"جبارة" إلي المبدعة زينات القليوبي

جبارة

بجد بجد جبــــــاااااارة
وأنا معجب قوى بالذات
ولا ف ميدان ولا حارة
لقيت زيك يا ست زينات
ـــــ
يا قليــــــوبي ياهداره
تقــولك ودني "كفَّارة"
يا ساقية شعـر دوارة
بتروينا شجن وآهات
ـــــ
وكيف هتكوني "محمولة"
ف ايد غيرك ولو كان مين؟
وهما لســـة ف الأولي
بيتهجونــــــا بالضالين
لكنك واحدة عرفانــه
وقريــانـــه قراية ذات
ـــــ
وعارفة إننا بنحزن
على حال امنا والدين
ولو فـجـر الشجن يدَّن
بنركعلـه مع الراكعين
ـــــ
نصلي فرض إحساسنا
تراب الأرض بيبوسنا
_ إذا ما تنحني روسنا _
علي جبينَّا وع الشفتين
ـــــ
وآآآآه منك
وآه ليكي
وآآه م الشعر ،
وعنيكي....
بتلقُط زى عدسة "زووم"
وبتسجٍّل فرح وهموم
ـــــ
بنسمع ننزف أوجاعنا
ونصرخ للمدي يسعنا
كلامك جمر يلسعنا
ولا ينفعنا "مكركروم"
ـــــ
يغور الشعر والشعرا
يا ست زينات
إذا ما كان يضحَّكنا
يبكِّينا يستَّرنا
يعرَّينـــا
يورِّينـــا
شروخ روحنا
وف جروحنــــــا ..
يواسينـــا
يعديبنا علي الأزمات
ــــــــ
وأقولك أيه يا شعَاره؟
بجد بجد جبارة
ولا ف شارع ولا حارة
لقيت زيك يا ست زينات.
ـــــــــــــــــــــــــــ

مع خالص الاعجاب
والموة والتقدير

العبد الفقير

عاطف عاشور