هــوّا جـــزاتــي....؟؟؟ ..ضياء الدين البري

السلام عليكم .. مجرد رأي
كلام من قلبي

هــوّ جزاتــــي......؟

..........

أنا دايما جاد فْ دنياتي
وعشان خاطر ، حبيت بنتـك
جيت وناسيبتك
وأخدتيني ساعتها فْ حضنك
بعد ما روحتي وعني سألتي
إتـأكدتي
إني هاكون الأفضل عندك
يومها رقصتي ، كتير وافـْرِحـْتي
شافت كل الدنيا سعادتك
هـُمّ يومين
وجيتي وقولتي ياضي العين
إمته تجيب ياضنايا الترحه
علشان تكمل
وتكون دُخـْله ، أجمل واجمل
قلبي ساعتها طار م الفرحه
وكانت ليله...
وبقيت إبنك
في الصـَّباحِيـَّه
إطـّمنتي
شوفتك طايره ، كتير وافرحتي
لمـّا لقيتي ضحكت بنتك
باينه وعاليه
ماليه عنيها
رغم كسوفها
فجأه لقيتك
جايّه وشايله طاجن ستك
بانت ليّ فْ رنة صوتك
قولت فْ نفسي ، إتأني شويه
وبحنيـّه
جيت وسألتك
ليه زعلانه..؟
قولتي بكره تشوف ياعنيّ
واتغيرتي
بعد ماكنتي تقولي ياغالي
وتغنـّيلي
غنوه تلالي
بقيتي واحده جديده عليّ
أطــوّل بالي
أصَبـّر نفسي كتير وأسوّح
برضه الاقيكي
في عز نهاري
جايـّه وغاويه تـُجـُرّي نـْقاري
أشوف في عنيكي
نظره بتجرح
غاويه تكوني سبب لأهاتي
هــوّ جزاتي..؟
أنا مش هاعتب مرّه عليكي
أنا ها انساكي
علشان خاطر إبني وبنتي
يكون أحسن لك
تبعدي عني
تسلمي مني
بنتك عايشه جوّ النني
بعد ماقالت إنت حبيبي
ربك رايد تبقي نصيبي
وابعدي عنها
أصل انا عارفك
لمّـا بتيجي تقـرّبي منها
عايزاها دايما تقـْرب ليكي
وتِـبعد عنّـي
ولما فْ مرّه سمْعت منـّك
كانت يومها ، هاتخرب بيتها
من بعديها
دايما أنصح قبل ماعاتب
أصل انا عارفك
ودايما حابب
تبعــد عنّـك
علشان تفضل حبي الأول
منّي تـقـرّب
جوّ عنيها أعوم واتجول
ننسج توب الحب أغاني
ونلحنها بأحلي أماني
ولا أتمني فْ يوم نتغرّب
نفضل طول العمر حبايب
برضه مُصـرّه ، تيجي تهاتي..؟
تزرعي همي جوّا فْ ذاتي..؟
كل دا ليـــه..؟
وعشان إيه..؟
ذنبي إني راجل بنتك..؟
وانتي سمعتي بنتك قالت
إنت نصيبي
عايشه فْ حُـبّـك وحنان قلبك
وانت سكنت فْ كل حياتي
في يوم قولت لها
علشان خاطري ، إسألي أمك
إعرفي منها
ليه زعلانه دايما مني
مكان م الأول
قبل ما شوفك واخطب ودّك
وتوافقيني واخش فْ قلبك
كانت تقدر تمـْلي وتـشْرُط
وكنت ساعتها ..!
إما قبلت كل شروطها
أبيع انا أهلي ، وابقي شورتها
واتنازل عن إسمي وصورتي
وتبقي الراجل ، إنتي يازوجتي
وتعيـّشني في بحر هواني
يا إما رَفـَضْتْ ، ورحت لحالي
لأن رجولتي ، هيّ حياتي
وبمرجلتي
باحفظ قيمتي
وبرضه هاتفضل ، دايما شوكتي
عاليه وحاميه ، فْ كل سعاتي
ولا هتنازل أبدا عنها
ولاهاتكوني فْ يوم عنواني
واتمني لك ، تكوني فهمتي
وان ما قدرتي
هابعت اقولك
آخر كلمه ممكن اقولها
واسمعي مني
عيشي فْ حالك
حاربي شيطانك
إعبدي ربك
كل ذنوبك ، يغفرها لك

..................

أشكركم

وللجميع تحياتي

موضوع رائع كا عادتك

بس ولا تشغل بالك

ولازم تعرف وتتأكد ان كلهم فى الاول كدا

مش شوفت اسماعيل ياسين كل افلامه عليهم

وحماتى قنبله زريه

بكرها وبعشقها شويه

موضوع جميل استاذ ضياء

دمت بكل جمال وحب

الشاعرة عزة الزرقانى كتب:: موضوع رائع كا عادتك

بس ولا تشغل بالك

ولازم تعرف وتتأكد ان كلهم فى الاول كدا

مش شوفت اسماعيل ياسين كل افلامه عليهم

وحماتى قنبله زريه

بكرها وبعشقها شويه

موضوع جميل استاذ ضياء

دمت بكل جمال وحب

السلام عليكم .. مجرد رأي
كلام من قلبي
الأستاذه الفاضله .. الشاعره القديره / عزه
احترامي وتقديري

مرور وتعليق حضرتك
خلاني دايما أشكر
باينه السعاده فْ مهجتي
تسلم إديكي وهلـّتك

أستني وافضل منتظر
رأيك باشوفه معتبر
دايما ينور صفحتي
ورقابتي تـطـْول للقمر

حقيقي زادت خبرتي
وبقيتوا دايما عزوتي
وكفايه إنتي المشرفه
والكل طاله محبتي

كل الشكر والتقدير أستاذه عزه
وللجميع تحياتي

الشاعر الرائع جدا

الاستاذ ضياء الدين البرى

قصيده رائعه جدا ومضمون جديد

لم يكتب فيه من قبل كتبت بيه ببراعه

وبأسلوب رائع امسكت الموضوع من كل جوانبه

بحرفيه وتمكن الشاعر الموهوب

وجاءت النهايه رائعه

دمت بكل سعاده وخير

ا

الاستاذ الشاعر

ضياء الدين البرى

الحما دايماّ حما ولو نازله من الجنه

الموضوع شدنى وقرأته اكثر من مره

وأقول إصبر واحتسب أجرك عند الله .

قصيده جميله وإن هرب الوزن منك فى بعض المناطق

ولكن فى النهايه هو عمل احييك عليه وعلى مضمونه .

تقبل من كل المودة والتقدير ..

» يااااااااااااااااأمتي....ضياء الدين البري
» ياريت ......ضياء الدين البري
» من غير إحم يابا .. ضياء الدين البري
» ليه تلوموني....؟ ... ضياء الدين البري
» من غير دليل .. ضياء الدين البري