كلامنا عامى..فتح مكه

إفرحوا أيها المسلمون ...هلِّلُوا وكَبَِرُوا..واسجدوا لله شكرا وعرفانا الذى انعم عليكم بفتح مكه مره

تانيه ..نعم أيها المسلمون مكه اتفتحت مره تانيه على يد حركة حماس الفلسطينيه ..طبعا كلكم دلوقت

بتقولوا الجدع بقول ايه وبخطرف كده ليه..هو ايه اللى حصل ؟؟ اقول لحضراتكم اللى حصل إن اخبار

المعارك الضاريه الدايره بين حركة فتح وحركة حماس نقلت لنا عن القيادى الحماسى سامى ابوزهرى

ومش عارف اقول سامى بن ابى زهرى طالما بقى بنتكلم عن فتح مكه ولا اتكلم عادى المهم ان الاخبار

حملت لنا كلام الرجل بإن الاستيلاء على مبنى أو مقر الأمن الوقائى يعتبر زى فتح مكه ايام النبى محمد

عليه الصلاة والسلام ...يا سلاااااام..شوفوا الفتوحات العظيمه لما تهل على الأمه من غير ميعاد ..لكن سامى بن

ابى زهرى لم يخبرنا هل أمر رئيس الوزراء اسماعيل بن هنيه أحد رجاله اللى صوتهم حلو أن يصعد

فوق المبنى ويؤذن كما امر النبى صلى الله عليه وسلم سيدنا بلال بن رباح وهل أمر اسماعيل بن هنيه

أحد رجاله ان يطوف فى شوارع غزه وهو بيزعق من دخل دار ابن هنيه فهو آمن ومن دخل دار سامى بن

ابى زهرى فهو آمن ومن دخل فى دار أحد اعضاء حركة حماس فهو أمن ومن بقى فى بيته انشاء الله حنهده

فوق دماغ اهله ..وهل بعد ما تم فتح مكه اقصد فتح غزه خرج اسماعيل بن هنيه لخصومه وقال لهم اذهبوا

فانتم الطلقاء لان فيهم إخوته وعماته وخالاته الفلسطينيين..أشك ان ابن هنيه عمل كده ولو حتى كان محمود

عباس أقصد محمود بن عباس كان هو اللى انتصر كان حيعمل كده ويسامح أهله اللى ربنا بلاهم بيه وبابن هنيه

لان التلفزيون وراناإزاى الفلسطينيين بعاملوا بعض وشفنا شوية علوج حلوه علوج دى مش كده ؟؟ الله يمسيه

ولا يصبحه بالخير بقى عمنا الصحاف هو اللى علمهالنا قبل ما يمشى هو كمان مع أحد مرات غروب الشمس

العربيه المستمر .. المهم إننا شفنا شوية علوج معرفش اذا كانوا من علوج فتح ولا علوج حماس لان المسأله

بقت كلها علوج الواحد منهم ماشاء الله نص بيت وأكتر كمان.. شايل رشاشه على دراعه ماشاء الله وعمال يجرجر

فى اخواته الفلسطينيين ويزقهم زق جوه عربيه أومَّال مش علوج يا عمنا ..وكمان شفنا علوج حماس الاشاوس

بعد ما استولوا على مكتب ابن عباس ماشاء الله واحد منهم قاعد على الكرسى طبعا ما هى أمَلَهْ مكانش يحلم بيها ننوس عين امه

والتانى حاطط رجليه فوق المكتب يا حلاوه ايه ده أسد يا واد واقف غضنفر اسم النبى حارسه وصاينه ..طبعا ناس فتحت

مكه يا عالم من حقهم يفرحوا ويتنفخوا ويعملوا فيها أشاوس ومغاوير وكمان شفنا ازاى المغاوير العلوج حرقوا العربيات

وولعوا الدنيا وروعوا أمن الفلسطينيين وبعد كده قعدوا يرقصوا وهم مزقططين.. بس وايه يعنى المهم إنهم فتحوا مكه يا فرحة

أمهم بيهم وفرحة الامه كلها بخيبتهم وبوكستهم اللى مش على حد..

..وبعدين سمعنا ان ابن عباس حل الحكومه وابن هنيه حل الكلمات المتقاطعه والشعب الفلسطينى إتحل وسطه يا عينى وهو فى قلب الرحايه ابن عباس

من فوق وابن هنيه من تحت لاحول ولا قوة الا بالله ..المهم يا اخى إنك لما تشوف العلوج اللى عاملين زى التيران دول

تقول ازاى العرب عنهم العلوج دول وارضهم محتله من امريكا واسرائيل وشعوبهم مذلوله وبينضربوا وبيتهانوا فى ابوغريب وجوانتانامو

وسجون اسرائيل ليل ونهار والعلوج دول موجودين...نقول لك يا سيدى العلوج دول ميد إن أرَبْ كَنترى اى علوج صناعه عربيه داخليه

لزوم إرهاب العرب فقط وشعوبهم فقط مش لارهاب اعداءهم لا سمح الله ..طيب انا بقى نفسى اعرف

لصالح مين كل اللى بيحصل ده وليه فتح وحماس مسيبين علوجهم على بعض ونازلين طحن فى بعض

طبعا كل واحد حيقول على التانى إنه خاين وإنه باع القضيه فى سوق الكانتو ولهف القرشينات كلها لوحده

ومفرقش على اخواته كل واحد نصيبه زى ما علوج حماس بقولوا إنهم ضبطوا جهاز كمبيوتر متصل اتصال مباشر

باسرائيل وطبعا علوج فتح حيقولوا انهم ضبطوا أوراق بتقول إن هنيه بياخد اوامره من اسرائيل ولا معرفش منين

طبعا ما احنا فى توجيه الاتهامات ولزق التهم بالخيانه والعماله ماشاء الله علينا صواريخ عابره للقارات

وانا عن نفسى مستعد أقطع رغيف على عينيا وأقول إلهى يجينى ويحط عليا واحلف ع الختمه وع النعمه إن ماكان ابن عباس وابن هنيه

أساميهم موجوده فى كشوفات المرتبات بتاعت مجلس وزراء اسرائيل وإنهم بروحوا كل شهر يقفوا فى الطابور

قدام خزنة أدون أوزوروف عشان يقبضوا مرتباتهم وفيه كمان واحد معرفه شافهم وهم مزمزقين أخر الشهر اللى فات

وهم بيقبضوا عشان عاوزين اسرائيل تزود حَبَّه الحوافز والاضافى والارباح لان العيشه بقت غاليه نار وكمان عاوزين

ياخدوا بدل طبيعة عمل لانهم يا عين أمهم معرضين حياتهم للخطر ليل ونهار بسبب إسرائيل ولازم اسرائيل برضو تراضى

حبايبها وتدفع تمن راحة بالها للناس اللى بيحموها زى عينيهم وبخافوا عليها من النسمه الطايره ...

وأمجاد يا عرب أمجاد

و الله معك حق
يا أخي يحيي لا نعرف
لماذا هذا القتال الدائر
بين فتح و حماس و لماذا
لايوجهون بنادقهم ناحيت اسرائيل
ربنا يهديهم و يصلح بينهم
تقبل مروري المتواضع
أختك
سارة
geek

ربنا يهدى ما بينهم يا استاذ يحيى
وموضوعك شيق
اخوك
تامر محمود
king

أيه الجمال ده يا عمنا يحيى ؟
موضوع شيق وأحسنت فى طرحه وعرضه بروحك الساخرة
حتى فى أصعب المواقف وشر البلية ما 000
مودتى
afro

جميل يا استاذ يحيى
نقد بناء وربنا يهدى النفوس بين أشقائنا الفلسطينين
أختك بنت النيل

مشكور يا استاذ يحيى على موضوعك
وأحسنت
مازن الجندى

اسلوب جميل
رائع يا خوى
اختك
زهرة برية

» كلامنا عامى..ضَرَبَ زَيْدٌ عَمْرَا
» كلامنا لسه ف أوله
» شعــــــــــــــــر عامى
» شعر عامى
» شعر عامى