أنا المعني اللى ف سكوتك

أنا المعني اللى ف سكوتك


أنا البحر اللي كان موجه بيتمادي

وأنا الشئ اللي ذاد شوقه وكالعادة

ببيع الصبر لصحابي

وأنادى لكل أحبابي

تبعني لما تسمعني

أنا الشئ اللي يمنعني بيوجعني

أنا العاقل وأنا المجنون

وأنا الشئ اللي يتحرك ف بحر سكون

بحب الدنيا وأتهجى حروف الكون

وأحب إنى أعيش ليكى وأغنيلك

مأنا الروح اللي بترفرف على جبينك

وأنا الطين اللي مترسب على نيلك

انا عشقك وانا زادك

انا بخورك لحسادك

وغير حبك مبعرفشي

ولسه الغنوه اهى بتكمل

مكملتشى

مقدرتشى تبروز معنى جواكى معرفتشى

تزيح الهم عن توبك

تزيل العلة من جسمك

ومين غيري يرتبلك حروف اسمك

ومين غيرى يكملك حدود رسمك

م انا ابنك

وشفت بعينى عصفورة بتضحكلك

وترسملك

أمال طايرة على جناحها

رسمت الدنيا فزوره وكان الحل أفراحها

لمحتك وانتى بتميلى

فمدتلك بساط الشوف

لمحت عيونك الصافية

عيون تهدى ولا بتشوف

بنبدر أرضنا حبك

فترجف أرضنا م الخوف

خيال الضل اهو اتجسد على حطانك

وتاه أبنك مبين حبك وسجانك

وانا أبنك وانا حبك وسجانك

ودى اشلاء بشكل بيها اوطانك

مأنا فنك وانا صوتك

وانا نبضك وانا موتك

وانا حسك ف اناتك

وانا المعنى اللى فسكوتك