فى طابور العيش

فى طابور العيش

واقف يوم ف طابور العيش
غصب عنى علشان أعيش
علشان آخد بس رغيف
وأكل وأستنى التفتيش
ولقيت ناس عمّالة بتجرى
واللى يخبط
واللى يزق
واللى يدوسلى كمان على رجلى
بسأل واحد
قاللى : ياحضرة دا بيجروا لطابور الغاز
بقيت محتاس
أجرى معاهم ؟
ولا أستنى عشان العيش
متعقدنيش
هو أنت مستنى العيش
دا الأنبوبة بعشرة جنيه
عشرة جنيه ؟!
طب والغلبان يعمل إيه
ولو معرفش يجيب الغاز
ولا حتى يجيب لترين جاز
طب يطبخ أكله على إيه ؟
أما صحيح أنا راجل أهبل
و ف طوابير الغاز هتبهدل
وأجرى وأخبط
و أرزع وأضرب
علشان أجيب انبوبة غاز
أنبوبة وبعشرة جنيه ؟!
طب بالمنطق كده والعقل
دإن كان لسه فاضلنا عقل
لو جيبنا ولحقنا الغاز
ومليت أنبوبة البوتوجاز
هطبخ إيه ؟!
دالعيش بنجيبه بالعافية
والجوع ساكن جوة بيوتنا
والرجلين ماشيين بيها حافية
تن تن تن تن
تن تن تن تن
تن تن تن تن تن تن تن تن
تن تن تن تن تن تن الكافية
حتى القمح بتاعنا مفيش
طب بتودوا فلوسنا دى فين ؟
للمساكين ؟!
متعقدنيش
دالمساكين واقفين فى طابور
يوم ع الغاز
ويومين ع العيش
والكل سامعنى وبينفض
ويقولى : دأنا عايز أعيش
طب روح عيش
وخليك طول عمرك مستنى
ومتشحطط ف طابور العيش

* * * * *

الشاعر الخلوق أبو عدنان

ياما طابور العيش غلبنا

دقدق فينا ودق عضامنا

زى حاجات وحاجات تعبانا

عقلى يشاور فيها لسانى

إنه يبوح وكلام مدبوح

عايز يطلع من جواياه

بكره العيش راح تحلم بيه

وف درجات السلم تقعد

تشكى لربك فين تلاقيه

ياأبو عدنان متزعلش قوى

بكره أحلى من أنهارده

ههههههههههه

أتمنى يعجبك مرورى

أبو عدنان الجميل
مرحبا بك فى بيتك و منتداك
زو أهلا بشاعر جميل
اتعرف على شعره لأول مرة
أحييك على هذه القصيدة الهادفة و الهامة
و المؤرخة لفترة عصيبة نعيشها
دمت بخير
أخوك

ليلي فى زمانا بتغيير
جالها عزول اسمه الطوابير
صبح الشاعر يكتب عنه
ويبقى اساسي كمان من فنه
شئ رائع ان تعبر عن قطاع عريض من الشعب
مع خالص تحياتى لك ايها المبدع

أستاذى الشاعر القدير / عادل عوض سند
أسف لعدم الإلتزام بقانون المنتدى فحقيقة أنا لم أكن على دراية به
وأعدك فى المرات القادمة أنا يكون الإلتزام حليفى

شاعر جميل واحساس راقى وكلمات تمس الحياه الاجتماعيه تقبل مرورى يا وابو عدنان

المبدعة الرائعة/ وداد الهوارى
شكرا على مرورك الكريم الذى أضاء متصفحى
دمت بكل خير

الشاعر الجميل / أبوعدنان
قصيدة جميلة جدا
بس خلى بالك كده مش هتلحق تربى عدنان
دمت بكل خير

الجميلة / حسناء الخطيب
شكرا على مرورك الجميل
دمت بكل خير

الشاعرة الرائعة / رشا فؤاد
أشكر لك مرورك الجميل الذى دائما ما يشعرنى بأنى ما زلت حيا
وعذرا إن كان ردى على تعليقك على القصيدة جاء متأخرا
دمت بكل خير

الزجال الرائع / محمد سرور
شكرا على هذا المرور الكريم
دمت بكل خير

المبدع الرائع / محمود نايف الشامى
أشكر لك هذا المرور العاطر

دمت جميلا