه
القط أصله أسد
والسم ف الترياق
حب الوطن عندهم
شنبات ومبرومه
علي صقر ولا قفص
ولا علي حكومه
رجاله وقت الخطر
وفيال بزلومه
لو حد داس أرضهم
ولا دخل روما
تلقي الحصون إتبنت
تلقي القلاع كومه
تلقي السيوف إنبرت
تلقي السهول عومه
حب الوطن عندنا
الموت علينا حق
واحنا إللي طول عمرنا
مانقولش آه علي لأ
حاولنا نمنع أذي
بس الأذي ف النأ
تعبان بيضرب جرس
لابد بطول الشق
بيخرب المبتدا
سايب خبر مع حد
النيل وطي عندكم
جايز يبيعوا السد
حب الوطن عندهم
قربه ومنفوخه
من كد ريع الوطن
أبو رجل مسلوخه
ولا إيجار المكن
والمكفي ف تروسه
كفايه إن البلد
متعاص علي عوصه
ولسه ف المعمعه
بيقلبوا الخلطه
ويملوا ف البردعه
لما خراب مالطه
حب الوطن عندنا
طعميه ورغيف عيش
نحمد عليه ربنا
وندعي باللشويش
يارب ديم النعم
وأسترها يامنان
البت تلحق عدل
والواديروح الجيش
حب الوطن عندهم
كنتاكي بالبطاريخ
ويشتوا ف المندره
والصيف علي المريخ
وولاد ماهيش من هنا
وبنات عليها تاريخ
ممضيه من تاتوه
أحمر ولا البطيخ
والبنطلون وطووه
اما القوام ع السيخ
صبيان في لحم بنات
وبنات في لحم فسيخ
حب الوطن عندنا
رضعينه بالسرسوب
شدين أثاثه جبل
زانقين عليه بالطوب
مكتوب عليه إننا
وإنتم عليه مكتوب
تشوفونا حبه زبل
ونشوفكوا بالمقلوب
نفقد معاكوا الأمل
ولا الغضب مطلوب ؟؟
حب الوطن عندكم
مشدود علي النبله
قاريين عليه فتحته
عدلينه ع القبله
خاصيين كلاب البلد
بس القطط حبله
من فين يا عم الوتد
والحبل والجمال
والسوق مافيهشي دكر
يقرص 00ولا حبال
يفتل حبال مشنقه
ويعلق التمثال
حب الوطن عندنا
مكتوب علي قلوبنا
لا بنصرفه دنانير
ونحطه في جيوبنا
ولا نشتري جرانين
ونداري في عيوبنا
أبو زيد يقول في المثل :
باطك تكون قبطان
وترمي بذرة دره
تملا إيديك فدان
تغلط في لف العمامه
حتلخبط القفطان
أدهم يقول للولد :
ذندك ورا دراعك
تقدر تزيح الجبل
وف ضهر أتباعك
تلقي الشجر والثمر
وتلم في بتاعك
حب الوطن عندهم
مكتوب علي النوته
مرصوص في قلب الكتب
من ضمن حدوته
ابو زيد يهز البلح
أدهم علي التوته
تاريخ علي الأرصفه
جغرافيا ع الفوطه
هما العبور والعبر
هما الصلا في الفرض
هما إللي شالوا الوطن
بعد الوقوع ف الأرض
هما السلام والأمل
هما الهلال والجمل
هما البنوك والخزن
هما الصكوك والقرض
حب الوطن عندنا
منقوع في قلب الدين
ع الفطره من مهدنا
ع الزهد ومسالمين
ولما جانا الرسل
بالوحي يهدونا
لقينا جوه الكتب
إسمك يا مصريين
مين إللي قال ربنا
تدخل له من لحيه 0؟؟
ولا بقص الشنب
تبقي النبي يحيي
مين إللي قال ربنا
عايز وساطه حد 0؟؟
يساعدنا يوم اللقا
ويكون مجهز رد
مين إللي شاف قال لنا
إن العذاب في القبر
والظالم المفتري
ينفع معاه الصبر 0؟؟
حب الوطن عندهم
في المنظره بالدين
شيوخ ومتسلطنه
ع العقل والمصارين
حالقين علي المسطره
حتي البدل ترلين
قمصان ومتشجره
والكحل مالي العين
بيدعوا ويعيطوا
ع الشات وع الظالمين
ويقولوا يا ربنا
خرجنا منها سلام
بعد العشا حصصوا
من أمة الإسلام
أما الغلا والكوا
من ظلم بعضينا
مالهش دعوه الولي
ولا قصده يفتينا
الفقر يعني الكسل
والشغل في إيديكم
حيعمل إيه الولي
يسرق 00 ويديكم 00؟؟؟

Smile

ملحمه شعرية
وكمية مشاعر وثورة وعنف
وأسى وشجن وشقى
.....
والشعر هو لسان حال الشاعر
وهو اللحظه التي يصغيفيها الشاعر جيدا الى نفسه .. فيقول

محبتي والخالصة
أحمد

م عطية شواش
رائع كعادتك

أسعدتنا بما خطه قلمك
عشت ولا هنت ولا فض فوك
تبل تحيتي ومودتي

الاستاذ الشاعر الكبير

م / عطيه شواش

وبدون ان تضع اسمك على النص اعرف من محتواه

اسم كاتبه . بصمه لن ولم تتكرر . اسلوب السرد متفرد

ومفرداتك المنتقاه لاتخرج إلا من قلم واعى ومدرك حجم القضيه

اخى لاأجد كلمات تفيك حقك إلا ان اقول .

زادك الله وجعلك لسان حال تلك الامه الصامته .

تقديرى ومودتى وخالص تحيتى اخى عطيه ...

تثبت تلك الرائع

بواسطتى

تقديراّ للشعر والشاعر ..

الله عليك الله

استاذنا ياعطيه

صح لسانك زين

وحروف منقيه

تسلم لنا ياجميل

يا 100 على 100

تحياتى لجمال ومصدقية حرفك الساخر البناء

دمت بحب وجمال وخير

الشاعر الرائع جدا جدا

م/ عطيه شواش

صدقنى امام روعه كلماتك

وجمال معانيك التى تحدث بداخلنا

ثوره داخليه لا اجد من الكلمات

ما يعبر عن اعجابى بتلك القصيده

من مضمون وفكر واحساس

وصلنا ألينا بصدق

رائع كعادتك

دمت بكل خير

الأستاذ عطية شواش

ما اجمل الابداع بين يديك

ما احلي الصور والتعبير

عنها وما اصعب حب الوطن

في هذه الأوقات العصيبه

لنا وله الله....

دمت بكل خيروابداع Cool

الأستاذ الفاضل / عادل بك سند

أولآ شكرآ علي التثبيت بالعند في صلاح الطاهر

ثانيا شوقي لملاقاتك أولآ هو حافزي الأهم لحضور الندوه

إنشاء الله 000 وعشان أفكرك بموضوع القياس إياه

ولو أنني أعرف أنك الأطول قامه ومقامه

وعشان كمان أسألك :

ليه الحمار

بودان كبار

مع إنه دايمآ يتشتم ؟؟

وطول قفاه

فارق معاه

مع إنه لازم يتختم ؟؟؟؟

تحياتي القلبيه

الشاعر الكبير
الضارب بجذوره في الوجع
م عطية شواش
لا يسعني إلا أن أقول من وحي ابداعك

هذه الكلمات :

حب الوطن عندنا- حيــــــاة بترفض موت
حب الوطن عندهم- أنا واللى بعدي يموت

حب الوطن عندنا - عرق وفاس وشادوف
حب الوطن عندهم - راحة مليها الخوف

حب الوطن عندنا - عمره مايعرف ليه
حب الوطن عندهم - كرسي وقعدوا عليه

حب الوطن عندنا - دموع وحرقة وآه
حب الوطن عندهم - عيل ف مولد تاه

حب الوطن عندنا - كانسر وموت مسجون
حب الوطن عندهم - لانسر , هامر ,وعيون

حب الوطن عندنا - ثورة وغضب وافعـــال
حب الوطن عندهم - كورة ولعب عيال

حب الوطن عندنا - وابور ولمبة جاز
حب الوطن عندهم - بيع الأثار والغاز

حب الوطن عندنا - خلق الحياة م الطين
حب الوطن عندهم - دفتر شيكات ,نياشين

حب الوطن عندنا - شعرك يا ابو شوّاش
حب الوطن عندهم - ماطلعش م الانعاش

أنا ف الطريق إليك
الظاهر إن نبوءتك حتتحقق

وحياه ربنا 000 وغصب عنك

لو أنا قلت هذه القصيده في أي تجمع

لازم أضم هذه الابيات ليها

قصيدتك أخي عاطف انستني قصيدتي

علي العموم مرحبا بك في نبوئتي 00 بيتك ومطرحك

أخي عاطف قلت لهم في إحدي اللقاءات :

( في المزبله 00 عثرت علي الشئ الأكثر ملائمه لأصفكم )

ربنا يجعل كلامنا تقيل عليهم

رمضان كريم 00000 تحياتي

قصيدة رائعة حقيقي تعبر عنا بصدق
وكذلك التعليق للأخ الشاعر عاطف عاشور
وأحييك على هذه الروح الجميلة
التي أتمني أن تسود بين الشعراء

علي فكرة أنا مجرد متذوق ولست شاعرا

دمت بخير شاعرا كبيرا وإنسانا نبيلا

ألشاعر الأستاذ / يسري حنفي

إنت فين ياعمنا ؟ 000 والله ليك وحشه

سعدت بقصيدتك الجديده علي المنتدي

كما سعدت بمرورك علي كتاباتي المتواضعه 0000 تحياتي

استاذنا عطيه شواش

تحياتي لما كتبته من الم ووجع الله يسامحك بقي وتقبل مروري وتعليقي

***********

حب الوطن عندنا
أزمه وطفح ذنوب
حُرقه ووجع في قلوب
ضمير ومات مقتول
ونقول قدر مكتوب

حب الوطن عندهم
دمل وخر في بدن
وقلوب ملاها العفن
دا الحب مات ياجدع
كان الجشع له كفن

حب الوطن عندنا
ميه راقده في برك
غفره ناقصها الدرك
صرخه في نفس مقطوع
جمل وبينا برك

حب الوطن شواش
زيطه وصدع في الراس
وشعر طق الحنك
حماس بدون احساس

حب الوطن
بيساوي راحة بال
يديني اربي عيال
يقاسمني خير مع شر
ويعني ع الاهوال

إبني العزيز الشاعر الوسيم / أحمد موسي

أخيرآ تحسن النسل في مجتمع الشعر

ممكن تسلفني النضاره دي شويه ؟؟؟

إبني العزيز 00 لاأشغل نفسي عاده بكيف يكتب الشاعر

هذه المسأله تحلها الدراسه إذا شاء الشاعر

ولاكني معني جدآ عن ماذا يكتب الشاعر

قضاياه 00 دوافعه 00 إنحيازاته 000 رؤيته الثقافيه

إنتمائاته00 ناسه 00 قدرته علي المشاركه في الفعل الإجتماعي

أحمد 0000

لتكن فردآ في جماعه الإسود خير ألف مره من أن تقود النعاج

شكرآ علي مرورك 0000 تحياتي

أخي العزيز / طاهر الصوفاني

وبعدين معاك إنت وعاطف عاشور

نستوني أنا كتبت إيه ؟؟؟

علي العموم القصيده بتاعتي بقت تلاته متر

وعلي الله حد منكم يقول دي بتاعتي

حعملها كليب وإبقوا قابلوني

ولا نروح القسم أحسن

تحياتي لعبقريتك الحاضره

الشاعر الجميل الطويل اللذيذ

ولا حب العزيز شاعر الملاحم

المهندس عطية شواش

Smile

تحياتى اليك والى قلمك المبدع

ايها الأخ العزيز

كل سنة وأنت طيب

أخي إللي فاضل د / صلاح

إيه حكايه كل سنه وإنت طيب إحنا مش مع بعض كل يوم

ولا فيه صلاح طاهر تاني ولا إيييييييييييييييييييييييــــــــه ؟

علي العموم كل سنه وإنت بألف صحه كذلك الجبان حازم

حب العزيز

طعمه لذيذ

لاكن أكيد نفسك تدوق

لحم المعيز

فتعالي عوم من غير هدوم

عشان ياذوق

شكلك يغيظ

إعزمني علي قهوه 00000 تحياتي

عزيزي الشاعر الرومانسي / حسام خليل

لازم نتقابل علشان نشوف إيه موضوع الرومانسيه دي

وهل يمكن علاجها أم إنها إنتشرت وبقت حاله مزمنه

إنشاء الله تخف قريب وتعاود نشاطك وإلا 0000000

أخي العزيز 00

لمداواة الواقع

أحتاج إسبرين وديتول

لأطهر أنبياء الكلام

تحياتي 000 لقاء في شوق إليه أنا 00 علي أول المنحني

حب الوطن عندهم
يعني الشرف مجروح
بيسيح قصاد الدهب
ويطير ورا الأبوح
ويعود في توب الخجل
زي إللي كان مدبوح
حب الوطن عندنا
وفاء مابعده وفاء
القلب يعني الوطن
والمعده بيت الداء
صابرين علي المفتري
والترزي والسواق

[b]

الله الله الله عليك ياعم عطية شواش

عليا النعمة انت مثقف واعى وكبير اوى

وعندك قدره نادره على توصيل الاحداث بالحدوته والملتوته

معلم وسيد الزجالين كمان وليك عندى واحد شاى بالنعناع على الحلاوة دى

فكّرتنى واحنا صغيرين لما نغنى ونقول( أبوح ياأبوح كلب العرب مجروح )

بس مش عارفه ليه كنا بنسمى الطيارة الورق ابوح؟؟

ومين هو كلب العرب اللى كان مدبوح ؟؟

كنا بغبغانات وعيال ومش فاهمين معنى الكلام اللى بنقوله

بس انا طبعا كنت لسه متولدتش وانت بتقول الكلام ده صح؟

ههههه

شكراً لزجليتك الجميلة اللى رجعتنى لأيام الطفوله

وتسلم لنا دايماً ياشرقاوى يا اصيل

اختك الشاعرة وفاء امين الشرقاوية [/b

Cool

من حسنات الإنترنت
هو التعرف على شاعر كبير مثلك
أخى م عطية شواش
أحييك على هذه الروعة
و ساكون سعيدا جدا لو وجدت غدا
فى ندوتنا باتحاد الكتاب
دمت بخير
أخوك

شقيقتي وبنت بلدي الأستاذه / وفاء أمين

يقول نجيب محفوظ في إحدي كتاباته :

كنا ونحن أطفال نخرج في المظاهرات ننادي

بالأستقلال التام أو الموت الزؤام ولم نكن ندري ماهو

الإستقلال التام وما هو الموت الزؤام ؟؟

كذلك ونحن صغار كنا نغني أغنيه أبوح ياأبوح

وعلي فكره الأبوح الورق غير الطياره الورق

( أصل أنا لعبت بالأثنين )

قطعآ لم نكن نعي معني الكلام

وعندما وعينا وفهمنا لم نكن أكثر سعاده مما كنا

ليتنا دمنا أطفالآ 00 وعشان كده تلاقي في كل شاعر

حته عيل صغير لايخرج منه أبدآ ( تدوم علينا المعيله )

يقعد يطنطط جوه صدره ويتشاقي

علشان كده جايبين المشاكل لأهالينا دايمآ

قاتل الله سن الرشد 00 إنه السن الذي نفقد فيه الرشد تمامآ

الشرقاويه الأصيله / الست وفاء

عندما قرأت قصيدتك ( عتاب من مرة لملوم )

تذكرت أننا تقابلنا في قصر ثقافه الزقازيق

يومها أعجبتني القصيده وطريقه الإلقاء الصعيدي

عزيزتي 000

لم يبق لدينا ما يكمل البدايات حتي

فهيا نعود لعهعود الطفوله

أشكرك علي تشريفك لي والشاي وصل 000 تحياتي

أستاذنا الفاضل / عاطف الجندي

أنا مدين لك بشكرين 000

أولهما قبولي عضوآ علي ملتقاكم الرئع

وثانيهما أنك قبلت ندائي بقفل موضوع قصيده

نجم إياها وأظنك أنك إستشعرت مثلي

بخطوره أن نهمل نقد نص ما وننشغل

بمحاكمه صاحبه إلي حد الإستخفاف بتاريخ

رجل علي الأقل كثير منا مدان له بفضل الوعي المبكر

وأن المنتدي كان في بدايه الإنشقاق حول هذا الأمر

شكرآ لك أستاذ عاطف علي حرصك للمنتدي

شكرى لك دخولك الكريم 000 وكل عام وأنتم بخير

الأخ العزيز / عمرو محمد فريد

أشكر لك مرورك الكريم

وإنشاء الله تتعدي مننا وتصبح شاعرآ كبيرآ

سندريلا المنتدي الأستاذه / اميره البدري

مانيش مغير من طبعي

ولو مليتوا الطبع جروح

النار ماتحرقشي صوابعي

الطبع يطلع بعد الروح

مانيش مغير من طبعي

شكرآ سندريلا دخولك الكريم 0000 كل سنه وإنت طيبه

» عندنا زيارة
» لو كان عندنا احساس
» تاه الوطن
» حضن الوطن
» عاد إلى الوطن!