إقفل يابابا التليفزيون

إقفل يابابا التليفزيــــــــــــون
مــش متحمّــــل شـــــكل الدم
كام نشرة كام موجز فى اليوم
أخبـــــــار جابتـلى يابابا الهمّ
_____

من مدبحـــة لغزو لمأســـــأة
لطفل من غيــــــر ذنب جناه
مدبوح وشكله الشاشة جايبـاه
صرخت من قلبى اللى اتغـــمّ

_____

الشاشــــة كلها دم ونــــــــــار
ولسّه بيننـــا مغول وتتـــــــار
ولاحدّ حاسس باســـــــــتقرار
ولاحدّ بالمظلــــــــــوم يهتــــمّ

_____

قالــــولى إن الحـق يـــــــدوم
لكنى شفتــه ضعيـــف مهزوم
ومهما يســــتنجد مظلـــــــــوم
لاخال بيجرى عليـــــه ولاعم

_____

الناس بقوا يابابايــا وحـــوش
شوف أدّ إيه أطفال فى نعوش
ولاحدّ قادر حتى يحـــــــــوش
ولاحدّ حدّ حتى بيـفتـــــح فـَـمّ

_____

باشوف ملايكة بريئـــة بتموت
كأى مشهد عــادى بيفـــــــوت
ودبــابــــات بتـهدّ بيــــــــوت
واصـحابهـا فى السـجن بْـتتـلَـم

_____

على صُغرى بس بقيت مكسوف
من نفسى لمّا اتفرّج اشـــــــوف
الطفل بالديناميت منســــــــــوف
آه بانكســف واللهى واتـْسـَــــــم

_____

بدأت ابصّ لبكره واخــــــــــاف
من كل شيىء حواليـّـا باخــــاف
ماالدم بس اللى بينشــــــــــــاف
الــدم بـس اللـــى بـيتــْشـــــــــمّ
إقفل يابابا التليفزيــــــــــــــــون
مشّ متـحمّـــــــل شكــــل الــدم

الاستاذ الشاعر

عبد الناصر حجازى

رغم صعوبة الكتابة للأطفال

إلا انك تمكنت من الوصول لنقطة اللفاء

بين عقلية الطفل وبين العقلية الناضجه .

اسلوب سلس وشيق وكلمات اصابت الهدف

من نشرها . تقبل مودتى وتقديرى ...

شاعرنا الجميل
الأستاذ / عادل سند
أسعد دائماً بمداخلاتك الجميلة
ليتنا جميعاً ننجح فى استدراك الطفل الى بؤرة التفاعل
مع قضايانا الكبيرة خطوة بخطوة
حتى يجرج جيل يعرف احتياجات الوطن