التجربة الثانية

( لا يرضينى )
######
لا يرضينى
سواد الليل يعزينى
ولا الأحزان تبكينى
لكن يرضينى يا زمانى
تجيبلى حبيبى من تانى
ولو ماعرفش عنوانى
لحد مكانه ودينى
ده يرضينى
حبيب العمر تاه منى
وتاهت روحى من روحى
وامتى عنيه تطمنى
واداوى بنظرته جروحى
ياريت القاه
وادوب وياه
دى لحظه معاه
بترضينى
فى ليل البعد مستنى
وفجر حبيبى ماطلعشى
ودقة قلبى تسئلنى
وليه الغالى مارجعشى
لا يوم هنساه
ولا انسى هواه
وهستناه
وهيجينى
ويرضينى

الأستاذ / عادل سند
واضح انى قدامى سنتين على الأقل على بال ما اعرف اتعامل مع الموقع بس اكيد انا معذور ربنا يخليك ليا وتعرفنى انا فين وبشكرك على تعليقك الجميل وكلامك اللى بيخلينى اشعر انى يعنى ممكن يجى منى فى يوم من الأيام وابقى شاعر صغنون
لك منى كل الشكر والتقدير لشخصك الجميل

الأستاذة / اميرة البدرى
اشكرك على مرورك الجميل
وتعليقك الأجمل
بس انا ماقدرش على التعليقات الجامدة دى
انا فعلآ ممكن يغمى عليا من الكلام الحلو اللى بسمعه
بشكرك وياريت تقبلى منى كلمتين صغيرين بإسمك
بحبك وانتى وخدانى
لنور الصبح يا اميرة
واحبك وانتى فايتانى
فى ليل الحزن والحيرة
واحبك وانتى سايبانى
لنار الشك والغيرة
ولما الفرح ينسانى
وليل الحزن يلقانى
بلاقى عنيكى وخدانى
لنور الصبح يا اميرة

استاذة / عزة الزرقانى
اشكرك على اهتمامك وتعليقك الجميل
وانا عارف انى زهتقك من يوم ما دخلت المنتدى
بس حضرتك لازم تتحملينى لأنك صاحبة القلب الكبير
واسمحيلى اهديكى كلمات يمكن تعجبك
عزة يا اجمل ضى ف عينى
نورك ولا ده نور الشمس
فجر عيونك بيصحينى
من احزانى وبنسى اليأس
بسمع احلى كلام يشجينى
لما شفايفك تحكى بهمس
عزة يا اجمل دقة ف قلبى
شوقى غالبنى ولسه بخبى
انتى هنايا ونعمة ربى
يلا قوام عالجنة خدينى
عزة يا اجمل م الأحلام
طيفك جانى ف احلى منام
قاللى كلام ماعرفتش انام
لو يرضيكى اكيد يرضينى
عزة يا اجمل لحظة ف عمرى
انتى سمايا وشمسى وقمرى
خدنى هواكى مكانش بأمرى
عزة يا احلى ما شافت عينى

الأستاذة الجميلة / رشا فؤاد
تحية عطرة لحضرتك وبشكرك على مرورك وتعليقك الجميل
ومن فضلك انا ليا سؤال صورة حضرتك فيها اتنين حضرتك مين فيهم؟
عمومآ الإتنين اجمل من بعض
بشكرك جدآ وياريت دائمآ تشجعينى كده