حكاية عاطل

حكاية عاطل

***

قعدت قعدة دردشة
وسط الولاد بعد العشا
نحكى نسلى نفسنا
وفى عزة هوجة ضحكنا
جانى السؤال اللى اتسأل فيما مضى
ولا كانشى له اى صدى
ولا له اجابة محددة

***
الواد نطق
قاللى انا هنا منتظر
والعاطلين ليه كتروا يابا فى البلد
طب والحكومة قاعدة ليه ومطنشة
وانا منتظر لو يوم جواب منها وصل
ح اعمل فرح صبح ومسا
قربت اضيع عندك بلاش
وانت هنا آخر طناش
زى الحكومة فى البلد
وانا ابنك البكرى الولد
خدت الشهادة من سنين
والصبر طال
ورغم الشهادة بشتغل
يوم مكوجى
يوم طرشجى
يوم قهوجى
علشان مااكونشى فى حكمكم
كمالة عدد

***
زبعد اللى كالن واللى حصل
نفسى بقة يكون لى عمل
بدل القعاد على كرسى كافتريا البلد
وما تقولوش ان الوظيفة فى الحكومة محزنة
وما تجيبشى حتى همها
طب اعمل ايه انا والبنات
طول عمرنا مستنيين يوم العدل
فاتحين شبابيك الامل
اللى عليكوا مفندقة

***
رديت وقلت اسمع بقى
انا عندى حل المشكلة
هاجر وروح الغردقة
بدل القعاد والبهدلة
اصل انا لحدك هنا دورى انتهى
وانت عليك تسعى بقى
بس اوعى ترجع بالنواح
او ينكسر منك جناح
عيش مستقيم حافظ على الدين والوطن
واياك عيش وسط العطن
ويغيروا طبعك هناك
افتح الراديو بقه سمعنا غنوة نحبها

***
وفجاة نسمع كلنا
صوت المذيع بيقولنا
م الراديو حاجه تسرنا
قال الخبر ان النظام
وفر خلاص فرص العمل
للعاطلين فى مصرنا
ولا عمرنا ح نلاقى عاطل فى البلد
قام الولد بعد ما كان
ناوى على شد الرحال
صدق كلام راديو الكرام
وقال خلاص جالنا الفرج
وخش فى سريره ونام
على حس تصاريح اللئام
علشان يعود تانى السؤال
لحين بيان آخر جديد
من مصدر الراديو هنا
من بوق بلدنا العامرة بالتصريحات
وخد وهات
واملا الهموم فى السيديهات
ويا خطب مترشحين فى البرلمان

***
وبالمناسب ياولد
ادى صوتك للى ح يفيد البلد
واللى رح يديك امل فى نظام جديد
مهما طال بيك الاجل
وقبل مايفوت الاوان
ارجع واقول المشكلة مش ف الفساد
اللى وصل حد الركب
ا المشكلة فى كلمة الحق
اللى رح تدى القرار
المشكلة هنا فى الضمير
لما لمح كل العيون متغمضين
بلغ فرار
خلا حقوق كل الغلابة تستباح
حتى فى عز النهار

***
عايزين تحلوا المسالة
نتقى المولى العزيز
فى شعبنا وف نفسنا
ومن هنا تتحل اكبر مشكلة


****

الابن العزيز الغالى الشاعر المتميز والمتألق جدا
الاستاذ جمال الدليل

تحياتى وتقديرى وشكرا على مرورك الغالى وتعقيبك
الذى اعطانى اكثر مما استحق 0

دمت بكل خير ومحبة وسعادة ودام ابداعك الرائع

اخى وصديقى العزيز استاذنا الشاعر الكبير
الاستاذ عادل عوض

تحياتى وتقديرى وشكرا على مرورك الغالى الدائم
على قصائدى المتواضع وتعقيبك الجميل
اقولك ايه بس بينى وبينك لنا الله وما تقولشى لحد 0

ودمت بكل خير ومحبة وسعادة

خليها قعدة دردشة
وبلاش زعل ولا عكننة
متجبش سيرة تغمنا
علشان ندوق طعم العشا
يا عم فوزي يا عسل
دي أحلى حاجة الفرفشة
على فكرة يا أستاذ فوزي
أنا بعد ما قريتها بالليل
شبعت ونمت من غير عشا ، بس بجد أمتعتنا وأسعدتنا
جزاك الله خيرا

اخى العزيز المبدع الجميل والشاعر المتميز
الاستاذ حسام خليل

تحياتى وتقديرى وشكرا على مرورك الغالى
على قصيدتى المتواضعة 0

والله بجد وبدون مجاملة هذا التعقيب اسعدنى
سعادة بلا حدود وهو فى رايى ابلغ وابدع
الف مرة من القصيدة نفسها 0

دمت بكل خير ومحبة وسعادة ودام ابداعك الرائع 0

الشاعر الجميل الأستاذ فوزى الشربينى


خالص تحياتى اليك

فـــرصـــة عمـــل

شــاطــر وطــالــع لـ بــُــوك خــاتــم لسطــر التلاتـــــه
فى جـــدول الضــرب يابــنى والرب كــان ليــك معـــين
ليـلة الخميـس عيش ونــابت حــالف يميــن بـ التلاتــه
تعيينــــك جــاهــز يــاعبـــده كــاتب وابـــورالطحيـــن

خريج بدون واسطة

بــالذمــه مــش مسخــــره لمـــا اشتغــــل عــــامـــــل
جـــامعــه وابــويــا حـفـى ظــلل وكـــــان عـــــامــــل
خـــده مــداس للــدروس والـدخــل كـــان محــــدود .
كـان نفســى يــوم أسـعـــــده تعينـى جــه عـــامـــــل

االاخ العزيز الشاعر والاديب المتميز والمتألق دائما
الاستاذ الدكتور صلاح طاهر

تحياتى وتقديرى وشكرا على مرورك الغالى والدائم عل قصائدى
المتواضعة وتعقيبك الذى تفاعل مع مقصدى والذى كان ابدع وابلغ
من قصيدتى 0

دمت بكل خير ومحبة وسعادة دام ابداعك الرائع 0

الابن العزيز الغالى الشاعر المتميز والمتألق دائما
الاستاذ عمرو زيتون

تحياتى وتقديرى واحييك واشكرك عل مرورك الغالى
وتعقيبك وتفاعلك الرائع مع قصيدتى المتواضعة 0

دمت بكل خير ومحبة وسعادة ودام ابداعك الرائع

الاخت العزيزة الشاعرة الغنائية المتألقة
الاستاذة عزة الزرقانى

تحياتى وتقديرى وشكرا على مرورك الغالى
وتعقيبك المشجع الذى يسعدنى دائما

دمتى بكل خير ومحبة وسعادة0