بعلل وعيش الحياة

8/6/2010

بعلل وعيش الحياة

بعلل وعيش الحياة ... واضرب القلَّة
برطع ف كل اتجاه ..ف الخلق واتسلى
ما عدش ف الدنيا ناس وقت الخشى يخزُّو
هات خنجر الغدر غُزُّو ، وفرتك الفلة

سوق العبيطة وهِيْصْ وانسي لجام العقل
وامسح من القواميس بشويش ورا - ع المهل
اسمك علي دراعك عنوان لكل البشر
ولو مسجل خطر يبقي طريقك سهل

سيبك من الأحاسيس كلمني ف الجبروت
وف زحمة الأتوبيس لما الضمير بيموت
ولا تلقى وقت اللزوم حريف ولا فهلوى
ما بين مركز قوي ولاطش البنكنوت

وواد معدي يبيع أستك وموس وأمير
قبل امّا يلزق يفك " مهي قايمة ع التغيير"
وواحدة "حُط النقط" وواحدة "حوش يااارجب"
أما اللى لزقة عجب كرسي لزق بـ " أمير"


سيبك من الهلفطة ف الشعر والتلبيخ
فيه شعر غاوى نكد ودودخة وتدويخ
وشعر ياخد كيانك تسمع يشجيك
وشعر أصعب عليك من شرقة البطيخ

"البانجو"فوق الرصيف يتباع كما المناديل
والرقْع ف الكاسِيتَات طول النار والليل
شوارعنا صبحت " فاشون" للبنطلون الرش
والنت ويا الدش مسحوا دماغ الجيل


مليت أشوف الكآبة حاضنة أبوابنا
وأجزخانة الفرح بتقوللي "شطَّـبـْنا"
وخطوة المهزومين بتْجُرّ فوق الرصيف
واللى اسمه أيه "الرغيف" ف طابور عذبنا

مش كل أهل البلد وزرا ورجال اعمال
ولا كلهم "عصبجية" و غاسلي أموال
نظرة يا خالتي الحكومة ، نظرة يا والى
الرز غالي وأنا ويايا 6 عيال

مش عاوز أبقي غني ولا عايز أكون مسئول
ولا أبقي يوم مرتشى بالعرض أو بالطول
أنا نفسي احس بكرامة وان اكون انسان
ولا اباتش فيها مهان بين "عربجي" و "دلدول"

عاطف عاشور