فلاح -مـــــش- فصيح

فلاح -مـــش - فصيح


أنا مين أنا ليه أنا كِيف أنا كام؟
أنا واحد هارب م الأحكــــام
أنا رايح جاي علي الدور
أنا زى الفروج المــدوور
أنا بزرع نور وبعيش في ضلام

متهوم بالجهل وبالأمية
أنا شايل 20 ألف قضية
بقي عامل زي حديدة الغيط
الكل منفّـض فاسه عليه
مع إن حياتي علام ف علام

مركون ع الحيط زي الجزامة
أنا زي مهبة ف ايد خدامة
مغلولة ولها صحة عفيــــــة
خلتني ما عارف حسبتي كام


ما تسيبني ف حالي الله يخليك
لا نهبت قروض ولا قلت فكيك
ولا ليه ف رشوة ولا ف تسليــك
وباعوها ما قلتش بعتـــو بكام

أنا شاري بلادي وعمرى ما بيع
ولا ليه ف سلم ولا ف تطبيع
أنا عندى أموت ف الحرب شجيع
ولا إني أعيش مذلول بسلام

أنا بابني مدن وبنام ع رصاف
وبتاكل لحمي وباكل حاف
نسّيتي خلاص طعم الانصاف
والعدل في ضلك بقي أوهام

من بدري بقوم وبصحِّي الطير
أنا فالح غيطي وبحصد خير
والخير ع يصبّ ف كف الغير
وببوس اليد ومرضي بنام

أنا زارع رز وقمح وفول
وبزود ليكم ف المحصول
ما أنا بعلف ناس وحمير وعجول
من هدة حيلى اتعشه وانـــــــام


بســـــأل ع الغايب والعيان
ومربي ولادي علي القرآن
وبفور لو بلدي ف يوم اتهان
وبقوم بالمطلوب مني تمــام

الباشا مكدر مني أنا ليه؟
وأنا خيري عليه يا سعادة البيه
لو عاوز نحتاسب أوكيه (OK)
مايشوف بقي مين غرقها وعام

من باعها لمين بالطول والعرض
مين سمم ناسها وخرب والأرض
مين كسر العفه وهتك العرض
مين خلا النخوة بقت أحــــلام

مين خلا حياتنا يابيه ألغاز
أنا دايخ ورا انبوب بوتجاز
وولاد الكلب بياخدوا الغـــاز
والداهية السودة بياخدوا بكام؟!!!

مين ودا حديد يبنوبو السور؟
مين حاصر حق بأمر الزور؟
مين فتح الخزنة وطفي النور؟
وقال العلـــم حدا العـــلام

من غيري لا موز ولا جوز ولا تين
ولا كنتو هتبنوا قصور عابدين
طيب والله ، ليووووووم الدين
من غيرنا ما فيه معني لحكام

دا انا حتي جميل وبرئ ولذيذ
دا انا بفدي بلادى بكل عزيز
بالرو ح بالدم بالراس وال...غيظ
إنك ما تسمع أي كلام
أنا جاهل؟ طيب جاهل ليييييه؟؟
ابترسم خط أنا بمشي عليه
ان تهت معاه أتحاسب ليه؟
بالزمة يا باشا دا يبقي كلام؟؟؟؟

عاطف عاشور