تخاريف

تخاريف

(1)

المدبح

ياسلام عليك يا صبى المعلم
لما تتعلم الدرس وتبقى معلم
دخل معلمك المدبح دبح وعلم
درس دبح البقره والحمل والجمل
وغسل ايديه م الدم وخرج سلم
واستلمت المدبح انت وبقيت المعلم
نفخت وسلخت وعلقت
وبعت اللحمه والسقط يا معلم
ولسه راقد ف المدبح تعلم
صبيانك تفرش الجلد وتملح
تبيع بالقدم ولا بالمتر وتهلب
للى عايز نهيبه من جلد البهيمه
وكله على عينك وحسابك يا معلم

**********
(2)

بطاقة تموينية

قالو فى الامثال المصريه
يا مستنى السمنه من بوز النمله
ماعادتش تفرق ورقيه من زكيه
والحكايه كلها كيلو سكر ونص زيت عربيه
والفرق مش كبير بين الحر والحراميه
الرز مكمكم والسوسه فيه اد السحليه
والشاى باكو شربه معويه
وفضحنا بالدعم ولاد الحراميه
******

(3)

الشفافيه


كل ما ا سمع كلمة شفافيه
بتملا ودانى وتملا عنيه
واقول لنفسى انا جاى من بلد تانيه
مع انى داير فى الساقيه
ومغمى عنيه وماسك بايديه
ناف الساقيه الفه يطلع ميه
اصل الحمار اتقمص ورفض الغماميه
وقال قال ايه فيه شفافيه
وخايف رجله تقع فى الميه
وانا مش فاهم الحته ديه
هى الشفافيه مال ولا اعمال مستخبيه
ولا كلام مسئول بيتقال
وفك مجالس تغطى السؤال
******
(4)

تيت .. تيت

حاسب ياعم ....
انت سايق زماره ولا عربيه
ولا ماشى وحدك فى سكة تانيه
اعمل حساب عيانين ومذاكره
وشيل ايدك عن زماره العربيه
وحرام عليك تعلى نور العربيه
وتركب لمبه زيبق الف ومايه
وتعمى المقابل وحادثه مروريه
مات الراجل والولاد والوليه
ربنا مش هيسيبك وهتتحرق بالعربيه
دا السواقه فن وذوق مش فهلويه

عصام سالمان