وإيه الشعر من غيرك؟؟ ...أحمد سعيد موسى

وإيه الشعر من غيرك ؟؟
..
.
أقول لك شعر ؟؟
من عيني
وانا حيلتي غير الأشعار
ف إيدي الورقه هكتبلك
وهرسم لك سطوري نهار
لكن هبدأ بإيه ومنين
أقول مغرم ؟
أخاف الكلمه متكفيش
أقول عاشق؟
دنا جنب العيون درويش
و لو بيدي
أضيف عمري على عمرك
عشان قلبك
في فرح يعيش
و مش بالشعر هوصف لك
مشاعر ساكنه جوايا
دنا طول عمري بحلف لك
بإنك ذِكري وغنايا
وجودك في الحياه يفرق
لإنك كل دنيايا
واقول لك شعر ؟
من عيني
د لعيونك
يطير الشعر ويجيني
يدندنلك ... ويكتب لك
ف غنوة شوق .. وحشتيني
دي نار السهد ف بعادك
بلمسه يادوب بتكويني
يا نايمه بين حنايا الروح
و مزروعه ف شراييني
وإيه الشعر من غيرك ؟
سوى حبة كلام فاضي
ملوش معنى
وبوجودك بيجمعنا
وعزّ الليل بيطرحنا
على الدنيا كما القناديل
ننوّر ضلمة المجاريح
وصوت الريح
يكون تراتيل
وانا ف عيونك الحلوه
بقيت اكتب واقول مواويل
وبتمنى أكون ورده
على خدك تملّي تميل
وبتوشوش عيون قلبك
وتترجى ف لحظه يميل
أقول لك شعر ؟
من عيني
وهو الشعر يصبح شعر
من غيرك
يا ملهمتي
دنا ف بحر الحياه شايفك
جناح مجدافي وسفينتي
ولو بالشعر هتكلم
راح ارسم بالحروف أشواق
وأصبح كعبه للعشاق
ولو قالوا الغرام ترياق
أقول ترياقي هو انتي
فـ عز الضحكه والدمعه
بشوفك في الضلام شمعه
ياريتك بعد دا سامعه
ويبقى لي ف قلبك سعر
أقول لك شعر ؟
انا آسف
لقيت الشعر مش واصف
وانا شايف حنين جارف
واخدني بقوه لعنيكي
وف عنيكي
مداين سحر مقفوله
مفيش قوله
تفك طلاسم الأشعار
انا محتار
وتايه بين بحور الشعر مش لاقي
سوى عينك تكون لي الدار
وميت مشوار
على شوقي بخطيهم
وبطوي سنيني بسنيني
واعديهم
أقولك إيه ؟؟
انا هظلم جمالك ليه ؟
أنا هسكت
واخلي الصمت يوصف لك
كلام مداريه
اقول لك شعر ؟؟
قولي انتي أقول لك إيه
...........
......
..

شعر / أحمد سعيد موسى

يارب اكون اول حد يرد احساسك جميل اوى الله عليك يا شاعر بس بردة مش هتقول
انا عرفه القصيدة دى لمين امممممممممممممممممممممممم
لمصر طبعا صح؟

الشاعر الجميل / احمد موسى

كلمات جميلة تخطف العقل

الله ينور عليك يا ابو حميد

دمت مبدعا متالقا

تقبل مودتى وتقديرى

الابن الشاعر الجميل

احمد موسى

قصيدتك جميله موضوعا ووزناّ

وإسمح لى بعوده لها .

فأعمالك تستحق المرور عليها اكثر من مره .

تحياتى الى عوده ..

برغم مقاطعتك لاعمالى

تثبت القصيده

تقديراّ للشعر والشاعر

برافو احمد موسى
اقولك حاجة

انت
ابهرتنى
افحمتنى
بجد امتعتنى

دمت مبدع
محمد رمضان

شعر ايه

دا العبير

اللى ف الكلامك

خلى احلى

كلام يروح

بسم الله

ماشاء الله عليك

دمت بكل حب وابداع

[flash][/flash]

لو اعرف بس بتجيب الكلام الحلو ده منين يا احمد ياموسى

كنت رحت شكرت المكان اللى بتستقى منه

لانك فعلاً بتمتعنا بجمال نادر

والفاظ مطرزة ومرسومة باألوان مشرقة ولك خلطة مميزة ولا اروع

دايماً موهوب ومبدع

ونتباهى بيك لوجودك معانا فى المنتدى

Cool

جميل يااحمد
تحيه ايها الموهوب

ا

الابن الشاعر الجميل

احمد موسى

انت هنا ومن واقع كلماتك أضفت لسجلك الفنى

قصيده من اروع ما كتبت .

تمكنت من الموضوع وابدعتفى صياغته الرومانسيه

فظهر بتلك الصوره المبهره .

وامسكت ببحر الهزج بإقتدار شاعر متمكن فخرج

النص بهذا البهاء .

تقبل مرورى مع خالص مودتى وتقديرى ..

الشاعر الجميل /أحمد سعيد موسى
الله ينور عليك نص من أروع
ماكتبت حقيقي قمة الروعه
الإستهلال يرعش الجسم بيقول حالتك
وكاني شايفك وإنت بتقول
والصدق هنا عالي قوي
لدرجة إني دمعت لما قولت
(ياريت بعد دا سامعه
ويبقى لي في قلبك سعر)
وجعتني قوي بجد نص من قلبك
الله ينور
مع تحياتي/
السلاموني

حلوه اوي اوي بجد عجبني اوي الوصف ده

ماشاء الله عليك

وعزّ الليل بيطرحنا
على الدنيا كما القناديل
ننوّر ضلمة المجاريح
وصوت الريح
يكون تراتيل
وانا ف عيونك الحلوه
بقيت اكتب واقول مواويل

ولو بالشعر هتكلم
راح ارسم بالحروف أشواق
وأصبح كعبه للعشاق
ولو قالوا الغرام ترياق
أقول ترياقي هو انتي

ماشاء الله على ابداعك ووصفك الرائع للمعانى
سلمت احمد سعيد
وسلم نزف قلمك وابداعك الراقى الجميل

شاعر حدوتة

بس كدة

شاعر الروائع:أحمد موسى
طبعا انا قريتها قبل كده فى أحد المنتديات بس ده ميمنعش انى اعلق عليها بإستمرار لأنها تستاهل
احساسك ممزوج بالحب الرائع الذى قل وجوده فى هذه الايام والتلذذ بالألم فلذلك خرجت لنا قصيدة صادقة خارجة من اعماق ذاتك لانها استحوذت على هذه الأعماق
طبعا مش هتكلم على اتقان ولا اوزان لانك لا غبار عليك فيها ايها المبدع
فهنيئا لك بالحبيبة التى تخرج لنا دائما هذه الروائع
تقبل تحياتى

منه الله خليفه كتب:: يارب اكون اول حد يرد احساسك جميل اوى الله عليك يا شاعر بس بردة مش هتقول
انا عرفه القصيدة دى لمين امممممممممممممممممممممممم
لمصر طبعا صح؟

مرورك الأول عندي يا منّة أغلى م الدنيا بحالها
ربنا يخليكي يا نوارة البلد وشاعرة الغد
أخوكي

قصيدة رائعة ياأحمد
كالعادة
أحييك عليها

احمد ابراهيم الحارونى كتب:: الشاعر الجميل / احمد موسى

كلمات جميلة تخطف العقل

الله ينور عليك يا ابو حميد

دمت مبدعا متالقا

تقبل مودتى وتقديرى

بل مرورك هو الخاطف للعقل أيها الشاعر الجميل
حقيقة يسعدني وجودك في جنبات قصيدي
دمت لي

المبدع / احمد موسي
كعادتك جميل دائما
ومبدع حقيقي
وكلماته في غاية الرقه والرومانسيه الجميله
دمت بكل خير

أحمد يا موسى
أقول يا شعر ؟!
واقوله ازاي
بعد ما شفت
قريت وسمعت
خلاص مقدرش
أقول الشعر من تاني
دا إنت الشعر
يا شاعر
وم الآخر
خلاص منفعش
أقول الشعر
دا إنت الشعر يا شاعر

عادل عوض سند كتب:: الابن الشاعر الجميل

احمد موسى

قصيدتك جميله موضوعا ووزناّ

وإسمح لى بعوده لها .

فأعمالك تستحق المرور عليها اكثر من مره .

تحياتى الى عوده ..

برغم مقاطعتك لاعمالى

أستاذنا القدير / عادل عوض
تأتي في أي وقت فمرورك هنا كإشراقة شمس
على ليل قصدتي

تقديري ومحبتي
أنتظرك

عادل عوض سند كتب:: تثبت القصيده

تقديراّ للشعر والشاعر

أكرمك الله كما أكرمت القصيدة
هذه لعمري شهادة أعتز بها

محمد رمضان كتب:: برافو احمد موسى
اقولك حاجة

انت
ابهرتنى
افحمتنى
بجد امتعتنى

دمت مبدع
محمد رمضان

حبيب قلبي الغالي
محمد رمضان
الله يكرمك دا من ذوقك يا حمادة
أنا بتعلم منكم كتير
شكرا يا غالي

(( الله أكبر علي جمال الاحساس يانااااااااااس ))
***

سؤال موجه إلي / شيطان الشعـر
ابني الجميل / أحمـــد سعيد موسي
***

عاوزني آجي ؟
واجيلــك ليه ؟!

عشان أشهــد ؟
وحااشهد ليه ؟!

ماكل الدنيــــــا
شهدالك ..

وشمس الشعـــر
طلعالك

وضحكــــة بنت
رسمالك

طريق ف القلب
تمشي عليه

وبرضو آجـي ؟!
وآجيلـــــك
ليــه
!!!

شاعرة الشعب

زينات القليوبي

الشاعرة عزة الزرقانى كتب:: شعر ايه

دا العبير

اللى ف الكلامك

خلى احلى

كلام يروح

بسم الله

ماشاء الله عليك

دمت بكل حب وابداع

الأستاذة الغالية والأخت العزيزة
عزة الزرقاني
حقيقة أسعد بهذه الكلمات الجميلة
ومجاملاتك الرقيقة
دمتِ بخير
أحمد

» هذا أبي ... أحمد سعيد موسى
» أمي ... أحمد سعيد موسى
» إوعديني ... أحمد سعيد موسى
» سرسوب شجن ... أحمد سعيد موسى
» راجعه ليه ؟؟ ... أحمد سعيد موسى