كلامنا عامى..ضَرَبَ زَيْدٌ عَمْرَا

اصدقائى..

لما كنا تلميذ صغير فى الابتدائى كان عندنا جُمله فى كتاب المطالعه الرشيده

بتقول ( ضَرَبَ زَيْدٌ عَمْرَا..ضَرِبَ عَمْرٌو زَيْدَا )وكنت طبعا مش عارف الجُمله

تقصد إيه غير ان زيد ضرب عمرو وعمرو ضرب زيد والاتنين نازلين ضرب فى بعض

ومش ببطلوا ابداً طبعا مانا كل ما أفتح الكتاب ألاقى لسه زيد بيضرب فى عمرو وعمرو

هو كمان بيضرب والاتنين لسه بيطحنوا فى بعض وطبعا كنت بقول لنفسى وانا مالى يا عم

يضربوا بعض يولعوا بعض بجاز انا ماليش دعوه أنا كان اهم حاجه عندى النجاح آخر السنه

وإنى أسمع كلام جدتى اللى كانت تقوللى تروح المدرسه فى حالك وترجع فى حالك ومالكش دعوه بحد

عشان كده ماكنتش بسأل مين زيد ومين عمرو ونازلين فى بعض ضرب ليه ..وكمان مافتكرش

إنى شاركت فى اى خناقه من الخناقات اللى كانت بتحصل فى المدرسه حتى لما تلميذ من فصل تانى

ضرب تلميذه من فصلنا والبنت جت تعيط وتشتكى للواد معتصم عبدالعال فتوه فصلنا ايامها وقعدت تعيط

وتقول واااا معتصمااااااااه الواد معتصم لم يهدأ الا لما عمل هجوم على فصل الواد المعتدى ودارت معركه

كبيره بين الفصلين أستخدمت فيها قوات الجانبين الاسلحه التقيله والخفيفه والنص والنص وايضا اسلحة

الدمار الشامل وانتهت المعركه بتدخل قوات السلام المكونه من بعض المدرسين ثم كان قرار الامم المتحده

ومجلس الامن متمثلين فى الناظر بطرد قوات الجانبين وإحضار اولياء الامور فى الصباح ..وفى الصباح

امتلأت غرفه الناظر بالنساء المتشحات بالسواد اللى هم طبعا أمهات القوات المتحاربه من الجانبين

اللى قعدوا يعيطوا للناظر ويقولوا معلش والنبى دول عيال أيتام وسامحهم المره دى ومعرفش ليه الاباء

مكانوش بييجوا ويبعتوا الامهات بعيطوا ويقولوا على عيالهم أيتام بجد موقف غريب قوى المهم

إنى لما كبرت شويه وقدرت افهم الامور وأقرا شوية تاريخ لقيتنى بقول إيه الهَبَلْ ده ..زيد وعمرو طول عمرهم نازلين ضرب

فى بعض عمال على بطال فى الحقيقه كمان مش فى الكتاب وبس ...قبل الاسلام كان فيه الحروب الجاهليه اللى هى

حروب القبائل بينها وبين بعض ..قبيله قامت الصبح فايقه شويه وشاربين شاى بحليب وواكلين كورن فليكس

ويلاقوا مفيش وراهم شغل ولا فيه ماتش كوره فى التلفزيون النهارده يقولوا لبعض تيجى نهجم على القبيله

اللى جنبنا وهُوبَّا يروحوا هاجمين على جيرانهم اللى لازقين فيهم مش التامن ولا التاسع لا اللى جنبهم لَزق

يقتلوا الناس ويسرقوا اموالهم ويِسْبُوا نسوانهم ويأسروا غلمانهم ويدمروا القبيله ويسيبوها يا ولداه فى العراء

لا ضله ولا ضليله ..وتانى يوم نلاقى قبيله تانيه قامت الصبح فطروا شويتين فول بالزيت الحار والليمون

من عند الجحش ويدُّوها فحلين بصل تمام والفول مع الزيت الحار والبصل راحوا متفاعلين مع بعض وضربوا

فى دماغ القبيله راحت طالعه فى دماغهم يهجموا على القبيله اللى جنبهم لانهم طول النهار مفيش وراهم شغله

ولا مشغله وكمان أَهُمْ يسرقوا شوية أغنام عشان الغدا والعشا لان اللحمه بقت ب 40 جنيه عند الجزار ومحدش

فيهم معاه فلوس بعد وقف الحال اللى فى القبيله كلها والبطاله المنتشره والشباب الصايع على القهاوى يروحوا هيلا هوب

هاجمين على جيرانهم وقتلوا وسرقوا وأسروا وحرقوا..وطبعا كلنا فاكرين حرب البسوس اللى قعدت 40 سنه

وبعد الاسلام الحرب اصبحت حروب خلافه النهارده الفاطميين يحاربوا العباسيين وبعد بكره الامويين يحاربوا

العلويين وبعد بعد بكره كله يضرب فى كله ..مع أنهم فى فترات الروقان والتفكير المضبوط ونسيان الأنا وانكار

الذات عملوا حاجات رائعه زى فتح الاندلس وفارس ومحاربة الروم والتتار والانتصار عليهم وتوسيع رقعة الدوله

الاسلاميه ودانت لهم الدنيا والامجاد لكننا فجأه لقيناهم ضيعوا كل حاجه من ايديهم عشان يرجعوا يضربوا فى بعض ..

تااااانى ؟؟؟ يا عالم إمتى حتعقلوا وتشغلوا العقل اللى ربنا اعطاه لكم عشان تفكروا بيه ..وبرضو فى تاريخنا الحديث

لسه زيد بيطحن فى عمرو وعمرو بيفرم فى زيد..شفنا طبعا من مده الحرب الاهليه اللبنانيه وبتشوفوا

العراقيين بدل ما يوجهوا جهودهم لطرد امريكا نلاقيهم بيضربوا بعض شيعه وسنه واكراد وبموتوا فى بعض أكتر

ما امريكا بتقتل فيهم أضعاف الاضعاف واسرائيل لو سابت الفلسطينيين ساعة واحده من غير قتل ودبح يحصل

عند الفلسطينيين قلق يروحوا قايمين على طول ضاربين فى بعض ويشغلوا الحرب الفتحيه الحماسيه ونحاول نعرف ايه

الاسباب نتوه فى وسط الخلافات ومنعرفش مين اللى عليه الحق ومين المظلوم لان زيد على حق وعمرو صاحب حق

وزيد مظلوم وعمرو مقهور وندخل فى دوامات مالها نهايه..واللى بيحصل بين اللبنانيين والفلسطينيين على نهر البارد

والعرب ساكتين ودمهم بارد وكل حاجه فيهم بارده واللى بيجرى فى عروقهم ويسكى مش دم ...ولا حد بيتحرك ولا حد

مهتم ولا حد عنده نخوه ولا حد عنده حميه ولا عندهم ذره من عقل ...أنا الحقيقه بستغرب وبستعجب ..تكونش حكايه

ضرب زيد وعمرو فى بعضهم دى موروث تاريخى يجب الحفاظ واستمراره ..ولا تكون حاجه موجوده فى الجينات العربيه

وصعب التخلص منها الا بالتخلص من الجنس العربى نهائيا ..وضع غريب فعلا..طيب مين اللى كتب عبارة ( ضَرَبَ زَيْدٌ عَمْرَا..ضَرِبَ عَمْرٌو زَيْدَا )

وليه..وكان ايه السبب ...ويقصد ايه..يا ماكان فى نفسى أقرا ضرب زيد شارون ..أو ضرب عمرو بوش ..او ضرب زيد

وعمرو بيجين وجونسون ..والسؤال دلوقت ..ليه لما زيد بيختلف مع عمرو يبعت له اللى يقتله وليه عمرو لما بيختلف

مع زيد يبعت له اللى يفجر له فى بلاده ..وليه لما اتفقوا سوا بعتوا لبوش عشان يقتلهم الاتنين ويريح العالم منهم ومن غباءهم..

شكرا يا أخي
/ يحيي زكريا
علي هذا الموضوع
و تقبل مروري و
تقبل مني هذه
afro

أختك
سارة

أخي الفاضل
شكرا لك علي
هذا الموضوع
لك جزيل الشكر
تقبل مروري
أختك
بنت النيل
pig

هههههههههههههههههههههههههههه

والله عندك حق ياأستاذ ذكريا

كأنك سردت تاريخ العرب كله فى هذه المقالة

وكأننا نقف أمام عيوبنا على مدار السنين

لكن انت سردت التاريخ العربى فى قالب كوميدى بدون ملل

أحيى قلمك الرائع وفكرك الواعى

تقبل مودتى لشخصك النبيل

آمال مصطفى

أحسنت يا أخى معك حق
ومحدش فكر فى موضوع زيد قبل كده
بالطريقة دى
شكراً على موضوعك الشيق
وروح السخرية التى تتكلم بها فى موضوع جاد
جديرة بالاحترام
أخوك
محمد
king

والله برافو يا استاذنا
معاك ألف حق
موضوعك جميل وروحك خفيفة
فى النقد البناء مش الهدام
أخوك
أمين عثمان
Shocked

اخى الرائع يحيى زكريا
أنت تمتلك حس نقدى فى أطار السخرية اللاذعة تحسد عليه
وبصراحة لك الحق فى كل كلمة قلتها
رائع ما تقدمه وأشير عليك بالمزيد من هذه المقالات
التى تستحق بأن تضع فى كتاب مطبوع
مودتى لنبل حرفك
عاطف
clown

» كلامنا عامى..فتح مكه
» كلامنا لسه ف أوله
» شعــــــــــــــــر عامى
» شعر عامى
» شعر عامى